MWAHA 94
Owo Onnaasivela Asaanamwane
NKAMOONEENI Yesu amukhupaarelaka mwanoowo. Munnawerya woona wii chiryene Yesu onnaasivela anamwane. Alopwanaawo ananweha ti arummwaawe. Mano Yesu onaleela eheni? Hinkoni noone.
Yesu ni arummwaawe yaari erikimukookaru va mukwahani woorekama. Mphironi, arummwaawo yaahivaanyihana yaawo-yaawo. Va nthowa nenla, Yesu aahaakoha: ‘Mwaavanyihana xeeni m’phironi?’ Chiryene, Yesu aanasuwela yeeyo awo yaaloncaaya. Nyenya aahikoha wii oone yeeyo arummwaawo yiiryaaya eloce.
Arummwaawo hiyaakhunle, nthowa nawii yaahivanyihana muramphani, sa taani ori mutokweene aya. Arummwa akina yaachuna okhala oochuneyaxa wapwaha akina. Mano Yesu aaleenle mwawiihai wii hori waphaama ochuna okhala mutokweene?
Owo aahimwiichana mwaamwana nave aahimweemexa vamiithoni vaya. Vanonto aahi wa oohuserya awe: ‘Kinachuna musuwele wii, mwaahirukunuwa ni okhala ntoko asaanamwane, himurwa mvolowa mu omwene wa Muluku. Mutokweene mu omwenoowo ti yoowo onakhala ntoko mwaana ola.’ Mano moosuwela nthowa nene Yesu aalochenliiye eyo?
Ahe, asaanamwane hanuukhuwa ochuna okhala atokweene nari ochuneyaxa wapwaha akina. Va nthowa nenla, arummwaawo yaanaphwanela ohuserya okhala ntoko anamwane ni ohiwanelaka okhala atokweene nari oochuneya.
Yesu aahithonyeryatho mu ikwaha sikina sa mummo aasiveleliiye asaanamwane. Miyeeri mikavi vachuli vaya, achu akina yaahaaruuha anamwanaaya wii emoone Yesu. Aruummwaawo yaahichuna waaviihavo. Nyenya Yesu aahi wa yaawo: ‘Hiyani asanamwane orwa wa miyo nave muhaahiíhe, ntakhara omwene wa Muluku ori wa awihiihaa.’ Ovinyerya vavaa, Yesu aahaakhupaarela anamwanaawo nave aahaareeliha. Mano hori waphaama osuwela wii Yesu onnaasivela asaanamwane?
Mateyu 18:1-4; 19:13-15; Marko 9:33-37; 10:13-16.