MWAHA 108
Mu Ephiro Ya O Damasko
MANO munamusuwela muchuuwo okonne vachayani va? Ti Saulo. Muupuwele wii ti yoowo aathokoronrye soowara sa yaawo yamvonye Stefano maluku. Nkoonani waarya iwo! Mano enereya ti heni?
Vachuli va wiiphiwa wa Stefano, Saulo ahihoolela mu waahocha-hocha oomuchara a Yesu. Aahivolowa empa ela ni ela, aapurulelaka awo vaate ni waawalela yaawo. Ancipale a oohuseryaawo yaahichawela o ipooma ikina nave yavira-vira elaleyerya wiiwo “michaka yaphaama.” Nyenya Saulo aarowa o ipooma ikina wii awavyavye oomuchara a Yesu. Aahirowa o Damasko. Aryeene vaphironi, yaaheererya echu yotikiniha:
Motutuxa, omwaleela wa wirimu waahimwaaryela Saulo. Owo ahuuwela vathi, ntoko nnamoonelahu va. Vaavanto, nsu naahi: ‘Saulo, Saulo! Nthowa sheni onakihochahochawe?’ Alopwanaawo yaari ni Saulo yaahoona waarya iwo nave yaahiiwa oloca wa masu, nyenya hiyaiwexenxe.
‘Mwaani Apwiya?’ aahikoha Saulo.
‘Kaa Yesu, yoowo onamuhochahochawe,’ naahi nsu nlo. Yesu aahiloca ela nthowa nawii Saulo aahochahocha oomuchara a Yesu, yeeyo yaphwanaphwana ni omuhoca yoowo.
Vanonto Saulo aahi: ‘Kinii kere xeeni, Apwiya?’
‘Nkavinya, hawe o Damasko,’ aahi Yesu. ‘Wiiwo onarwa-othoriheryiwa sawii werekeno.’ Vavaa Saulo aavinnyiiye ni okhunula miitho, haawenrye woona echu. Aahirwela evaasi! Vanonto alopwanaawo yaamphara ntata, evolowano o Damasko.
Yesu aalochanto vano ni mmoha a oohuseryaawe o Damasko, ariki: ‘Hananiya nkavinya. Hawe o nikhwaala naweriwa Noluluwela. Mu’mpa ya Yuuta, okohe sa muchu nsina nawe Saulo. Miyo koomuthanla yoowo okhala murummwaka avamekhiye.’
Hananiya aahiwelela. Amphwannye Saulo, aahimwiiyatherya matatawe ii: ‘Apwiya akiruma miyo wi wone’tho ni oosareya munepa waweela.’ Nave miithoni mwawe mwa Saulo mwaamora ntoko makakhale, nave owo aahiwerya woonatho.
Saulo aahiphariheliwa muteko mwakuru wii alaleyerye wa achu a maloko mancipale. Aahisuweliwa okhala murummwa Paulo, sa yoowo nnahaalahu osuwela sincipalexa. Voopacerya, hinkoni noonento yeeyo Muluku omurummiiye Petro weerano.
Saweriwa Tarummwa 8:1-4; 9:1-20; 22:6-16; 26:8-20.