MWAHA 105
Ewehereryaka Mu Yerusalemu
ACHU ala munawoonanyu va ti omuchara a Yesu. Yaahiiwelela ekhalaru mu Yerusalemu. Nave, ewehereryakaru, oruma otokotoko wahisareya mpa moothemwene wakhala ntoko echeku etokotoko. Navento, makalume ntoko a mooro yaahooneya va muru wa oohuserya ori oothene vamekhiye. Mano munnoona mooro owo vasulu va ori oothene vamekhiye? Mano yeeyo entaphulela eheni?
Yaari yotikiniha! Yesu aari akookenleene wirimu, wa Atiithinya, nave aari amiinelaka munepa wawela wa Muluku wa oohuseryaawe. Mano moosuwela yeeyo munepa ola waatetheryenlaya weera? Oothene yapacerya oloca mu ilocelo sohiyana.
Ancipale, mu Yerusalemu, yahiiwa oruma wophwana-phwana ni echeku etokotoko nave yahirwa wii yoone yeeyo yeerenyee. Akina yaari a maloko makina, yaawo yarwenle efesta ya aIsarayeli ya Pentekoste. Yaari yotikiniha yawiihai nki wa yaawo! Yaahiwiiwa oohuseryaawo elocaka mu ilocelo saya vooloca sa ichu sotikiniha hiiho Muluku opankiiye.
‘Achu ala ta o Galileya,’ yaahi aleco awo. ‘Mano anawerya hai oloca mu ilocelo sohiyana, sa ilapo hiiho nyariwahumo?’
Petro ahaathoriheryanto sa iha. Ahiloca mwa masu oovuwa nave ahaathoriherya achwaawo sa okhwa wawe wa Yesu ni wii Yehova aahimviiha wa alipa okhwa. ‘Vano Yesu ori wirimu, ontatani noolopwana na Muluku,’ aahi Petro. ‘Nave owo amiinela munepa wawela wolakaniwa owo. Ti nthowa nene moonnanyu ni wiiwa sa sotikiniha iha.’
Ahe, vavaa Petro aalonchiiye iha, ancipale yaahithanana ni hiiho ereliwiiye Yesu. ‘N’ni nere xeni?’ yaahikoha. Petro aahi wa yaawo: ‘Charuwani nave patisiwani.’ Hiihaa, va nihiku nenle, achu awakhwana 3,000 yahipatisiwa nave yahikhala oomuchara a Yesu.