Yesu Onnalopola Vooloca sa Okwaculiha ni Yoocheka

Yesu oomala wooniherya moonelo yoowo amuhuserya awe anaphwanelaaya okhalano. Awo anaphwanela wiisoonaka ntoko anamwane, awiiyeviha ni oohichuna ovuwa. Oohuserya anaphwanela ‘omwakhela mwana si yola wa nthowa na nsina nawe, nave hiha anamwakhelatho Yesu.’—Mateu 18:5.

Elukuluku vakhaani muculi, amuhuserya aavaanyihana vooloca sa taani ori mutokweenexa, nthowa na yeela akhweya amuhuserya anuupuwela wi Yesu onamwaalaka. Vanonto Yohani onnaloca echu ekina yeeyo yeeren’ye: ‘Muhusiha, nomona mutxhu onakumiha [masololo] mwa nsina nà ni nàkhwela omuhiha, ntakhara owo hanakhala ni hiyo.’—Luka 9:49.

Apwanne Yohani onuupuwela wi amuhuserya pahi tarino oophwanelela wa waapenuxa achu a wiiceliwa naari wiikara masololo? Waakhanle wi ti yeeyo, ntakhara heeni Muyuta ola onaweryeiye wiikara masololo? Akhweya Yohani onuupuwela wi mulopwana owo hanaphwanela ophara miteko sootikhiniha nthowa nawi hanamuchara Yesu naari amuhuserya.

Mu naakhulo noohiwehereryeya wa Yohani, Yesu onnaloca: ‘Muhimuhihe, ntakhara khavo mutxhu onawerya wikara [masololo] mwa nsina naka, akòka analotxa sonanara wa miyano. Mutxhu ohiri mwitxana ahu ori ni hiyano. Mutxhu oni ovaheni ekahi ya mahi wa nthowa na miyano, ntakhara mwa amuhuseryaka, kinnolèlani wi yowo hayelela nlivelo nawe.’—Marko 9:39-41.

Ophiyerya elukuluku yeela mulopwana hanaphwanela omuchara Kristu wi akhale makupa awe. Woona wi muloko Weekristu nlelo hokhanle, mwawiihiiha nthowa na mulopwana ole ohimuchara Yesu henataphulela wi toonanara murima naari wi mwiicani naari wi onavuwiha mahusiheryo atheru. Mwawooneya mulopwana ookhalano nroromelo mu nsina na Yesu, nave orweela mwa yeeyo Yesu olonceiye, ennooniherya wi mulopwana owo hani ayeleele nlivelo nawe.

Mmukhalelo mukina, yahaala okhala yawoopiha waakhanle wi mulopwana ole okwaculeya moorweela wa masu naari saweera sa amuhuserya. Yesu onnaloca: “Nave mutxhu onamukwatxuliha mwana mukhani awi si yola onakemererya miyo, yaphama yari amakeleliwe musikoni nsilo, ariheliwe mphareya.” (Marko 9:42) Voocharela, Yesu onnaloca wi ti yaphaama wa amuhuserya awe oyeleela makupa a mwiili oochuneya ntoko ntata, nnaani, naari meetho wakhala wi annaakwaculiha. Ti yaphaama ohikhalano ichu seiha soochuneya ni ovolowa mu Omwene wa Muluku, ohiya okhalano soothene nave oriheliwe o Kehena (Mpopa wa Hinom). Moohikhwa minikwa, arummwa aasuwela mpopa yoola ori waacamela o Yerusalemu weiwo sineeyeliwawo ikokhola, mwawiihiiha awo anniiwexexa wi eyo enasiphela otoloxiwa woomalela.

Yesu tho onnaalopola: “Muhimunyemule mmoha mano wa anamwane ala, ntakhara miyo kinnolèlani wi ankelo aya, wirimu, annona ethoni ya Atithi aka ari wirimu.” Esisapo taani “anamwane ala” aryaayano wa Atiithi awe? Yesu onnaloca niphwanaphwaniho na mulopwana orino ipucepuche nsana nave erimeela emoha. Mulopwana onnahiya makhumi mathanu nameeli ni ipucepuche thanu neeli wi aavye emoha erimenle, nave vaavaa onaphwanyeiye onnahakalalano opwaha ihe makhumi mathanu nameeli ni ipucepuche thanu neeli. Yesu onnaaceererya: “Hihatho ti okhwela wa Atithinyu ari wirimu wi nari mmoha wa anamwane ala ahirimele.”—Mateu 18:10, 14.

Akhweya uupuwelaka sa ovaanyihana wa amuhuserya awe vooloca sa taani onahaala okhala mutokweenesa, Yesu onnaaceenyerya: “Mukhaleno màkha mwa nyuwo, ni mukhale ni muretxele mukina ni mukhwawe.” (Marko 9:50) Maakha annasiviha yoolya. Maakha oosiphela anneeriha okhala wookhweya weemererya yeeyo akina analocaaya nave ennakhaviherya otikitherya murecele, ichu seiho sihinaweryeya moorweela wa ovaanyihana.—Kolosi 4:6.

Moovira wa elukuluku, miyaha mitokweene sinahaala okhumelela, nave Yesu onnaaleela mukhalelo wa ovootha. Yesu onnaloca: “Mukhwa-à otxhekelà, hawè, wamulake okhwipi muriwo apiliru. Awiwelelà, womukokiherya mumphironi mwaphama.” Hanka wakhala wi hawiriyanne? “Wawope atxhu akina apili nari araru.” Wakhala wi nlelo mwaha homanle, awo anaphwanela oleela “ekresya” naari muloko, ela tiwi, asitokweene yaawo arino murici wa opaka soolakelela. Hanka wakhala wi mulipa oocheka owo nlelo hanacharuwa? “Akhale ntoko mmalapo nari mulipa a musokho,” achu yaawo Ayuta yaheeraaya epakeno onthamwene.—Mateu 18:15-17.

Atokweene a mmulokoni anaphwanela opharihela Masu a Muluku. Wakhala wi awo annoona wi mulipa oocheka onaphwanela olakiwa, othoriha waya ‘onarwa omakiwa wirimu.’ Nyenya wakhala wi muchu owo haano nthowa, owo ‘onarwa ataphuliwa wirimu.’ Malakiheryo ala yaahaala okhaviherya muloko Weekristu omanle opakeya. Mu soocheka seiyo itokotoko, Yesu onnaloca: “Vava aneraya ethukumanevo atxhu eli nari araru mwa nsina naka, miyo kiri veriyari vaya.”—Mateu 18:18-20.