MWAHA 110

Timoteo—mulipa Oomukhaviherya Paulo

MMIRAVO munamoonanyu va ari ni murummwa Paulo ti Timoteo. Owo akhala o Lustra vamoha ni a echoko awe. Amannya yiichaniwa Yunike nave amunneni, Loisi.

Waari vano ekwaha yaneeraru yeeyo Paulo aaxekunryiiye Lustra. Opwaha vakhaani eyaakha emoha muchuli, Paulo ni Barnaba yahirowa wiwo va ekwaha yoopacerya m’mukwaha wa olaleyerya. Paulo ahikookelawo elukuluku ela ni Sila.

Mano moosuwela yeeyo Paulo amulenliiye Timoteo? ‘Onnachuna ochanana ni miyo vamoha ni Sila?’ aahimukoha. ‘Wamunikhaviherya olaleyerya wa achu a mapuro orekamela.’

‘Aayi,’ aahaakhula Timoteo. ‘Kinnachuna ochanana ni nyuwo.’ Hiihaa, elukuluku vakhaani vachuli vaya, Timoteo aahihiya echoko awe nave ahirowa vamoha ni Paulo ni Sila. Nyenya, nihakumve osuwela sa mukwaha aya, hinkoni noone yeeyo yeerenyee wa Paulo. Woviravo vano iyaakha 17 ovinyerya vavaa Yesu oonenyiiye wa yoowo mphironi ya o Damasko.

Muupuwele wii Paulo aarowa o Damasko wii aahochahoche oohuserya a Yesu, nyenya vano owotho aari oohuserya! Vachuli vaya amwiicani akina yaachuna omwiipha Paulo, nthowa na ohisiveliwa ni ohusiha wawe vooloca sa Yesu. Nyenya oohuserya yaahimukhaviherya Paulo ochawa. Yaamuhela mu nikali emukuruxa ni exiri ya epooma eyo.

Vachuli vaya, Paulo aahirowa olaleyerya o Antiokeya. Ti wiiwo oomuchara a Yesu mu ekwaha yoopacerya yiichaniwaya okhala aKristu. Paulo ni Barnaba yaahirumihawanto vano ovinyerya o Antiokeya mmukwaha wa olaleyerya mu ilapo sorekamela. Epooma emoha yaxekuryiwe yaari Lustra, wiiwo aakhaliiyewo Timoteo.

Vanonto, eyaakha emoha vachuli vaya, Paulo aahikookelawo o Lustra, mmukwaha wanawili. Vavaa Timoteo aachananniiye ni Paulo ni Sila, mano moosuwela wiiwo yakelaayawo? Vareryani vamapani wii musuwele mapuro makina ni makina.

Voopacerya, yaakeele o Ikoniyo awaacamanano owo, vachuli vaya o epooma ekina yawiichaniwa Antiokeya. Vanonto, yaahipaka mukwaha oya o Trowa, evirelela oya o Filipi, o Tesalonika ni o Bereya. Mano munnamoona Atene vamapani? Paulo aahilaleyerya wiiwo. Vachuli vaya yaahiviriha eyaakha emoha ni emeya elaleyeryaka o Korinto. Vookuchula vaya, yaahemela o Efeso, nave yakookela o Kaisareya ni Antiokeya, wiiwo Paulo aahanliiyewo.

Hiihaa, Timoteo aahecha mikwaha mincipale ni Paulo, amukhaviheryaka olaleyerya “michaka yaphaama” ni opaceryiha miloko mincipale yeeKristu. Vavaa nyuwo muniryanyu munnuwe, mano munahaala okhala murummwa ororomeleya a Muluku hiihaa ntoko Timoteo?

Saweriwa Tarummwa 9:19-30; 11:19-26; ikapitulu 13 ophiyerya 17; 18:1-22.

Makoho Oohuserya

[Maapa]

(Wi moone masu oothene areheryiwe,moone yoolaleeryiwa)

Roma

Melita

Tesalonika

Bereya

Korinto

Filipi

Atene

Krete

Trowa

Efeso

Mileto

Kolose

Antiokeya

Ikoniyo

Lustra

Antiokeya

Kupro

Damasko

Kaisareya

Yopa

Yerusalemu

ENIYA ETOKOTOKO (MEDITERAANEO)