Taniyeli mu Nlici na Amwaco

Mwene mukina o Papulu aari Tariyu. Tariyu aamoona Taniyeli wi aari oochuneya. Owo aamvaha otokweene wa elapo. Yaakhalavo achu yaamukhalela Taniyeli nrima nave hiyaamuchuna. Awo yaasuwela wi Taniyeli aanamvekela Yehova ilukuluku raru mahiku oothene. Awo yaamuleela Tariyu eriki: ‘Mulamule wi achu oothene yoovekekeeni nyuwaano echu anachunaaya. Mahiku yaawo akhala muchu oni amvekeleke muluku awe ariheliwe munlicini orimo amwaco.’ Tariyu aasiveliwa ni miruku seiyo nave aahelavo nlamulo.

Taniyeli iiwaleiye sa nlamulo nlo, aavolowa mpa mwawe akokhora ohoolo wa exanela yoohuleya, nave aapacerya omvekela Yehova. Achu yaale a nrima yaavolowa mpa mwawe emphwanya avekelaka. Awo yaachimakela wa Tariyu emuleela eriki: ‘Taniyeli hanoocicimihaani. Owo onamvekela Muluku awe ikwaha raru mahiku oothene.’ Tariyu aanasiveliwa ni Taniyeli nave haachuna wi iiphiwe. Mahiku oothene owo anaavyaavya mukhalelo wi amvuluxe Taniyeli. Nyenya woona wi aahelavo nlamulo, owo haawerya otoroka. Aalamulela wi Taniyeli ariheliwe munlici na amwaco ooluwa.

Ohiyu yoole Tariyu aanamuupuwela Taniyeli ahinawerya orupa. Wooxixelo ene, aaya o nlici anamwiichana Taniyeli ariki: ‘Akhweya Muluku aa oowoopola?’

Owo aahiwa nsu. Nsu nlo naari na  Taniyeli. Taniyeli aamwaakhula Tariyu: ‘Muluku aka oomuruma munkeelo awe nave oomaka eyano ya amwaco wi ehikiphoreihe.’ Tariyu aatepa ohakalala! Alamulela wi Taniyeli avihiwemo munlici. Taniyeli aakhuma ahiphoren’ye. Vano mwene aalamulela: ‘Achu ale yaamusomenle Taniyeli eriheliwe munlici na amwaco.’ Vaavaa awo yariheliwayamo yaakhuriwa.

Tariyu aatikitherya nlamulo wa achu awe: ‘Mmucicimiheke Muluku Taniyeli onamweepeseiye. Owo omvuluxa Taniyeli wa amwaco.’

Weyaano onnavekela wa Yehova mahiku oothene ntoko Taniyeli?