Mano Taani Shashasha Onlamulela Elapo?

Achu ancipale yahaala waakhula nikoho na vasulu va ni nsu nimoha—Muluku. Nyenya ori wosuwanyeya wii haavo makupa ari oothene Piipiliya onachichimiheriiyevo wii Yesu Kristu nari Atiithi awe ari olamuleleenesha a elapo ela. Mohiyana, Yesu aariye: “Mutokwene a elapo ela ya vathi anarwa-arihiwa vate hihano.” Nave ahachererya ariki: “Mutokwene a elapo ya vathi annorwa: nave hanono etchu mwa Miyo.”—Yohane 12:31; 14:30; 16:11.

Mwawihiihaa, olamulela a elapo ela onnavaanyihana ni Yesu. Mano olamulelowo onahaala okhala taani?

Mikhalelo Yeelapo Sinnavelela Soothonyerya

Mohithokororya echu sa sawererya-eererya sa achu okhala ni sawupuwela saphaama, elapo yokhala ehawaka ni sokachamiha sawoopiha mu oovuwa waya woothene. Hiihaa sinnapakiha wii achu awupuwelela wii ekoheke, ntoko mummo erenliiye orepa ishornale okhwiye David Lawrence: “‘Murechele veelapo yavathi’—vakhiviru-khiviru elapo yoothene enachuna yoowo. ‘Watana waphaama ntakhara a achu’—vakhiviru-khiviru achu oothene a elapo ela annachuna monelweene yaawo wa mukina ni mukhwaawe. Vanonto, tisheni yeeyo echekenye? Mano ntakhara sheni ikhoco inopopihaya mohithokororya echu sa sochuna soyariwano sa achu?”

Sinoneya okhala sohiyana, mano kaahi hiihaa? Vava oryaya wawii yochuna yamapachusheryo ya achu eri ya okhala vamurecheleni, awo wiili-wiili anniichana ni wiphanana—nave ni nlala vancipale. Nkupuwelani wiphana wotepano wa nrima woyeha nikhami. Achu apharihela muteko mwishi wawiipha, mikocha yohosheriwamo, makalume amoro ovonyiwa, apompa a mooro napalm ni iphiro sikina sanlala sohosherya ni wiphana mukina ni mukhwaawe mohimoriwa ikharari.

Mano munnaroromela wii achu, yaawo anachuna murechele ni otheya, ari oowerya, mwa yaawo mekhaaya, weera soonanara sitokotoko wa akina? Mano ti ikuru ivini hiiho inaatetherela achu weera ichu soonanara sawihiihaa, akhweya watetherela ovolowa mmukhalelo yoowo anakhalaya awakeleliheya weera nlala nawihiihaa? Mano montoko wiikoha elukuluku ekina wakhala wii sokhalavo ikuru sikina soonanara, sohoneya, hiiho inaalamulela achu weera ichu hiiho soonanara?

Olamulela a Elapo Ela Annasuwelihiwa

Honaphwanela wimona olikanyiherya, nthowa nawii Piipiliya onathonyerya mwawiiweya wii okhalavo muchu mukina amiruku, ohooneya, okhanle aholelaka voothene wiili achu ni maloko. Owo onii: “Elapo yothene ya vathi enakona mwa mulipa-onanara owo.” Nave Piipiliya onniiwanyeiha, ariki: “Yaweriwa musaserya ni Satana . . . enawoka elapo yothene.”—1 Yohane 5:19; Yawupulula 12:9.

Va elukuluku ekina, va “wi éhiwe ti Musaserya,” Yesu hanyihenrye muteko wa Satana ntoko olamulela a elapo ela. Piipiliya onnathoriha hiiho serenyee: ‘Musaserya aamukusherya Yoowo o mwakoni woorekama amoniherya omwene woothene wa elapo yavathi ni nchichimiho naya, ii wa yoowo: “Ichu soothene iha kinarwa koovahani nyuwo, mwakikokhorela miyo ni okithamala.” Vavo Yesu alocano: “Vinyavo, Satana!”’—Mateyu 4:1, 8-10, Tradução do Novo Mundo.

