Nakhoco ni Nahano

Elapo ya Asiriya yaari yoorakamela ni elapo ya nahano Muisarayeli. Anakhoco a Asiriya yaamukuxa nahano emukeriha ocai wa amusi awe akhala kapuro a mwaara a mutokweene aanakhoco awiichaniwa Nahama. Nahano annamulapela Yehova naamwi achu aakhaleiyeno ehimulapelaka.

Nahama aakhalano ereca etokweene nave aanahooxeya elukuluku yoothene. Nahano aanachuna omukhaviherya Nahama. Owo aaloca ni mwaara a Nahama: ‘Apwiya aka yaari eya o Samariya emphwanya mulipa a miririmu ori weiwo nsina nawe Eliseu, yoowo aamwaapenuxa.’

Mwaara a Nahama aahaaleela aiyawe echu nahano aalonceiye. Nahama aahirehererya aya vaate wa Eliseu o Isarayeli. Nahama aawehererya wi Eliseu ahaala omwaakhela ntoko muchu avameekheiye. Nyenya vaavaa aalokonheiye ereca awe, Eliseu aamuruma kapuro awe wa Nahama wi amuleele michaka iha: ‘Oye o muhice Yortano, wapwine mmaahini a muhice yoowo itila thanu napiili. Mwiili aa onamukookela okhala waphaama.’

Nahama haasiveliwe ophiyerya apwahavo vaate wa Eliseu aniilocela arowaka: ‘Mi kuupuwela wi muchu ntoko miyaano mulipa a miririmu aahaala ochuna okumanano, anvekelele wa Muluku awe ni amphare mapuro oothene ari ni ereca ni acakanelihe ereca. O Siriya sookhalawo mihice saphaama opwaha sa Isarayeli. Waari oraparu mihice iho hisi sikipenuxe?’

Anamuteko a Nahama yaamuleela wi eereno yeeyo aaleeliweiye. Awo yaaloca eriki: ‘Mulipa a miririmu ari oovekaani echu yoovila, nyuwaano mwahaala omwiiwelela. Nto echu oolenleiyeni ti yookhweya, vano ntakhara heeni muhimwiiwelelaka?’ Nahama aawiiwelela anamuteko awe aya o Muhice Yortano nave aapwina ikwaha thanu napiili. Amanle opwina ikwaha thanu napiili, aakhuma mmaahini apenunwe. Owo aatepa otikhiniheya nave aaya vaate wa Eliseu. Nahama ahi: ‘Vano koosuwela wi veelaponi yoothene orivo Muluku mmoharu.’ Nahano oonne hai vaavaa Nahama aachikenleiye owannyawe apenunwe?