Mukhome ni Musaserya ni Mavyakelo Awe

1, 2. Taani anahakalala mu ilukuluku sa opatiso?

WAAKHANLE wi nyuwaano munnamurumeela Yehova opacerya khalai akhweya moowiriyana miyaha sincipale sa opatiso mmithukumano sahu sa ekulucu ni sa muceche. Naamwi hiiha, moohipwacha waaca wa ikwaha mwaaphwanyen’yaanyu mmithukumano seiyo, nyuwaano munnatannyeya murima vaavaa muneerelaanyu onamoona opatiso wa yaale anakiraathi ohoolo wi epatisiwe. Mweelukuluku yeeyo, alipa oowiriyana annahakalala nave voocharela annoopiwa makuphi moovuwa. Miithori akhweya annakhuma mmiithoni mwanyu vaavaa munoonaanyu nikhuuru na achu niiveleelaka wa Yehova. Elukuluku yeeyo ti yoohakalaliha chiryene!

² Hiyaano ninneerela onamoona opatiso va nipuro nahu, nyenya ankeelo aakhalano ekari ya weerela onamoona opatiso wa elapo yoothene. Munnawerya waanyiherya “otheya wirimu” vaavaa macikhwi a achu orukurerya elapo anavolowaaya mmarehereryo awooneya a Yehova isumana soothene? (Luka 15:7, 10) Moohikhwa minikwa ankeelo annahakalala vaavaa anoonaaya waaceereryeya yoola!​—Axeu 2:7.

MUSASERYA “NTOKO MWACHO AWUNLA, ANNECHÉCHA”

3. Ntakhara heeni Satana onneeceeca “ntoko mwacho awunla,” nave tiheeni onachuneiye weera?

³ Moohiyana, sookhalavo soopatuxiwa soomunepani sineerela onamoona opatiso moonyeenyeya. Satana ni masololo awe hanasiveliwa vaavaa anawoonaaya macikhwi emurunaka owo ni elapo ela yoonanara. Opwaha soothene, Satana aaloca wi haavo muchu onamurumeela Yehova nthowa na omusivela nave wi haavo aahaala okhala oororomeleya mu saweeha. (Mwaalakhanye Yupu 2:4, 5.) Ikwaha soothene vaavaa muchu oniiveleeleiye wa Yehova, Satana onnooneya okhala nawoothe. Eri ntoko wi Satana onaakhela makofi isumana soothene sa eyaakha. Tahi yootikhiniha wi “ntoko mwacho awunla, annechécha ni omwavyavya mukina wi ammirye!” (1 Pet. 5:8) “Mwacho” yoola onachuna onimirya omunepani, aneerihaka onanariha naari oyeleela onthamwene ahu ni Muluku.​—Salmo 7:1, 2; 2 Timoteo 3:12.

4, 5. (a) Mikhalelo taani miili soochuneya Yehova okukunceiye ovolowela wa Satana? (b) Tiheeni Mukiristu eeparipari onaphwaneleiye ororomela?

⁴ Naamwi nrino mwiicani awoopiha, hannaphwanela woova. Ntakhara heeni? Ntakhara wi Yehova ookukuca owerya wa “mwacho awunla” ola mmikhalelo miili soochuneya. Mikhalelo taani? Woopacerya, Yehova ooloherya wi “muloko mtokotoko” wa Akiristu eeparipari onahaala ovuluwa variyari va “yohósha etokotoko” enoorwa. (Yawupulula 7:9, 14) Sooloherya sa Muluku hasinahesa. Nthowa na yeeyo, Satana tho oosuwela wi hawerya waahuweliha achu oothene a Muluku.

⁵ Mukhalelo wanaawiili onaphwanyeya mu eparipari elociwe ni mulopwana oororomeleya akhalai. Mulipa miririmu Asariya aaloca wa Mwene Asa: ‘Apwiya ari ni nyuwano, nyuwano mwakhala ni yawo.’ (2 Matharihelo 15:2, BNM; mwaalakhanye 1 Akorinto 10:13.) Sootakiherya sincipale sinnooniherya wi khalai, Satana hatonko waahuweliha alapeli a Muluku yaawo yaari awaataana ni Yoowo. (Ahepri 11:4-40) Olelo, Mukiristu yoowo ori awaataana ni Muluku onahaala owerya okhoma ni Satana ophiyerya omvootha Musaserya. Chiryene, Masu a Muluku annanceenyerya: “Munamukhoma ni Satana nave owo onamutxhawa wa nyuwo.”​—Tiyako 4:7, BNM.

