MWAHA 49
Nsuwa Naaheemela
NKAMOONEENI Yosuwa. Owo aahi: ‘Nsuwa, nkhemela!’ Nave nsuwa nlo naaheemela. Naahikhala vavaa veeri va erimu, mu nihiku noothene. Yehova aaheerano eyo! Nyenya, hinkoni noone nthowa nene Yosuwa aachunenliiye wii nsuwa nipwahiherye waarya.
Vavaa mamwene mathanu oonanaraawo a o elapo ya Kaanani yaapacenraaya owana ni asinaGibeoni, ala yaahimurumiha muchu wa Yosuwa wii aveke okhaviheryiwa. Owo aahi: ‘Murwe mwawaakuveya! Nivuluxeeni! Mamwene oothene a o makupa oomwaakoni anawana ni arummwaanyu.’
Yosuwa aahiyawo mwawaakuveya ni alipa-akhochwaawe oothene. Yaaheecha ohiyu woothene. Vavaa yaaphiyalaaya o Gibeoni, asurutato a amwiicani awo yaahichawa. Vanonto Yehova aaheriha omora wirimu maluku matokotoko a maralala, yaawo yaawiiphale asurutato ancipale opwaha yaawo yiiphiwe ni alipa akhoco a Yosuwa.
Yosuwa aahoona wii nsuwa naaya oneela. Waahaala oriipavo nave asurutato ancipale a mamwene mathanu oonanaraawo yaahaala ochawa. Ti nthowa nene Yosuwa aavekenliiye wa Yehova, navento aahi: ‘Nsuwa, nkhemela!’ Vavaa nsuwa nlo naapwahihenryaaya waarya, aIsarayeli yaahiwerya omaliha ni opwaha veekhoco eyo.
Yaahikhalavo mamwene makina mancipale oonanara o Kaanani, yaawo yaawiicha achu a Muluku. Yosua ni alipa akhochwaawe yaahikuxa iyaakha thanu nammoha wii yaapwahe mamwene 31 a elapo eyo. Vachuli vaya, Yosuwa aahithokororya wii elapo ya Kaanani ekaiwe mmahimo.
Waahiviravo iyaakha sincipale, nave vookuchula vaya, Yosua aahikhwa arino iyaakha 110 sa oyariwa. Vavaa owo ni asinthamwenaawe yaariyaaya akumi, achu yaanamwiiwelela Yehova. Nyenya, vavaa achu aphaamaawo yaakhwilaaya, achu awo yaahipacerya weera ichu soonanara ni wiivoleiha mu sookachamiha. Ti vaavanto chiri yaachunaaya yookhaviherya ya Muluku.
Yosuwa 10:6-15; 12:7-24; 14:1-5; Amuthoriha 2:8-13.