MWAHA 100
Yesu Mmacani
EKHUMAKA mu empa ya vasulu, Yesu ni arummwaawe yaahirowa mu emaca ya Getsemane. Yaanayawo wiiwo wiili-wiili. Vanonto Yesu aahaalamulela wii ehirupe nave wii evekeleke. Vavaa, aahisusa vakhaani nave aahuurama wii avekele.
Vachuli vaya, Yesu aahikookela wiiwo waari arummwaawe. Mano munnupuwela wii awo yeera eheni? Yaamurupa! Vararu Yesu aaleelaka wii ehirupe, nyenya ekwaha eri yoothene vookooka aaphwanya erupaka. ‘Munawerya hai okona elukuluku ntoko ela?’ aahaakoha Yesu mu ekwaha yookuchulela. ‘Yoophiya elukuluku yawii kiveleeliwe wa amwichani aka.’
Mu elukulukweene yeeyo waahiiweya onyakula wa muloko mutokotoko wa achu. Ahe, yaahirwa achu ni malema ni ikopo! Nave yaahikuxa mithiko wii imwaleeleke. Vawaachamela, mmoha a yaawo aahihoolela nave aahiphiya wa Yesu. Aamunuula Yesu, ntoko munaweryaanyu woona va. Muchuuwo aari Yuutase Isikariote! Mano ntakhara heni amunuunliiye Yesu?
Yesu aahikoha: ‘Yuutase, weyo onakiveleela ni okinuula?’ Aayi, onuula waari eneneeryo. Waahipakiha achwaawo yaari ni Yuutase osuwela wii Yesu tuvi, muchu yoowo awo yamuchunaaya. Hiihaa, amwiicani a Yesu yaahaakuveya nave yaahimphara. Nyenya, Petro haachunne wii aahiye emphare Yesu ohiwaniwevo ekhoco. Aahisolola nlema aariiyeno nave aahivonya wa muchu aari vakhiviru vawe. Nlema nlo hinaaphwannye muru awe, nyenya naathikinle naru. Nyenya Yesu aahitannya naru na muchuuwo nave aahipenuxa.
Yesu aahi wa Petro: ‘Nkakokiha nlema naa mu nrupeloni’mmo. Akhweya onuupuwela wi nkiwerya ovekela Atiithaaka angelo masana masaneene wi ekivuluxe?’ Aayi, owo anwerya! Nyenya Yesu haavenke wa Atiithi awe wii yaarumihe angelo, ntakhara wii aanasuwela wii elukuluku yawii amwiicani awe emphare yaaphiya. Va nthowa nenla, aahaahiya wii emukuxe. Vanonto hinkoni noone yeeyo yeerenyee wa yoowo.
Mateyu 26:36-56; Luka 22:39-53; Yohane 18:1-12.