‘OWANA WAHU . . . NI MINEPA YONANARA’

6. Satana onawana hai ni Mukiristu mmoha ni mmoha?

⁶ Satana hawerya waavootha achu a Muluku ntoko nikhuuru, nave onanwerya ovootha wakhala wi noohiya olipelela wahu ntoko muchu. Satana oosuwela wi onahaala onimirya wakhala wi ooceecheiha onthamwene ahu ni Yehova. Owo oneerano ela mwawiihai? Moorweela wa omuhiphela muchu ti muchu, ni ohiphela woovitheya. Hankooni nthokororye mavyakelo yaala matokweene a Satana.

7. Ntakhara heeni Satana onnaaceererya owetha wawe waahiphela achu a Yehova?

⁷ Ohiphela woovitheya. Murummwa Yohane aaloca: “Elapo yothene ya vathi enakona mwa mulipa-onanara owo.” (1 Yohane 5:19) Masu ala aakhalano yoolopola wa Akiristu oothene eeparipari. Woona wi Satana oomirya elapo yoothene ya achu oohiiwelela, owo vano onateteiwa ni yaale amuchanwe​—achu a Yehova. (Mikeya 4:1; Yohane 15:19; Yawupulula 12:12, 17) Owo ookhalano owali otokweene ntakhara oosuwela wi elukuluku awe ehanle vakhaani. Mwawiihiiha onnaaceererya owetha wawe. Olelo ninnakumana ni ohiphela wawe woomaliherya.

8. Tiheeni murummwa Paulo aachuneiye oloca vaavaa aalonceiye wi nookhalano “owana” moovanyihana ni minepa soonanara?

⁸ Owaniha wa muchu mukhateiye. Murummwa Paulo aahaalopola Akiristu: “Owana wahu hannawanano nikhami ni mwíli, nyenya ni otokwene, ni olamulelo, ni yawo analamulela . . . ni aminepa a yonanara mu sawirimu.” (Aefeso 6:12) Ntakhara heeni Paulo aapharihela masu “Owana”? Ntakhara masu ala annavaha muupuwelo wa ekhoco ya vakhiviru-khiviru. Mwawiihiiha, Paulo opharihela masu yaala enooniherya wi muchu ti muchu a hiyo ookhalano ekhoco ni minepa soonanara. Waakhanle wi nnakhala mweelapo weiwo olapela minepa oryaaya wawunlaana naari hooye, nnaphwanela wuupuwela wi vaavaa niiveleenlaahu wa Yehova, hiyaano noovolowa mweekhoco yeeyo. Ovinyerya vaavaa, Mukiristu oothene ori mweekhoco yoohikhalano wiichuuwa. Tahi yootikhiniha wi Paulo aahoona okhala woochuneya waalopola Akiristu Aefeso ikwaha raru wi ‘ewerye withipela’!​—Aefeso 6:11, 13, 14.

9. (a) Ntakhara heeni Satana ni masololo annapharihela “maphyakelo” oohiyanahiyana? (b) Ntakhara heeni Satana onneererya onanariha muupuwelo ahu, nave nnii nivoothe hai wiilipixerya wawe? (Moone ekaaxa “Mwiikasope Wa Mavyakelo a Satana!”) (c) Mavyakelo taani mamoha nnahaalaahu othokororya hiihaano?

⁹ Mavyakelo awiipitheya. Paulo onnaaceenyerya Akiristu okhala oothipeleya ntakhara “maphyakelo” a Satana. (Aefeso 6:11) Muthokororye Paulo opharihela wawe masu “maphyakelo.” Minepa soonanara hasinapharihela mavyakelo mamoha nyenya oohiyanahiyana​—ni yoolakelela. Moovira wa elukuluku Akiristu yaawo yaari oororomeleya mu yaweeha yammoori yaacheka vaavaa yaakumannaaya ni yaweeha ekina. Mwawiihiiha, Musaserya ni masololo awe annavarerya mukhalelo wa mmoha ti mmoha a hiyo wi yoone sooceecheya sahu. Ohoolo waya, annapharihela oceecheya woomunepani akhweya nryaahuno. Ninnathamalela woona wi ninnawerya osuwela mavyakelo mancipale a Musaserya yaawo anuupululiwa Mpiipiliyani. (2 Akorinto 2:11) Omapacereryo wa liivuru yoola, noothokororya mavyakelo yaawo ntoko muraakho wa wiithukumanyerya, onthamwene woonanara ni okonihana woohiphwanelela. Hankooni vano nthokororye mavyakelo makina a Satana​—onamulosiwe.

ONAMULOSIWE​—MEERELO OOMWARYEYA

10. (a) Onamulosiwe tiheeni? (b) Yehova onoona hai onamulosiwe, nave nyuwaano munoona hai?

