Masololo Annalipiha Ommwaryeela Muluku
Mano ntakhara heeni Satana ni masololo awe annalipiherya waawoka achu? Ti nthowa nawi anachuna wi niphitaaneno vamoha ni yaawo mu ommwaryeela Muluku. Anachuna wi naakokhoreleke yaawo. Anachuna wi neemereryeke sawootha saya nave neereke ichu inamunanara Yehova. Sincipale sa saweera sene seiyo inaphitaanyerya ni mihapo inavarihana ni achu ookhwa.
Muchu yoowo nnamusivelaahu akhwa, wiichela, nave eri yoophwanela okhala oothanana. Vachuli va okhwa wa nthamwenaawe Lazaro, Yesu “áhinla.”—Yohane 11:35.
Sookhalavo mihapo soohiyanahiyana soovarihana ni okhwa, nave seiyo siri soohiyana vancipale mu elapo yoothene. Mihapo mincipale seiyo hasinakhala soohiyana ni mahusiheryo a Piipiliya. Nyenya, saweera sikina sene, sinarweela mu mathipelo a miruku sawi achu ookhwa akumi nave annawerya owoona achu akumi. Orupelela muruchu, wuunla woohimaaliheya, meerelo a ovitha onakuxa ikhorowa sincipale, soothene iha sineeriwa nthowa na woova ohihakalaliha minepa sa achu ookhwa. Nave, vawoona wi muchu akhwa “miteko sawe uupuweleleiye sinnamala,” yaawo aneerano ichu sene seiya anakhaviherya wootha wa Satana.—Masaalimu 146:4.
Mihapo mikina nari masaala, inathipeliwa mu nroromelo nawi achu ookhwa annachuna okhaviheriwa ni achu akumi, nave wi anamwaahooxa achu akumi yaahimaalihiwa. Mu ilapo ikina ifesta ni mikucho sinneriwa mahiku 40 nari eyaakha emoha vachuli va okhwa wa muchu. Iha ineeriwa wi akhaviheriwe muchu ookhwa, oya o elapo yoohooneya ya minepa. Yaweereya ekina yinlanne ti ovaha yoolya ni soowurya wa achu ookhwa.
Ichu seiya ti soonanara nthowa nawi sinnakhaviherya sawootha sa Satana vooloca sa achu ookhwa. Mano Yehova onamuneemererya nakhalano ichu inapharihana ni mihapo ithipeliwe mu soohusiha sa masololo? Ohitonko!—2 aKorinto 6:14-18.
Akapuro a Muluku eeparipari haano makupa mamoharu mwa saweera seiya inakhaviherya sawootha sa Satana. Mu nipuro na iha, awo moosivela, annalipiherya waakhaviherya ni waahakararya achu akumi. Awo annasuwela wi muchu akhwa, Yehova pahiru tonawera omukhaviherya yoowo.—Yobu 14:14, 15.
Olosiwa Onnavaanyiwa ti Muluku.
Achu akinakweene, annaloca ni masololo mukhataaya, nari moorweela wa namulosiwe. Yeeyo eniichaniwa wi ti olosiwa.Wiisachiherya, ipiri, olowa, soolowa, okhwiri ni okoherya wa achu ookhwa—ichu soothene iha, makhalelo a olosiwa.
Piipiliya onnavaanya ichu seiya, ariki: “Ahiphwanyeye mwa nyuwo . . . muchu awiisachiherya nari awavyavya osuwela sa muhoolo, nari mukhwiri, nari muchu oolowa, nari oomukoherya namulosiwe.”—Detronomiu 18:10-12.
Mano ntakhara heeni Yehova onnanlopola mwawuupaxa moovaanyihana ni saweera seiya?
Yehova onanlopola moovaanyihana ni saweera soothene sa olosiwa, nthowa nawi onachuna wi nikhale phaama. Yehova onnaasivela achu, nave tho onnaathokororya yaawo, nave Yehova onnasuwela wi yaawo anaataana ni masololo moohikhala minikwa anahaala woona masooso vanthowa na yeeyo.
Muchu ohooxen’ye mwawihiihaa ti Nilda, aari namulosiwe o Brazil. Masololo yaahipahula okumi awe. Owo onnaloca: “Minepa iho . . . saanakivolowa miyo nave saanakilamulela. Miyo kaanakalano elukuluku kaasuwelaaka echu ni elukuluku kahaasuwelaaka echu eri yoothene. Nave kahirowa o esipitali nthowa na erecha ya mawuupuwelo. Masololo yaakihooxa vancipale ophiyerya kikhala awiicheliwa. Kahipacerya olya mirece sooruha ikhove, nave owurya ni omulya soona moohihiyererya. Iha saakuxa iyaakha sincipale.”
Moovira wa elulkuluku, mookhaviheriwa ti Yehova ni Anamoona a Yehova, Nilda aahitaphuwa mwa ovoloweliwa ni masololo nave hihano onakuxa okumi wooreera ni wooreela. Nilda onnaloca: “Miyo kinnalipiha wa achu oothene wi ehikhaleru awaataana ni minepa [soonanara] mu elukuluku neemoharu mano.”
[Eruku va epaaxina 19]
Mihapo mikina irino mathipelilo awootha wi achu ookhwa annawera onoona
[Eruku va epaaxina 20]
Mihapo mikina irino mathipelo awootha wi achu ookhwa annachuna okhaviheriwa ni hiyo
[Eruku va epaaxina 21]
Muluku onnavaanya ichu seiya soonanara. Muluku onachuna wi alapeliweke yooworu pahiru.—Eksodo 20:5
[Iruku va epaaxina 22]
Yaawo aneerano sa olosiwa mu ikwaha sincipale annahooxeya. Awo annarimeeliwa ichoko saya, oneethi aya nave tho annayeleela okumi aya