Nkupuwelani sa yeeyo. Satana ahimweha Yesu mwa omvaha ‘omwene woothene wa elapo yavathi.’ Nyenya mano, ovelela waweriwa ni Satana okaakhala chiryene yaweha waakhanle wii Satana haari oolamuleleenesha a mamwenene yaawo? Hooye, hiyahaala okhala yaweha. Vano nkoonani wii Yesu hakhonche wii ipooma soothesene ihe sa elapo saari sa Satana, yeeyo mweeparipari ahaliiye weera waakhanle wii Satana hano ikuru va iho. Mwawihiihaa vokhala, Satana, Musaserya, ori chiryene olamulela ohoneya a elapo! Va nthowa nenla, Piipiliya onnamwichana wii “muluku a mahiku yala a vathi vano.” (2 Akorinto 4:4) Nyenya mano, timwawiihai mummo muchu oonanara hiiha ophiyenriye okhala va mapuro a olamulelo yaala?

Muchu yoowo okhanle Satana aari mungelo opachushiwa ni Muluku, nyenya ahikhalela nrima mapuro a Muluku. Owo ahanyiherya oophwanelela wa olamulelo wa Muluku. Wii eereno hiihaa ahipharihela muteko enowa ntoko yolocela wii anwoke muthiyana opacerya, Haava, nave ahiwerya mwawihiihaa wii owo ni aiyawe, Aatamu, yenreno yeeyo owo achuniye, opwaha ni omwiwelela Muluku. (Mapacereryo 3:1-6; 2 Akorinto 11:3) Owo ahilochatho wii aahala oowerya ohuweliha nloko nothenene na Aatamu ni Haava, nenlo nahaala oyariwa ovihawo wa Muluku. Mwawihiihaa, Muluku ahivahavo elukuluku yawii Satana ererye ochichimiherya sooloca sawe, nyenya Satana hapwanhe.—Yobi 1:6-12; 2:1-10.

Yosuwanyeya tiyawii, Satana hanlamulela meekheiye elapo ela. Owo oowerya walekecha angelo akina ni opharihanano ommwarela Muluku. Yaala yahikhala masololo, asinthamwene awe omunepani. Piipiliya onnaloca sa yaawo va wachenyerya aKristu wii: ‘Ithipeleni vokhocha maphyakelo a musaserya. Ntakhara wi owana wahu hannawanano nikhami ni mwíli, nyenya ni otokwene, ni olamulelo a elapo ya vathi a epiphi yela, ni aminepa a yonanara mu sawirimu.’—Aefeso 6:11, 12.

Vanyihani Minepa Yoonanara

Olamulela yaawo a elapo ohoneya ni oonanara ari ochichimiherya ohuweliha muloko woothene wa achu, waahapusha va omulapela Muluku. Ephiro emoha mwa iphiro hiiho minepa yoonanara anerelaya yeeyo tiyo opharihela muteko eyupuwelo yawii wookhalavo okumi muchuli mwa okhwa, nari ori wawii Masu a Muluku annathonyerya mwawiiweya wii achu okhwa hansuwela echu. (Mapacereryo 2:17; 3:19; Ezekiyeli 18:4; Masalmo 146:3, 4; Eklesiasti 9:5, 10) Mwawihiihaa, munepa woonanara, otakiheryaka nsu na muchu okhwile, vakina vaya onahaala oloca ni ahima nari asinthamwene awe ari akumi, akhweya oorwela mwa omukoherya namulosiwe, nari oorwela mwa “nsu” novinyerya omapuro ohoneya. “Nsu” nlo nnakhala ntoko na muchu okhwile, nyenya mweeparipari ti nsololo!