¹⁰ Moorweela wa opharihela onamulosiwe, muchu onniiwanana ni minepa soonanara. Ihako, okhwiri, masica ni oloca ni alipa ookhwa makhalelo makina a onamulosiwe. Ntoko nsuwenlaahu, Yehova onoona onamulosiwe ntoko ‘etxhu yothanyeya.’ (Malamulo 18:10-12, BNM; Yawupulula 21:8) Woona wi nnaphwanela ‘wichanano yonanara’ ti woophwanelela ohaavya opaka onthamwene ni minepa soonanara. (Aroma 12:9) Iwo waahaala okhala ommwaryeela Tiithi ahu a wirimu, Yehova!

11. Ntakhara heeni yaahaala okhala yoohakalaliha wa Satana wakhala wi oowerya oneeriha ovolowela onamulosiwe? Mphwanaphwanihe.

¹¹ Woona wi onamulosiwe ori ommwaryeela Yehova, Satana ori oolakelela oneeriha ovolowela. Ikwaha soothene Satana onamuhuweliheiye Mukiristu, owo onnahakalala. Ntakhara heeni? Muupuwele niphwanaphwaniho nla: Wakhala wi nakhoco mmoha oonanariha wiiwanana wa nikhuuru nawe nave avolowa mu nikhuuru na amwiicani, muhooleli a nikhuuru na amwiicani aahaala otepa ohakalala. Owo aahaala ompharihela mulipa oomwaryeya ole ntoko yawiirumihano wi amunyemule muhooleli a nikhuuru na mwiicani. Moolikana, wakhala wi Mukiristu oomorela mu onamulosiwe, onahaala omunyemula Yehova ni weemererya olamuleliwa ti Satana. Nkaanyiheryani ohakalala taani Satana aahaaleiye okhalano ni wiirumiha ntakhara mulipa oomwaryeya! Apwanne ookhala mmoha a hiyo aahaala ochuna omvaha Musaserya ovootha yoola? Hooye! Hiyaano hanri alipa oomwaryeya.

OPAKA MAKOHO OOTANNYA MINIKWA

12. Mavyakelo taani Satana onaphariheleiye wi ananarihe moonelo ahu vooloca sa onamulosiwe?

¹² Wakhala wi nootitelela othanya onamulosiwe, Satana harwa anivootha. Mwawiihiiha, owo onnaavya otoroka muupuwelo ahu. Mwawiihai? Owo onnaavyaavya mikhalelo wi awuukhule Akiristu ophiyerya akina woona wi “yonanara, yaphama nave yaphama, yonanara.” (Isaiya 5:20, BNM) Wi awerye weerano yeeyo, owo onapharihela mavyakelo awe akhalai​—opaka makoho ootannya minikwa.

13. Satana aapharihenle hai mavyakelo a opaka makoho ootannya minikwa?

¹³ Moone mukhalelo Satana aapharihenleiye mavyakelo yaala khalai. Mu Eeteni owo aamukoha Haava: “Txhiri Muluku oholèlani wi muhilyeke sawima sa miri iri mmatxani?” Mmahiku a Yupu, variyari va muthukumano wa ankeelo wirimu, Satana aapaka nikoho: “Apwanne Yupu onamurumeela Muluku mwa mahaleene?” Nave omapacereryo wa orummwa wa Yesu veelaponi yavathi, Satana aamwaakaaha Kiristu ariki: “Mwári Mwana a Muluku, nkalélani wi maluku ala ekhale ipau.” Nkaanyiheryani: mmwaha wa Yesu, Satana aahucukula masu Yehova aalonceiye isumana thanu nammoha oculi: “Ola ti mwanaka osiveliwa owo, mwa yowo kinnahakalala”!​—Maphatxuwelo 3:1, BNM; Yupu 1:9; Mateyu 3:17; 4:3.

14. (a) Vooloca sa onamulosiwe, Satana onapharihela hai mavyakelo a otannya minikwa? (b) Tiheeni nnahaalaahu othokororya hiihaano?

¹⁴ Olelo, Musaserya onnapharihela mavyakelo mamohamoha wi atannye minikwa vooloca sa woopiha wa onamulosiwe. Moohiciha owo oowerya otannya minikwa mmuupuweloni wa Akiristu akina. Awo yaapacerya waakaaha waakhanle wi makhalelo makina a onamulosiwe toonanara chiryene. (2 Akorinto 11:3) Nnii naakhaviherye hai achu yaala otoroka muupuwelo aya? Nnii neere hai wi mavyakelo a Satana ehinivolowele? Wi naakhule, hankooni nthokororye makupa meeli a okumi yaawo onaphitaanyeryeiye ni onamulosiwe: mathatelo ni oloola ekumi.

