Mmurumeele Yehova, Omuhiya Satana

Oothene hiyo nookhalano yoothanla wi neere. Akhweya nnahaala omurumeela Yehova nari omurumeela Satana ni masololo awe. Hiyaano nihikhale oothanla soopiili. Ti echu yamiruku mwawiihayi nki okhala oomurumeela Yehova!

Yehova Taphaama

Ntoko noonenlaahu, masololo annasiveliwa wahooxa ni waawoka achu. Yehova tahi awihiihaa. Yehova onnasiveliwa ni achu ntoko tiithi onaasiveleiye anamwanaawe. Yehova tonavaha “yamahala yaphama, ni phatamari óphameya.” (Yakobo 1:17) Yehova hanawateela echu eri yoothene yaphaama wa achu, nari esisapwaaya ekhanle yoowalamela wa yoowo mkhatiye.—aEfeso 2:4-7.

Nkuupuwelani ichu seiyo Yesu, Mwaana a Muluku, eenreiye mu elapo yavathi. Yesu oheerano wi achu yahaaloca yuulume nave avaha woona achu eevasi. Ahaapenuxa amarecha ni oorakala. Ahikumiha masololo nave ahipenuxa irecha sa miloko soothene. Moorweela wa ikuru sa Muluku, Yesu aphiyerya tho waaveiha achu ookhwa.—Mateyu 9:32-35; 15:30, 31; Luka 7:11-15.

Ohiya oloca sawootha wi anihuwelihe, Muluku onnaloca eeparipari okhalawookhala. Muluku hatonko omuwoka muchu.—Numero 23:19.

Sepani Saweera Soonanara

Hiihaa ntoko ekarasi ya ratasi ennapata ekulihi, masana masaneene a achu, ari oophariwa mu woova sa malavi ni sawootha. Annawoova achu ookhwa. Annoova masololo. Annoova ipahu, oloiwa, soolowa ni okhwiri. Annapakiwa akapuro wa soororomeliwa ni mihapo inathipeliwa mu sawootha sa Satana, Musaserya. Arummwa a Muluku hanaphareya mu echu nari emoharu wa seiya.

Yehova ori aikuruxa ompwaha Satana. Mwamurumeela Yehova, Owo onanwiikichaani moovaanyihana ni masololo. (Yakobo 4:7) Okhwiri honi owerye woovolowelaani nyuwo. Ntoko yawooniherya, o Nigéria, anamuku araru aikuru yaaherano sookhwiri wi emwiiphe Namoona a Yehova mmoha aakhoonce othaama va epoomani vaya. Vaavaa sookhwiri saachompalaaya, namuku mmoha a yaawo ahikhala awoova, nave amwaavyavya Namoona a Yehova, nave aahinveka okhurumuweliwa.

Masololo yoothannyaani, munahaala omwiichana Yehova muromolaka nsina nawe, nave Yehova onahaala owiikichaani. (Proverpio 18:10) Nyenya, wi mukhale awiikichiwa ti Muluku, onakhweleya wi mutaphuwe chiryene mu saweera soothene iri soopharihana ni olosiwa ni wepesa masololo. O Efeso a khalai, achu yaamukokhorela Muluku yaheerano hiihaa. Yahaathukumanya aliivuru aya oothene awiisachiherya nave eweeyela. (Saweriwa Tarummwa 19:19, 20) Arummwa a Muluku olelo anaphwanela weera emohamoha. Taphuwane wa iphiri, ichu inavaha “ekari,” okhwiri, aliivuru awiisachiherya ni soothene sinapharihana ni saweera sa onamulosiwe.

Charani Malapelo Eeparipari

Mwaachunaka omuhakalaliha Muluku, honaakhwana pahiru okhooca malapelo awootha ni ocharuwa weera ichu soonanara. Onachuneya muchare mwamvai malapelo aweela. Piipiliya onnooniherya tiheeni enachuneya:

Thukumanani ni Anamoona a Yehova

Satana ni masololo aakhalano achu veelaponi yavathi anahusiha, nave aneera ichu soonanara. Nyenya, Yehova tho ookhalano achwaawe. Awo ti Anamoona a Yehova. (Yesaya 43:10) Mu elapo yoothene, aakhalavo Anamoona a Yehova opwaha amilyawu athanu nammoha. Oothene awo annaavyavya mwakuru weera ichu saphaama ni waahusiha achu eeparipari. Mu ilapo sincipale, munahaala waaphwanya mu Empa ya Omwene, mummo anahaalaya owaakhelaani ni mata meeli.

Mutekwaaya ti waakhaviherya achu mu omurumeela Muluku. Anahaala omuhuserya Piipiliya ni nyuwaano vaate vanyu, yookhaviheryakaani ohuserya omulapela Yehova mu mukhalelo waphaama. Hamuni mulivele echu ntakhara yeeyo. Anamoona a Yehova annakhala oohakalala mu ohusiha eeparipari, ntakhara annaasivela achu nave tho annamusivela Yehova Muluku.

[Eruku va epaaxina 23]

Yesu, Mwaana a Muluku, ohooniherya waasivela achu, mu waapenuxa irecha saya

[Eruku va epaaxina 24]

A Efeso aweeyela alivuru aya awiisachiherya

[Eruku va epaaxina 25]

Phiyani mmithukkumanoni yeeKiristu.—aHebri 10:24, 25

[Eruku va epaaxina 25]

Muhuseryeeni Piipiliya.—Yohane 17:3

[Eruku va epaaxina 26]

Laleeryani wa akina.—Mateyu 24:14

[Eruku va epaaxina 26]

Patisiwani.—Saweriwa Tarummwa 2:41

[Eruku va epaaxina 26]

Vekelani wa Yehova.—aFilipi 4:6, 7

[Iruku va epaaxina 27]

Anamoona a Yehova anamookhaviheryaani mu omurumeela Muluku