MWAHA 116
Mummo Nniryahu Niwerye Okhala Ni Okumi Wawiikhalelaru
MANO moosuwela yeeyo mwaana mwamuthiyanoowo ni asinthamwene awe analakhanyaya? Aayi, ti liivuru yoola nyuwo munamwalakhanyanyu—Liivuru Aka a Myaha sa Piipiliya. Nave analakhanya mwaha ola va—“Mummo Nniryahu Niwerye Okhala ni Okumi Wawiikhalelaru.”
Mano moosuwela yeeyo anahuseryaya? Voopacerya, wii nnaphwanela osuwela sa Yehova ni Mwanawe Yesu, wii nikhale ni okumi wawiikhalelaru. Piipiliya onii: ‘Ela ti ephiro ya okumi woohimala. Huseryani vooloca sa Muluku mmoharu eeparipari ni vooloca sa Mwanawe yoowo amurummiiye veelaponi yavathi, Yesu Kristu.’
Mano nni niwerye hai ohuserya vooloca sa Yehova Muluku ni Mwanawe Yesu? Ephiro emoha tiyo mwa omwalakhanya Liivuru Aka a Myaha sa Piipiliya ovinyerya wupaceryani ophiyerya wukuchulani. Onnaloca vancipale sa Yehova ni Yesu kahiyo? Nave onnaloca sa makupa mamoha a ichu hiiho awo enraya ni hiiho anahaalaya weera. Nyenya, ninnaphwanela weera yoopwaha yohiyana ni omwalakhanyaru liivuru ola.
Mano munnamoona liivuru mukina owo ori vathi va? Ti Piipiliya. Mvekeni muchu mukina wii awalakhanyeryeni makupa a Piipiliya yaawo analoca sa myaha sa liivuru ola. Piipiliya onnanivaha solokoha soothene hiiho nnachuneleyahu wii nimurumele Yehova mu ephiro yaphaama ni ophwanya okumi woohimala. Va nthowa nenla, ninnaphwanela opaka okhala yokhovlelaahu ya omuhuserya Piipiliya ikwaha sincipale.
Nyenya, honakhwaanela ohuseryaru vooloca sa Yehova Muluku ni Yesu Kristu. Nnanwerya okhala ni osuwelaxa vooloca sa yaawo ni soohusiha saya, nave nari hiihaa nihakhele okumi woohimala. Mano moosuwela yochuneya ekina yawachereryeyavo?
Ninnachuneleyatho okhalaka ni okumi mopharihana ni hiiho nnahuseryahu. Munnupuwela sa Yuutase Isikariote? Owo aari mmoha a achu 12 yaawo Yesu aathanliliiye okhala arummwaawe. Yuutase aahikhalano osuwelaxa vooloca sa Yehova ni Yesu. Nyenya, mano tiheeni yeeyo yeerenyee wa yoowo? Owo aahirwela nrima nave aahimvelela Yesu wa amwiicani awe ni ikhorowa 30 sa parata. Va nthowa nenla, Yuutase haakhela okumi woohimala.
Mano munnupuwela sa Gehazi, muchu yoowo Mwaha wa 69 onthorihenryaya? Owo aachunne okhala ni soowara ni ikhorowa hiiho sahaari sawawe. Va nthowa nenla, aahootha wii aphwanye ichu sene hiiha. Nyenya, Yehova ahimulaka. Nave owo onahaala onlakatho hiyo, nahiniiwelela malamulo awe.
Nyenya, wahikhalavo achu ancipale aphaama yaawo yamurumenle Yehova mororomeleya. Ninnachuna okhala oophwanaphwana ni yaawo, kahiyo? Samueli oyevela owo ti yotakiherya yaphaama ocharela. Muupuwele wii vavaa nonnaahu Mwaha wa 55, owo arino pahiru iyaakha xexe nari thanu vavaa aapacenryiiye omurumela Yehova, mu tabernaakulu awe. Mwawihiihaa, kahi echu wii nyuwo muri oyevela mwawiihai, himuri oyevela wohiwerya omurumela Yehova.
Ti wawooneya wii yoowo nnachunaahu omuchara ti Yesu Kristu. Aryeene mmiravo, ntoko mummo Mwaha wa 87 othoonyenryaya, owo aahirowa o empa ya Muluku oya oloca wa akina sa Atiithinya a wirimu. Hinkoni ncharele yotakiheryawe. Hinkoni nloce wa akina ancipale sa Muluku ahu otikiniha owo Yehova ni Mwanawe, Yesu Kristu. Mwa weerano hiihaa, nnanwerya okhala ni okumi wawiikhalelaru mparadaiso ahihano a Muluku, veelaponi yavathi.