SATANA ONNAPHARIHELA SOOCHUNA NI SOOTHOWA SAHU

15. (a) Achu ancipale a ilapo soohico anoona hai onamulosiwe? (b) Akiristu akina avoloweliwe hai ni moonelo wa elapo vooloca sa onamulosiwe?

¹⁵ Xaxaxa mu ilapo soohico, masica, ni makhalelo makina a onamulosiwe anooniwa okhala aweemereryiwa. Ixilema, aliivuru, marehereryo a TV ni mathatelo a komputatore annavuwiha meerelo a masololo ekhalaka ntoko toohakalaliha ni aphaama. Ixilema ni aliivuru akina yaawo anacicimiherya masica tawunlaana ophiyerya yaale anasiveliwa ni seiyo annapaka mapuro a wooniha. Chiryene, masololo annawerya oyeviha woopiha wa masica. Apwanne moonelo yoola wa woona onamulosiwe ntoko echu yaweemereryeya onnaavolowela Akiristu? Muupuwelo wa akina woovoloweliwa. Mmukhalelo taani? Ntoko yawooniherya, Mukiristu amanle woona exilema yeeyo enavuwiha masica, owo onnaloca: “Miyaano kohoona exilema, nyenya nkipanke onamulosiwe.” Ntakhara heeni muupuwelo yoola ti wawoopiha?

16. Ntakhara heeni ti yawoopiha othanla mathatelo anavuwiha meerelo a masica?

¹⁶ Naamwi orivo ohiyana variyari va weerano ni woona onamulosiwe, eyo henataphulela wi woona meerelo a masica tahi yawoopiha. Ntakhara heeni? Muthokororye ela: Masu a Muluku annathoonyerya wi Satana ni masololo awe haano owerya wa waalikhela muupuwelo ahu.a Mwawiihiiha, ntoko elociwaaya omapacereryo, wi esuwele muupuwelo ahu ni sooceecheya sahu soomunepani, minepa soonanara inavarerya miteko sahu​—ophitaanyerya othanla wahu mathatelo. Vaavaa meecelo a Mukiristu anooniheryaaya wi onnasiveliwa ni aliivuru naari ixilema seiyo inavuwiha onamulosiwe, masica ni meerelo a masololo, owo onalokoha sooceecheya sawe wa masololo! Ntoko yookhumelela, masololo anahaala waaceererya owetha waya wi epharihele yooceecheya Mukiristu oonihenryeiye ophiyerya omvootha. Mwawiihiiha, yaale anasiveliwa ni mathatelo yaawo anavuwiha onamulosiwe moovira wa elukuluku annaphiyerya opaka onamulosiwe.​—Mwaalakhanye Akalatiya 6:7.

17. Mavyakelo taani Satana onaphariheleiye wi aavoothe areca?

¹⁷ Satana onniilipixerya opharihela ohiya pahiru nchuno nahu na mathatelo nyenya tho wuukhuwa wahu wa okhapelela ekumi. Mwawiihai? Mukiristu yoowo orino makacamiho a ekumi onahaala okhulumuwa wakhala wi owetha wawe wi amalihe hiwaano mphurelo. (Marko 5:25, 26) Eyo ennamvaha Satana ni masololo awe ekari wi ewerye omvolowela. Masololo ananwerya omweeriha mulipa a wiiceliwa okhala ookhulumuwa ophiyerya opharihela meerelo a oloola anaphitaanyerya opharihela “masica,” naari onamulosiwe​—echu ya woopiha. Wakhala wi mavyakelo yaala a Satana anakumiherya mphurelo, yaahaala oceecheiha onthamwene wa muchu yoowo ni Muluku. Mwawiihai?

18. Meerelo taani Mukiristu onaphwaneleiye osepa, nave ntakhara heeni?

¹⁸ Yehova aahaalopola Aisarayeli yaawo yaapharihenle ikuru sa masica: “Mwakitheteryelaka mata anyu nvekelaka, miyano kinaweha okhwipi. Munamwi mulekelihaka mavekelo anyu, miyano nkinawiriyana.” (Isaiya 1:15, BNM) Chiryene, nnachuna osepa echu eri yoothene yaahaala ohiiha wi mavekelo ahu ehiwiriyaniwe naari okukuca nikhaviheryo naahaalaahu waakhela orweela wa Yehova​—xaxaxa mu ilukuluku sa wiiceliwa. (Salmo 41:3) Mwawiihiiha, wakhala ohoona wi meerelo makina a oloola ereca annavolowela meerelo a onamulosiwe, Mukiristu eeparipari onaphwanela okhooca.b (Mateyu 6:13) Mmukhalelo yoowo, mukiristu aakhela nikhaviheryo na Yehova.​—Moone ekaaxa “Ola Onamulosiwe Chiryene?”

