MWAHA 81
Ororomela Mwa Yookhaviherya Ya Muluku
ACHU vakhiviru-khiviru 50,000 yaahipaka mukwaha woorekama ovinyerya o Paapulu oya o Yerusalemu. Nyenya, voophiya weiwo, Yerusalemu aari mileperu pahi. Haavovo akhalamo. AIsarayeli yaaphwanelela otekatho eri yoothene.
Emoha ya ichu soopacerya yaatenkaaya yaari eyupo ya ephepa. Ti nipuro onawerya opakiwavo sooveleela nari samahala sa inama wa Yehova. Miyeeri sawaalakhanyeya vachuli vaya, yaahipacerya oteka empa ya Muluku. Nyenya amwiicani yaawo yaakhala mu ilapo sawaachamanano hiyaachuna hiiho. Yaahiwoopopiha, wii eweemexe. Vookuchula vaya, amwiicani awo yaahiwerya wii mwene ahihano a o Persiya apake nlamulo na ohiiha mutekoowo.
Waahiviravo iyaakha 17 ovinyerya vavaa aIsarayeli yaakhumalaaya o Paapulu. Yehova aahaarumiha alipa a miririmu awe Ageu ni Zakariya wii yaaleele achwaawo wii epaceryetho oteka iwo. Achwaawo yaahiroromela mu okhaviherya wa Muluku nave yaahiwiiwelela alipa a miririmu awo. Yaahipaceryatho oteka iwo, nari ori wawii mwa nlamulo hivaaweryeya weerano hiihaa.
Aahirwanto vano nahota mmoha musinaPersiya, awiichaniwa Tatenai, akohaka wii aIsarayeli yaateka empa ya Muluku eyo mu olamulelo wawani. Awo yaahimuleela wii Mwene Koresi taalamuleenle vavaa yaakhumaaya o Paapulu: ‘Haweni o Yerusalemu nave mwateke empa ya Yehova, Muluku anyu.’
Tatenai aahirumiha ekarata o Paapulu, akohaka warimwii Koresi, yowo eera akhwiiyeene, aahaaleela tchiri hiihaa. Mwene ahihano a o Persiya mwawaakuveya aahirumiha ekarata, alocaka wii Koresi aahilocha chiri hiihaa. Aahirepa: ‘Aahiyeeni aIsarayeli eteke empa ya Muluku aya. Nave miyo kinnalamula wii mwaakhaviherye.’ Empa ya Muluku eyo yaahimala mu iyaakha xexe, nave aIsarayeli awo yaahihakalala vancipale.
Waahiviravonto vakhiviru-khiviru iyaakha 48 ovinyerya vavaa empa ya Muluku eyo yaamanlaaya. Achu a o Yerusalemu yaari oohaawa vancipale, nave epooma eyo ni empa ya Muluku eyo hisaari sooreera vancipale. Ari o Paapulu weiwo, muIsarayeli owo Estra aahisuwela sa ochuneya wa oreeriha empa ya Muluku eyo. Mano moosuwela yeeyo owo enriiye?
Estra aahiya wa mwene a o Persiya, Artaxerxes, nave mwene aphaama ola ahimvaha samahala sincipale wii ayeno o Yerusalemu. Estra aahiveka wii aIsarayeli o Paapulu iwo emukhaviherye okuxerya samahala iho o Yerusalemu. Awaakhwana 6,000 yaaheemereryanano. Yaahimukuxa parata muncipale, miivira ni ichu sikina sa esisapo yoowalamela.
Estra aahikachamiheya, nthowa nawii mphironi mwahikhalamo achu oonanara. Yaala yaanwerya omwiiya parata ni miivira, ni owiipha. Va nthowa nenla, Estra aahiwiichaniha achwaawo, ntoko munoonelaanyu veerukuni va. Vaavanto aahivekela wa Yehova, wii awiikiche mmukwaha woorekama wowo wooya o Yerusalemu.
Yehova aahiwiikicha. Nave, vachuli va miyeeri mixexe sa mukwahoowo, yaahiphiya phamene o Yerusalemu. Mano eyo henathoonyerya wii Yehova onnawerya owiikicha yaawo anaroromela mwa yoowo?
Estra ikapitulu 2 ophiyerya 8.