MWAHA 103
Mu Eruku Yowaliweene
VAVAA Petro ni Yohane yaavinyaya va nihiyeni na Yesu nlo enarowa, Mariya aahihala mekhiye. Aahipacerya wunla. Vachuli vaya, aahithurumela mpuwa mwa nihiye nlo ntoko noonenlahu mu eruku ya muchuli ele. Aahiwoonamo angelo eli! Yaahimukoha: ‘Onanlelani?’
Mariya ahaakhula: ‘Aavihavo Apwiya’ka, nave nkinasuwela wiiwo amwiyathilaya’wo.’ Vanonto Mariya aahirukunuwa, nave ahimoona muchu. Owo aahimukoha: ‘Onakhwela anii?’
Mariya oone wii muchuuwo aari mulipa a emaca ni wii taakunxe muruchu wa Yesu. Va nthowa nenla, aahi: ‘Mwaamukunxe yoowo, kileeleni wiiwo m’mwiyathilanyu’wo.’ Chiryeenento, muchuuwo aari Yesu. Aawanre mwiili yoowo Mariya ahaamusuwenliiyeno. Nyenya, vomwiichana nsina nawe, Mariya aahisuewela wii aari Yesu. Aahivinya ni ochimaka wii aaleele oohuseryaawo: ‘Kowona Apwiya!’
Vachuli vaya, vavaa oohuserya eli yaarowaya o wichokoni ya Emau, muchu mukina aahichananano. Yaari othanana vancipale ntakhara a wiiphiwa wa Yesu. Nyenya, vawecha ni yaawo, muchuuwo ahaathoriherya ichu sincipale sa m’Piipiliyani, seiyo saweerinhe okhala oohakararyeya. Vaavanto yemenlaaya wii elye, oohuseryaawo yaahimusuwela wii aari Yesu. Ovinyerya vavaa, owo aahirimela, nave oohuserya eli awo yaahikookela o Yerusalemu mwawakuveya, wii yaathoriherye arummwa sa iha.
Mu elukuluku ekina, Yesu aahooneyatho wa Petro. Akina voosuwela sa ela yahitikiniheya. Vavaa, oohuserya eli awo yaahiphiya o Yerusalemu nave yahaaphwanya arummwaawo. Yahaathoriherya wii Yesu ahiwoneela mphironi. Nave erikimuloca hiihaa, mano moosuwela yeeyo yeerenyee?
Nkavareryani veerukuni va. Yesu aahooneya mu eruku eyo, nari nsele naari nowaliweene. Oohuseryaawo yahakalanle mwawiihainto! Naari nihiku noohakalaliha mwawiihainto! Mano munnawerya walakhanyerya ikwaha kavi seiyo Yesu oonenyiye wa alipa omucharaawe? Mano mohalakhanyerya othanu?
Murummwa Tomasi haari vamoha ni yaawo vavaa Yesu oonenyiye. Awo yahimuthoriherya: ‘Nowona Apwiya!’ Nyenya Tomasi ariye wii aphwanela omoona Yesu wii aroromele. Ahe, mahiku mathanu na mararu vachuli vaya, oohuseryaawo yaari vamoha tho mu eruku yowaliweene vamoha ni Tomasi owo. Motutuxa, Yesu ahooneya oeruku eyo. Vanonto Tomasi ahemererya.
Yohane 20:11-29; Luka 24:13-43.