VAAVAA MIYAHA VOOLOCA SA MASOLOLO SINAKHALAAYA SA WUNLAANA

19. (a) Musaserya onaawoka achu weemererya eheeni vooloca sa ikuru sawe? (b) Miyaha taani Akiristu eeparipari anaphwanelaaya osepa?

¹⁹ Naamwi achu a ilapo soohico hanathokororya woopiha wa ikuru sa Satana, makupa makina a elapo toohiyana. Mmakupa yaawo, Musaserya ohaawoka ancipale aweerihaka weemererya wi owo takuruxa. Achu akina anakhala, analya, analapa ni enakona yoovaka minepa soonanara. Miyaha vooloca sa ichu sootikhiniha sa masololo ti sawunlaana. Wiiliwiili miyaha seiyo inalociwa mootheiha, yaatikinihaka achu. Apwanne nnaphwanela omwaramwaxa miyaha seiyo? Hooye, alapeli a Muluku eeparipari annasepa weerano yeeyo ni mathowa meeli oochuneyaxa.

20. Onaweryeya hai muchu omwaramwaxa yoochuna ya Satana moohilakelela?

²⁰ Noopacerya, vaavaa muchu onavuwiheiye miyaha vooloca sa masololo, owo onavuwiha soochuna sa Satana. Mwawiihai? Masu a Muluku annaloca wi Satana onnapaka miteko sakuru, nyenya annalopola tho wi owo onapharihela “sotikiniha sawotha” ni “owoka wothene.” (2 Atesalonika 2:9, 10) Woona wi Satana mulipa oowoka, owo oosuwela mukhalelo wa ovolowela muupuwelo wa yaale athitimanenle onamulosiwe ni oweeriha weemererya ichu sihiri seeparipari. Achu yaawo anneemererya ni murima woothene wi ahoona naari ahiiwa echu nave ananwerya waaleela akina ntoko echu yeeparipari. Moovira wa elukuluku miyaha seiyo sinnasariheliwa. Wakhala wi Mukiristu onnasiveliwa omwaramwaxa miyaha seiya, owo oneerano yookhwela ya Musaserya​—“atithinnya a wotha.” Owo onavuwiha soochuna sa Satana.​—Yohane 8:44; 2 Timoteo 2:16.

21. Nnaphwanela olocaka eheeni mu ochekula wahu?

²¹ Nanaawiili, naamwi Mukiristu aarino wiiwanana ni minepa soonanara khalai, owo onaphwanela osepa waatikiniha Akiristu akhwaawe ni miyaha vooloca sa seiyo. Ntakhara heeni? Ninnalopoliwa: “Nimvareryakaru ópachererya ni ókiserya a nroromelo nahu, Yesu.” (Ahebri 12:2) Aai, nnaphwanela otikitherya muupuwelo ahu mwa Kiristu, ohiya mwa Satana. Ti woophwanelela osuwela wi, vaavaa Yesu aareiye veelaponi yavathi, owo haatikininhe oomuchara awe ni miyaha vooloca sa minepa soonanara, naamwi owo aawerya oloca sa yeeyo Satana onaweryeiye ni ohinaweryeiye weera. Ohiya yeeyo, Yesu aateteiwe ni muchaka wa Omwene. Mwawiihiiha, nimutakiheryaka Yesu ni arummwa awe, mu ochekula wahu nnaphwanela olocaka ichu ‘itokotoko sa Muluku.’​—Saweriwa Tarummwa 2:11; Luka 8:1; Aroma 1:11, 12.

22. Nnii ntitelele hai waaceererya “otheya wirimu”?

²² Mweeparipari, Satana onnapharihela mavyakelo oohiyanahiyana ophitaanyerya onamulosiwe wi ananarihe onthamwene ahu ni Yehova. Nyenya, moorweela wa wiicanano yoonanara ni weera yeeyo eri yaphaama, Musaserya hawerya oceecheiha yoolakelela ahu ya okhooca onamulosiwe ni makhalelo aya oothene. (Mwaalakhanye Aefeso 4:27.) Mwaanyiherye “otheya wirimu” wakhala wi nootitelela “withipela vokocha maphyakelo a musaserya” ophiyerya vaavaa oneereiye ahikhalevo!​—Aefeso 6:11.