Yehova Aamuruma Yeremiya Olaleerya

Yehova aamuthanla Yeremiya wi akhale mulipa a miririmu o Yuteya. Owo aamuruma Yeremiya wi aahusihe achu ni wi ehiye weera ichu soonanara. Yeremiya aahi: ‘Kootepa okhala mmiravo wi kiloce vamiithoni va achu.’ Yehova aamwaakhula: ‘Ohiwoove achu, ntakhara kiri ni weyaano wi kiwaakihe.’

Yehova aaloca ni Yeremiya wi aathanle asitokweene a achu yaale, nave anyaanye murinka vamiithoni vaya ariki: ‘Hiiha tho enamunyaanyiwa epooma ela.’ Vaavaa Yeremiya eenreiye yeeyo, asitokweene yaatepa onyeenyeya. Mulipa eephepa mmoha nsina nawe Paskuri amphara Yeremiya nave aammakelela va ekhukulu. Ohiyu woothene Yeremiya haaweryaru wiicikinya. Paskuri aaya omviihavo wooxixelo. Yeremiya aahi: ‘Nkirwa tho kuuluula owuupuwela Apwiya. Nkirwa tho kiloca mwa nsina naya.’ Mpwanne owo aahiya chiryene owuupuwela apwiya? Hooye. Vaavaa Yeremiya uupuwenleiye mwawiixeela, owo aahi: ‘Michaka sa Apwiya Yehova iri ntoko mooro waakeeyela makhuva. Kaanachuna ocipiha nto nkaawerya.’ Yeremiya aakookela waahusiha achu.

Ni ovira wa miyakha, aakhalawo mwene o Yuteya. Anamukucho ni alipa a miririmu awootha hiyaasiveliwano michaka sa Yeremiya. Nave yaaloca ni asitokweene wi: ‘Muchu ola athoriheliwe okhwa.’ Yeremiya aaloca ariki: ‘Mwakiipha, munamukuxa mwaha wa nthowa na okhwa wa muchu oohicheka ntakhara Apwiya takirumme olaleya.’ Vaavaa asitokweene yiiwalaaya eyo yaahi: ‘Muchu ola hanaphwanela okhwa.’

Yeremiya aatitelela olaleya, nyenya asitokweene yaatepa onyeenyeya. Awo yaamveka mwene wi amwiiphe. Setekiya aaloca wi awo emweerele yeeyo yaachunaaya. Awo yaamphara Yeremiya, emvonyerya mukhokwe waarimo ncokwa wi akhwe. Yeremiya aammora ocora.

Mutokweene mmoha nsina nawe Epetemeleki aaya oloca ni mwene wi: ‘Achu aamurihela Yeremiya mukhokweni nave mummo onamukhwamo etala.’ Mwene aamuruma Epetemeleki wi aakuxe achu 30 wi yamviihemo Yeremiya. Apwanne hannaphwanela okhala ntoko Yeremiya yoowo aaheemerenrye wi echu vyakala emmaalihe olaleerya?