MWAHA 58
Tavite Ni Goliyati
ASINAFILISTI yaahirwatho owana ni Isarayeli. Asuulupalaawe araru a Tavite yaari m’muloko wakhoco wa Saawulu. Nihiku nikina, Yese aahi wa Tavite: ‘Waakuxerye annaa mmiso ni iphawu. Wawoone wii ariwo hayi.’
Voophiya va mikochani ya muloko wakhoco, Tavite aahichimaka ophiyerya vamusera wakhoco, wii awaavye anneeni. Nakuru musinaFilisti Goliyati aahikhumelela wii aanyemule aIsarayeli. Aaheerano hiihaa wooxixelo ori woothene ni oxekuwa ori woothene, wa mahiku 40. Owo aahikhuwela: ‘Mmuthanle mulopwana awii awane ni miyo. Akipwaha ni okiipha, nnahaala okhala akapuro anyu. Nyenya, miyo kampwaha ni omwiipha, nyuwo munahaala okhala akapuro ahu. Kinniithamalela wii emuthanle muchu wii awane ni miyo.’
Tavite aahaakoha asurutatu awo: ‘Mano tiheeni yeeyo onahaaliiye ophwanya muchu yoowo onii amwiiphe musinaFilisti ola ni omoopola Isarayeli mu wuulihiwa muru?’
‘Saawulu onahaala omvaha muchuuwo muhakhu muncipale,’ aahi musurutatu mmoha. ‘Nave owo onahaala omutheliha ni mwanawe.’
Nyenya, aIsarayeli oothene yaanamoova Goliyati, nthowa nawii aari mutokotoko vancipale. Aarino meeturu 3 orekama wawe, nave aahikhalano musurutatu mukina aamutexerya yawiikichaawe nrapala nawe.
Asurutatu akina yaahiya omuthoriherya Mwene Saawulu wii Tavite aachuna owana ni Goliyati. Nyenya Saawulu aahi wa Tavite: ‘Ohiwane moovaanyihana ni musinaFilisti ola. Weyo wa mmiravo pahi, nave owo musurutatu okumi awe woothene.’ Tavite aahaakhula: ‘Komwiipha napiili ni mwaco yaawo yaaphanre ipucepuche sa atiithaaka. Nave musinaFilisti ola onahaala okhala mmoha a yaawo. Yehova onahaala okikhaviherya.’ Vanonto Saawulu aahi: ‘Hawe, nave Yehova akhale ni weyo.’
Tavite aahikhuruwela mmuhiceni wii arole maluku mathanu, yaawo aakunhiiye mmurupani mwawe. Vachuli vaya aahimukuxa fiska nave aahirowa okumana n’nakuruuwo. Goliyati woomoona, heemerenrye. Oona wii waari wookhweya omwiipha Tavite.
‘Orwe nno,’ aahi Goliyati, ‘nave miyo kinahaala oveleela muruchwaa wa ipalame ni wa inama.’ Nyenya Tavite aahi: ‘Weyo onarwa wa miyo ni ekatana, nlema ni nivaka, nyenya miyo kinarwa wa weyo mu nsina na Yehova. Olelo, Yehova onahaala wooveleela weyo mmatatani mwaka nave miyo kinahaala owiipha.’
Vanonto Tavite aahichimaka oya wa Goliyati. Aakumiha nluku nimoha mmurupani, akuha va fiskani nave avonya ni ikuru soothene. Nluku nlo naahimphiyerya phameene Goliyati vamuruni, nave owo aahuuwa ookhweene! AsinaFilisti vawoona wii khanviriwaaya ohuuwa, oothene yaahichawa. AIsarayeli yaahiwiikara nave yaahipwaha ekhochweeyo.
1 Samuwele 17:1-54.