Yohuserya 4
Musaserya Tani?
Satana, Musaserya—tiwowi orwenleiyewo? (1, 2)
Timwawihai mummo Satana onahuwelihiye atchu? (3-7)
Ntakharasheni munphwanelanyu omukhochela Musaserya? (7)
1. Masu awi “musaserya” ammulocha mutchu yowo onlocha sawotha sonanara volocha sa mutchu mukina. “Satana” ontaphulela mwiichani nari ovanyiha. Ari masu amphariheliwa muteko wa mwiichani mutokwene a Muluku. Vopacherya, owo ari munkelo aphama, a wirimu, akhala vamoha ni Muluku. Mwawihiha, wovira wa elukuluku ahikusheya vanchipale anatchuna olapeliwayowo onamphwanela Muluku pahi.—Mateyu 4:8-10.
2. Munkelo yola, Satana, ahilocha wa Hava orwela mu enowa. Nthowa nomulela sawotha, ahimwiriha ohimwiwelela Muluku. Mwawihiha Satana avinyerya yeyo enitchaniwa “omwene” nari, mapuro a Muluku, ntoko Opwahasha. Satana ahiruha nthowa makhalelo a olamulelo wa Muluku, warimwi ari ophwanelela musotchuna saphama sa anethiawe. Satana ahipacheriha minikwa wakhala wii amukhalavo mutchu ahala okhalaru ororomeleya wa Muluku. Mwawihihanto Satana ahipakeya mwichani a Muluku. Tinthowa na yeyo onitchaniwiiye Satana, Musaserya.—Genesis 3:1-5; Yobu 1:8-11; Yawupulula 12:9.
3. Satana onavyavya wawoka atchu wi emulapeleke yowo. (2 Akorinto 11:3, 14) Makhalelo mamoha yawo onahuwelihiyeno atchu ti malapelo atheru. Vava mathamalelo anahusihaya sawotha volocha sa Muluku, awo mwevelevelo anrumela sotchuna sa Satana. (Yohane 8:44) Atchu am’mathamalelo atheru vakinavo annaroromela mwevelevelo wii ari emulapelaka Muluku evelevelo. Nyenya mwevelevelo am’murumela Satana. Owo ti ‘muluku a elapo ela’.—2 Akorinto 4:4.
4. Makhalelo a olosiwa makupa makina yawo Satana onalamulelaweno atchu. Awo annavekela minepa wii akhweya ephwanye okhapeleleya, wii yahosheno akina, wii eloherye sa muholo akhweya epake sotikiniha. Satana ti ikuru sonanara siri ochuli wa sawereya sothene iiha. Wii nimuhakalalihe Muluku, ninphwanela ohipaka makupa ni minepa.—Detronomiu 18:10-12; Saweriwa Tarummwa 19:18, 19.
5. Satana onnahuwelihatho atchu orwela mu wirumiha vanchipale nthowa na nloko ni othamalela wa maryeheryeryo a epolitika. Akina anona wii elapoaya, akhweya nloko naya tinaphama opwaha na akina. Nyenya eyo tahi yevelevelo. (Saweriwa Tarummwa 10:34, 35) Akina anweheryerya wii maryeheryeryo a epolitika ethoriheke sokachamiha sa mutchu. Mwa yeyo, annakhocha Omwene wa Muluku. Ola tori yothoriha emoha pahi sa sokachamiha sahu.—Danieli 2:44.
6. Makhalelo makina yawo Satana onahuwelihiyeno atchu ti oweryerya ni minkhela sa sotcheka. Yehova onalocha wii ninphwanela osepa merelo asotcheka, nthowa nawi onnasuwela wii itchu iiha sinnanipahula. (aGalitiya 6:7, 8) Vakinavo akina annatchuna wii nyuwano npharihaneke ni awo musopaka sawihiha. Mupuwelele, wii, mwevelevelo ti Satana yowo antchuna wi npake itchu sawihiha.—1 Akorinto 6:9, 10; 15:33.
7. Vakinavo Satana onnapharihela muteko sohosha akhweya ovanyiha wi okhumiheni wa Yehova. Akina a osiveliwanyu vakinavo anamushimwa vanchipale nthowa nawi nyuwano munamuhuserya Biblia. Akhweya akina anamonyoholani nyuwano. Nyenya tani onovahani okumi? Satana ontchuna owopopihani wii mwemele ohuserya etchu volocha sa Yehova. Muhimuhiye Satana olaphiheni! (Mateyu 10:34-39, NM; 1 Petro 5:8, 9) Mu omukhochela Musaserya, munahala ompakiha Yehova ohakalala ni woneiha wi munnakiha omweneawe.—Proverpio 27:11.
[Iruku va epaaxina 9]
Malapelo atheru, olosiwa ni okawana wa maloko annahuweliha atchu
[Eruku va epaaxina 9]
Mmukhoche Satana mu opwahiherya ohuserya volocha sa Yehova