Othanliwa wa Saulo

Saulo aari Muroma nnya aayariwe o Tarsi. Owo aari Nfarisi aasuwenle phaama Malamulo a Ayuta nave aanawiikara Akristu. Owo aanaphara athiyana ni alopwana ni owiikara mu ipa saya aavoliihaka mukalaposo. Owo tho aakhalavo vaavaa murummwa Stefano iiphiweiye.

Saulo haakhwaneliwa owiikara pahiru Akristu o Yerusalemu. Owo aaveka wi eemereryiwe oya o Tamasko wi aaphare Akristu. Saulo aacamelaka epooma, waarya otokweene waamuhuruwela ni aahuuwela vachayani. Ahiiwa masu eriki: ‘Saulo onakiikarelani?’ Saulo aakoha ariki: ‘Nyuwaano mwaani?’ Aahaakhuliwa: ‘Miyaano ka Yesu yoowo onamwiikaraawe. Oye ovolowe mpooma nave onamuleeliwa echu onaphwanelaawe weera.’ Mu elukuluku yeeyo, Saulo haawerya woona, nyenya aahooliwa wi avolowe mu epooma.

O Tamasko aakhalawo Mukristu iichaniwa Hananiya. Yesu aloca wa yoowo ariki: ‘Ovinye okuse mphiro oniichaniwa Wawookowa, wamwaavye mulopwana oniichaniwa Saulo.’ Hananiya aaloca ariki: ‘Pwiya koosuwela soothene sa mulopwana yoowo. Owo aanaawalela mukalaposo arummwa anyu.’ Yesu aloca ariki: ‘Hawe, ntakhara mulopwana owo koomuthanla wi alaleye nsina naka wa maloko mancipale.’

Hananiya aamphwanya Saulo ni aalocano ariki: ‘Saulo munnaka, Apwiya aakiruma ohula miitho aa.’ Elukuluku ene yeeyo Saulo aapacerya woona. Owo aahuserya vooloca sa Yesu ni aakhala oomuchara awe. Aapatisiweiye akhala Mukristu, Saulo aapacerya olaleerya mu sinakooka, vamoha ni Akristu akina. Onnawerya waanyiherya ti mwawiihai Ayuta yoonnaaya vaavaa Saulo aalaleeryeiye vooloca sa Yesu? Awo yaaloca eriki: ‘Tahi mulopwana yoola awiikara arummwa a Yesu?’

Saulo aalaleerya wa achu yakhala o Tamasko iyaakha raru. Ayuta yaanamwiica Saulo enachuna omwiipha. Nyenya vaavaa anna yaasuwenlaaya yaamukhaviherya ochawa. Awo yaamuhela mmucankani emukuruxa va exiri ya epooma.

Vaavaa Saulo aakeleiye o Yerusalemu, aahaaphwanya anna nave aakhala ni yaawo. Nnya awo yaanamoova. Murummwa mukina iichaniwa Parnapa aamukeriha wa arummwa nave aahaalekecha wi Saulo aatorokeya moomalela. Saulo aapacerya olaleerya michaka saphaama mwamvai ni muloko wa o Yerusalemu. Ohoolo waya aasuweliwa ntoko Paulo.