MWAHA 69
Nahano Onnamukhaviherya Mulipa Akuru
MANO moosuwela yeeyo nahano ola onalociiye? Owo onaloca wa pwiyawe mwaamuthiyana sa Elisa, mulipa a miririmu a Yehova, ni sotikiniha seiyo Yehova aamukhavihenryiiye weerano. Pwiya mwaamuthiyana ola hanasuwela echu vooloca sa Yehova, nthowa nawii kaahi muIsarayeli. Vanonto hinkoni noone nthowa nene nahano ola okhalenliiye owannyawe wa pwiya mwaamuthiyana ola.
Pwiya mwaamuthiyana ola musinaSiiriya. Aiyawe ti Naamani, muhooleli a muloko wakhoco wa oSiiriya. AsinaSiiriya yaarimmwiiya nahano ola muIsarayeli nave emukuxerya wa mwaara a Naamani, wii akhale oomurumeelaawe.
Naamani aahikhala ni erecha etokotoko yawiichaniwa marecha. Ela enneeriha ethai ya muchu omoraka. Va nthowa nla, nahanoowo aahi wa mwaara a Naamani: ‘Miyo kaanachuna wii pwiyaka arowe wa mulipa a miririmu a Yehova, o Isarayeli. Owo aamumpenuxa marechaawe.’ Pwiya mwaamuthiyana owo vachuli vaya aahimuthoriherya iyawe yeeyo nahanoowo aalonchiiye.
Naamani aanachuna vancipale openuxiwa; va nthowa nla aahithanla orowa o Isarayeli. Voophiya iwo, aahiya owannyawe wa Elisa. Ola aahimuruma murummwaawe wii amuleele Naamani wii apwine othanu napiili mmuhiceni wa Yoortano. Naamani aahinanariwa, ariki: ‘Mihice ya owannyaka ti yaphaama opwaha mihice eri yoothene mu Isarayeli!’ Va ela, Naamani aahichuna orowaka.
Nyenya, mmoha a arummwa aahi wa yoowo: ‘Apwiya, Elisa aari oorumaani opaka echu yookachamiha, chiryene mwaahaala weerano. Vanonto, ntakhara heni muhinayaanyuwo orapa, ntoko owo olochenliiye?’ Naamani aahiiwelela nave aahiya opwina othanu napiili mmuhiceni wa Yoortano. Eerakanoru hiihaa, mwiili awe waahikookelana okhala waphaama!
Naamani aahihakalala vancipale. Aahikookela wa Elisa nave aahi wa yoowo: ‘Vano koosuwela wii Muluku a Isarayeli ti Muluku mmoharu eeparipari veelaponi yoothene yavathi. Khwoo aakhelani yamahala ela.’ Nyenya Elisa aahaakhula: ‘Hooye, nkaakhelaa.’ Elisa aanasuwela wii waari woochekeya waakhela yamahala eyo, nthowa nawii aari Yehova yoowo aampenunxe Naamani. Nyenya, Gehazi, murummwa a Elisa, anachuna yamahaleeyo ntakhara a yoowo mwaneene.
Gehazi eenre mwawiiha. Vachuli va ochimula wa Naamani, aahimuchimakela. ‘Elisa ookiruma wooleelaani wii onaakhela yamahalaanyu ntakhara a asinthamwene awe anaamphiyaru,’ aahi Gehazi. Iwo waari wootha. Nyenya Naamani haasuwela wii waari wootha; va nthowa nenla, aahimvahererya Gehazi sikina sa ichu sene seiyo.
Vavaa Gehazi aakookenliiye owaani, Elisa eera asuwenleene yeeyo owo eenriiye. Yehova aahimuleela. Va nthowa nenla, owo aahi: ‘Mano ntakhara heni weyo weenraawe yoonanara ela, onahaala okhala ni marecha a Naamani.’ Nave saaheereya hiihaa!
Mano nnahuserya eheni va yeeyo? Voopacerya, wii nnaphwanela olocaka vooloca sa Yehova, hiihaa ntoko nahano ole. Ela ennawerya weerano phaama. Vanaawiili, wii hinnaphwanela okhala awiirumiha ntoko Naamani voopacerya vene, nyenya owiiwelela arummwa a Muluku. Nave vaneeraru, wii hinnaphwanela woothaka ntoko Gehazi. Mano hinnahuserya sincipale voomwaalakhanya Piipiliya?
2 Mamwene 5:1-27.