MWAHA 102
Yesu Mukumi
MANO munnasuwela wii muthiyanoola taani nave ni alopwana eli awo? Muthiyanoola ti Mariya a Magadala nthamwene a Yesu. Nave alopwana owara sawela awo ti angelo. Vavaa Mariya onawehiiyevo ti nipuro waiyaathiwevo muruchu wa Yesu. Nniichaniwa nihiye. Nyenya muruchuuwo worimela! Mano taani okunxe? Hinkoni noone.
Vachuli va okhwa wa Yesu, alipa a ephepa yaahi wa Pilato: ‘Vavaa Yesu aariiye mukumi, aariye wii onahaala ovinya vachuli va mahiku mararu. Ntakhara awe, lamulani wii nihiye nlo nlipeleliwe. Vawi akhweya oohuserya’we enarwe emwiya eloca wa achu wii aavinya wa alipo okhwa!’ Pilato aahi wii yaarumihe asurutatu o nihiyeni nlo.
Nyenya, wooxixelweene nihiku naneeraru vachuli va okhwa wa Yesu, mootutuxa, aahirwa mungelo a Yehova. Apirikixa nluku va nihiyenivo. Asurutatu awo yahoova vancipale, ehiichikinyaru. Vookuchula vaya, voovarerya mpuwa mwa nihiye mmo, yaahoona wii muruchuuwo wahirimela! Akina a yaawo yahirowa o epoomani wathoriherya alipa a ephepa sa yawereya ela. Mano moosuwela yeeyo awo yenraaya? Yahaalivela asurutatu awo wii yothe. ‘Locakani wi oohuserya’we yaarwa ohiyu emwiya, nyuwo murupaka,’ yaahi alipa a ephepa awo.
Athiyana akina yaawo yaari asinthamwene a Yesu yahirowa o nihiyeni iwo, nyenya hiyaphwannyemo echu. Mootutuxa, yahikhumelela angelo eli owara sawaarya. ‘Munavyerani Yesu va?’ yahikoha yaawo. ‘Owo oovihiwa. Thoriheryani ela wa oohuserya’we.’ Athiyanaawo yaavinya ni ochimaka, nyenya muchu mukina aahiwemexa. Mano moosuwela wii aari taani? Aari Yesu! ‘Thoriheryani ela wa oohuseryaawe,’ aahi yoowo.
Vavaa athiyanaawo yathorihenryaaya wa oohuseryaawo wii Yesu mukumi ni wii aamoona yoowo, awo hiyeemerenrye ela. Petro ni Yohane yaahivinya ni ochimakela o nihiyeni wii yoone, nyenya hiwaarimo echu! Vavaa Petro ni Yohane yaavinnyaaya erowaka Mariya a Magadala aahihala nlelo vavaa. Ti vaavanto owo voovarerya awonniiye angelo eli awo.
Mano moosuwela yeeyo yerenye ni muruchu wa Yesu? Muluku aahirimeliha. Muluku hamviinhe Yesu ni mwiili mmoha-moha yoowo wanama aakhwiliiyeno. Aahimvaha Yesu mwiili wahihano womunepani, ntoko yoowo angelo a wirimu aryaayano. Nyenya, wii Yesu athoonyerye wa oohuseryaawe wi ori mukumi, owo anaphwanela owara mwiili wawooneya, ntoko nniiryahu noonele.
Mateyu 27:62-66; 28:1-15; Luka 24:1-12; Yohane 20:1-12.