MWAHA 79
Daniyeli Munlichini Na Amwacho
VANO, onakhala ntoko wii Daniyeli ori va sookachamiha sitokotoko. Nyenya amwacho awo hanamuluma! Mano moosuwela nthowa nene? Mano taani yoowo aamukunhemo Daniyeli ni amwacho oothene awo? Hinkoni noone.
Vanonto mwene a o Paapulu aari mulopwana mmoha awiichaniwa Dariyo. Owo aahimusivela vancipale Danieli, nthowa nawii owo aari aphaama ni amiruku. Dariyo aahimuthanla Danieli okhala olamulela mutokotoko mu omwene. Alopwana akina mu omwenoowo yaahimukhalela nrima Daniyeli.
Awo yaahiya wa Dariyo nave yaahi: ‘Noopharihana, nyuwo mwene, wii munnaphwanela opaka nlamulo mulocaka wii, mmahiku 30, ahikhalevo onii amvekeleke muluku mukina naari muchu mukina, nyenya nyeenyuru, nyuwo mwene. Yoowo onii ahiiwelele, onaphwanela ovonyeryiwa mwa amwacho.’ Dariyo haasuwela nthowa nene yaachunelaaya nlamulo nene nenla. Nyenya, aahoona wii yaari muupuwelo aphaama, nave aahipakiha orempwa nlamulo nlo. Vanonto, hinaaphwanelaru otorokiwa.
Vavaa Daniyeli aasuwenliiye sa nlo, aahiya owannyawe nave aavekela, hiihaa ntoko elukuluku yoothene. Achu oonanaraawo yaanasuwela wii Daniyeli hii ahiye omvekela Yehova. Yaahihakalala, nthowa nawii yoochunaaya yawii ehiyaneno Danieli yaahiphara muteko.
Vavaa Mwene Dariyo aasuwenliiye nthowa nene alopwanaawo yaachunelaaya nlamulo nla, aahithanana. Nyenya, haawenrye otoroka nlamulo nlo, nave, va nthowa nenla, aahilamula Daniyeli ovonyeryiwa mulichini na amwacho. Hiihaanto, mwenoowo aahi wa Daniyeli: ‘Kinnaweherya wii Mulukwaa, yoowo weyo onamurumeelaawe, onii oovuluxe.’
Dariyo aahikachamiheya vancipale, ophiyerya ohikona ohiyweene yoole. Wooxixelweene, aahichimakela onlichini na amwacho. Munnawerya omoona veerukuni va. Aahikhuwela: ‘Daniyeli, murummwa a Muluku mukumi! Mulukwaa, yoowo onamurumeelaawe, oowerya woovuluxa weyo wa amwacho awo?’
‘Muluku aahimurumiha mungelo awe,’ aahaakhula Daniyeli, ‘nave aahiwala iyano sa amwacho awo, vawihiihaa wii hakikhuunre.’
Mwenoowo aahihakalala vancipale. Aahilamula okumihiwa Daniyeli mulichini mmo. Vanonto aahilamula wii achu oonanaraawo, yaawo yaachuna ohiyanano Danieli wii evonyeryiwe mwa amwacho. Ehiphinyeru vachayani, amwacho awo yaahiwaakhelela nave yaahipwexa makhuvaaya oothene.
Ovinyerya vavaa, Mwene Dariyo aahirepela wa achu oothenaawo mu omwene awe: ‘Kinnalamula wii oothene emuchichimiheke Muluku a Daniyeli. Owo onnapaka sootikiniha sitokotoko. Omvuluxa Daniyeli wuukhuuriwani ti amwacho.’
Daniyeli 6:1-28.