Mwawihiihaa, wakhala wii nihiku nikina munahaala wiiwa “nsu” nawihiihaa, muhiwokeye. Mukhoche yeeyo nlo nnatchunaya oloca, muulule masu a Yesu awii: ‘Vinyavo, Satana!’ (Mateyu 4:10, NM; Yakobo 4:7) Muhemererye wii ochuna osuwela sa olamulelo womunepani wopakiheni okhala ophitanyeriwa ni minepa yoonanara. Ophitanyeriwa wawihiihaa onichaniwa olapela minepa, nave Muluku onnalopola omulapelawe osepa meerelo oothene a yaala. Piipiliya onnavaanyiha ‘ori oothene othokororya meeku . . . nari oomukoherya namulosiwe, nari awisachiherya nari okoherya wa achu okhwa.’—Malamulo 18:10-12; Akalatiya 5:19-21; Yawupulula 21:8.

Vawoona wii olapela minepa onnamukuha muchu vathi va yohapuwela ya masololo, mukhoche sawera saya soothene, mohithokororya echu sa mummo inahaalaya woneleya okhala sohakalaliha nari sohuhumusha. Merelwene yaala annaphitaanyeryavo ompharihela muteko pola ehako ya eweheryo, khavachira ovarerya misera sa mmatatani (quiromancia) ni washerya ehako mwa ovarerya itheneeri. Masololo annapakihatho onyakula ni ichu sikina samalavi sawoneya mu ipa hiiho anapakaya okhala mapuro aya okhala.

Opwaha yeeyo, minepa yoonanara sinnapharihela muteko mwa wiiphuchuliha yohapuwela ya ocheka wa achu, mwa opharihela muteko iliivuru, isinema ni maprokrama a televisau yaawo anathonyerya mikhalelo sa okonihana wohikhala wa mayareliwo. Masololo annasuwela wii mupuwelo oonanara, yakhala wii hanakumihiwamo mmawupuwelo, annapakiha sohapuwela wiikhalelaru nave sinnaakusherya achu weerano mararuwo—molikana ntoko mummo masololo asinenawo aneerelaaya.—Mapacereryo 6:1, 2; 1 Atesalonika 4:3-8; Yuda 6.

Ti weeparipari wii achu ancipale annanyemula eyupuwelo yawii elapo ela enalamuleliwa ni minepa yoonanara. Nyenya ohiroromela wene weiwo honaphwanela ontikhiniha, vawoona wii Piipiliya onii: “Satana mkhatiye annisoneiha ntoko mungelo ómwaléla.” (2 Akorinto 11:14) Owoka wawe wootepa wookhala wapakihaka ancipale evaasi mu eeparipari yawii owo ni masololo awe akhalawo. Nyenya muhiwokiwe! Musaserya ni masololo awe tiyawene, nave nyuwo munnaphwanela wavaanya awo mohihiyererya.—1 Petro 5:8, 9.

Yohakalaliha, nihiku nohaachamela nenlo Satana nnikhuuru nawe aniiraya ehikhalewo! “Elapo ya vathi [ophitanyeryavo oolamulelaaya oomasololo] ennavira,” Piipiliya onnachichimiherya, “nyenya yowo onerano okhwela wa Muluku onnikhalelaru okhala wokhala.” (1 Yohane 2:17) Ti ohakararya wawiihai manki yoowo onahaala okhalavo vavo yohapuwela yoonanara enahaalaya oviihiwavo! Mwawihiihaa, nikhale, veri va yaawo anerano yochuna ya Muluku niwii yahakalale ni okumi okhala wookhala mu elapo yahihano yekhaikhai ya Muluku.—Masalmo 37:9-11, 29; 2 Petro 3:13; Yawupulula 21:3, 4.

Wahimukhalavo yothonyerya ekina, masu oothene a m’Piipiliyani ophariwa vasulu va ti a mu sorepa sa eGriki sa m’Piipiliyani Nlakano Nahihano na Yesu Kristu Apwiyahu ni Masalmo. Sa mu eHebrini ti sa Tradução do Novo Mundo das Escrituras Sagradas​—⁠Com Referências ni Mapacereryo nave ni Masaalimu (Sociedade Bíblica em Moçambique).

[Eruku va epaaxina 4]

Mano Satana akahinvaha Yesu ipooma soothesene iho sa elapo sahaakhanle sawawe?