Timoteo Aanachuna Waakhaviherya Achu

Timoteo aari mmiravo oohakalala mu waahusiha achu. Timoteo aaheeca mukwaha mmapuro oohiyana hiyana wi aakhaviherye akina. Nthowa na yeela, Timoteo aakhalano okumi woohakalalihaxa. Onnachuna owiriyana vooloca sa yeeyo?—

Timoteo unnunwe mu epooma yiichaniwa Lustra. Owo ari mmiravo, amunna awe Loisi ni amama awe, Yunike, yaahipacerya omuhusiha yoowo vooloca sa Yehova. Vaava Timoteo aapacenryeiye wunnuwa, owo aanachuna waakhaviherya akina ohuserya vooloca sa Yehova.

Vaavaa Timoteo aareiye mmiravo, Paulo aamukoha Timoteo wakhala wi anwerya weeca mukwaha ni yoowo mu olaleerya mmapuro makina. Timoteo aahi: ‘Aayi!’ Timoteo aaheemererya oya waakhaviherya akina.

Timoteo aaheeca mukwaha ni Paulo mu epooma ya Makedoniya yawiichaniwa Tesalonika. Wi eye weiwo, Paulo ni Timoteo yahaala weeca vancipale nave tho onwela mwaaceya. Emanleene weeca mukwaha, Paulo ni Timoteo yaahaakhaviherya achu ancipale ohuserya vooloca sa Yehova. Nnya achu akina weiwo yaanyeenyeya nave tho yaahaahooxa yaawo. Nto Paulo ni Timoteo yaahikhumavo nave eya olaleerya mmapuro makina.

Miyeeri mikina ohoolo, Paulo aahimveka Timoteo wi akookele o Tesalonika wi awoone anna. Waanachuneya olipa murima vancipale okookela mu epooma yeele yawoopiha! Nnya Timoteo aahiyawo nthowa nawi owo aanaapwacha anna yaari weiwo. Timoteo aahikookela wa Paulo ni michaka sa phaama. Anna o Tesalonika yaaneerano phaama!

Timoteo aahilapa ni Paulo mu iyaakha sincipale. Ekwaha emoha Paulo aarepa wi Timoteo aari muchu aphaama ahaala okhaviherya miloko. Timoteo aanamusivela Yehova nave tho aanaasivela achu.

We onnaasivela achu nave onnachuna waakhaviherya yaawo ohuserya vooloca sa Yehova?— Weerano hiiha, onahaala okhala oohakalala ni okumi aa onahaala okhala woohakalalihaxa, ntoko Timoteo!