Mwene Oopacerya o Isarayeli

Yehova annaavaha Aisarayeli amuthoriha wi yaahooleleke, nyenya awo yaamuchuna mwene. Awo yaaloca ni Samuwele: ‘Onaavyerye mwene ntoko enereyaaya mwiilaponi.’ Samuwele uupuwela wi mwaha owo waari wooheseya nave aavekela wa Yehova vooloca sa yeeyo. Yehova aamwaakhula: ‘Achu hanookhoca weyaano nto anakikhooca miyaano wi kihaalamuleleke. Awo anamuchuna mwene, nyenya mwene owo onahaala waarumaka ichu sincipale.’ Nyenya achu yaanaloca: ‘Hooye nto hiyaano nnachuna okhalano mwene!’

Yehova aamuleela Samuwele wi mulopwana awiichaniwa Sawuli onahaala okhala mwene oopacerya. Vaavaa Sawuli aakeleiye omweecelela Samuwele o Rama, Samuwele aamuthanla Sawuli wi akhale mwene amucikichela makhurwa mmuruni mwawe.

Voocharela, Samuwele aawiichana Aisarayeli wi emoone mwene muvyaani. Nyenya awo hiyaamphwannye Sawuli. Woosuwela ntakhara heeni? Sawuli iipinthe oculi wa maphuta. Vaavaa aaphwanyiweiye aakuxiwa eemela variyari va achu. Sawuli aari oorakama waapwaha achu oothene nave aari ooreera. Samuwele aaloca: ‘Ti yoola Apwiya amuthanlilaya.’ Achu yaakhuwela: “Akhale mwene ahu!”

Wuupaceryani Mwene Sawuli aananwiriyana Samuwele ni omwiiwelela Yehova. Nyenya owo aatorokeya. Ntoko yootakiherya, mwene haaphwanelela ovaha mukucho. Mu ekhwa emoha, Samuwele aamuleela Sawuli wi aanweherye, nyenya Samuwele annalekela ophiya. Vanonto Sawuli aalakelela ovaha mukucho mukhateiye. Samuwele oonne hai? Aamuleela ariki: ‘Weenre ntoko mulolo! Hiwiiwelenle nlamulo na Apwiya.’ Apwanne Sawuli aahuseryavo echu mu yoohesa awe?

Vaavaa Sawuli aayeiye owana ni Amalaki, Samuwele aamuleela wi haaphwanela ohiya echu. Nyenya Sawuli aamuhiya ari mukumi mwene Akaki. Yehova aaloca ni Samuwele: ‘Sawuli ookinyanyala nave hiiwelenle masu aka.’ Samuwele aatepa onyeenyeya nave ahi wa Sawuli: ‘Woona wi wookhooca owiiwelela Apwiya, awo tho ahookhooca okhala mwene.’ Samuwele aarukununweiye wi apwahe, Sawuli aaphara niveru na malaya awe ni aahaahula. Samuwele aamuleela Sawuli: ‘Apwiya aawaakha olelo omwene.’ Yehova aamunnya omwene awe muchu yoole aamusivela ni omwiiwelela.