MWAHA 74
Mulopwana Mmoha Oohoova
NKAAWEHEENI achwaala emurohaka mmiravo owo. Mano moosuwela wii owo taani? Owo ti Yeremiya. Owo ti mulipa amiririmu oochuneya vancipale a Muluku.
Elukuluku vakhaani vachuli va Mwene Yosiya apachenrye opahula soophwaniherya mulaponi, Yehova aahimulamula Yeremiya okhala mulipa a miririmu Awe. Nyenya Yeremiya oonne wii aahitepa okhala mwammiravo woohiphwanela okhala mulipa a miririmu. Yehova ahimuleelanto wii onahaala oomukhaviherya.
Yeremiya aahaaleela aIsarayeli wii eheereke ichu soonanara. ‘Miluku eyo enalapeliwa ni amalapo ti soowoka,’ aahi yoowo. Nyenya, aIsarayeli ancipale yaakhwenle olapelaka soophwaniherya, mpuroni mwa Muluku eeparipari owo Yehova. Vaavaa Yeremiya aaleenliiye achwaawo wii Muluku aahala waalaka nthowa na oonanara waya, awo yaarimoona omutheya pahi owo.
Waahiviravo iyaakha. Yosiya aahikhwa, nave miyeeri miraru vachuli vaya mwanawe Yehoyakimu aahikhala mwene. Yeremiya aahipwahiherya waaleela achwaawo: ‘Yerusalemu onahaala opahuliwa, mwaahihiyaru okhala oonanara.’ Alipa a ephepa yaahimphara Yeremiya nave yaakhuwela: ‘Weyo onnaphwanela wiiphiwa nthowa na oloca eyo.’ Yaahi wa mamwene makhaani a Isarayeli: ‘Yeremiya onaphwanela wiiphiwa, ntakhara ooloca moovaanyihana ni epooma yahu ela.’
Mano Yeremiya eenre eheni? Owo hoomve! Aahi wa yaawo: ‘Yehova ookiruma miyo oloca eyo wa nyuwo. Mwaahihiyaru okhala oonanara, Yehova onahaala ompahula Yerusalemu. Munnaphwanela ochichimiherya wii mwakiipha miyo, munahaala omwiipha muchu yoowo oheenreru yoonanara.’
Mamwene makhaani awo yaahimuhiya Yeremiya okhala mukumi, nyenya aIsarayeli hiyaarukununwe. Vachuli vaya aahirwa Nabukodonosor, mwene a o Paapulu, owana ni Yerusalemu. Vookuchula vaya, owo aahaapaka aIsarayeli okhala arummwaawe. Aahaakuxa masana ancipale oyano o Paapulu. Nkuupuwelani wii waahaala okhala wawiihai wakhalawii achu oohaasuwela ahookuxaani nyuwo vaate vanyu yookerihaani weelaponi yoohisuwela!
Yeremiya 1:1-8; 10:1-5; 26:1-16; 2 Mamwene 24:1-17.