Yohuserya 3
Yesu Kristu Tani?
Ntakhara heni Yesu onitchaniweiye Mwana “opacherya” a Muluku? (1)
Ntakhara heni onitchaniwawe “Masu”? (1)
Ntakhara heni Yesu aruleiye velaponi ntoko mutchu? (2-4)
Ntakhara heni apankawe sotikiniha? (5)
Esheni Yesu onahaliye wira muholo mwawachamela? (6)
1. Yesu ahikhala wirimu ntoko mutchu omunepani ahakunve orwa velaponi. Owo ori yopatushiwa yopacherya ya Muluku nyenya nthowa na yeyo onnitchaniwa Mwana “opacherya” a Muluku. (Akolose 1:15; Yawupulula 3:14) Yesu ori Mwana m’moha yowo Muluku ompatunshiye mekheiye. Yehova ahimpharihela muteko Yesu ahakumve okhala mutchu ntoko “katchiri amiteko” wii apatushe itchu ikina sothene wirimu ni elapo yavathi. (Proverpio 8:22-31; Akolose 1:16, 17) Muluku ahimpharihela muteko ntoko okusha Masuawe matokwene. Tinthowanaya Yesu onitchaniwiye “Masu”.—Yohane 1:1-3; Yawupulula 19:13.
2. Muluku ahimurumiha Mwanawe velaponi mu othamiha okumiawe orowano mmirimani mwa Mariya. Vavanto Yesu harinono atithinya omutchu. Tinthowanaya ohakhenliye nari yotcheka nari ohikhala phama. Muluku ahimurumiha Yesu velaponi nimathowa mararu: (1) Wii anihusihe evelevelo volocha sa Muluku (Yohane 18:37), (2) wii akhalenoru omaleleya worera, wii anivahe makhalelo otcharela (1 Petro 2:21), nave (3) wii ahele ephepa okumi awe, wii antaphule mu yotcheka ni okhwa. Nthowa heni yaryaya eyo yotchuneya?—Mateyu 20:28.
3. Mu ohiwelela nlamulo na Muluku, mutchu opacherya, Adamu, ahira yeyo Biblia onitchaniye okhala “yotcheka”. Nthowa nayeyo Muluku ahimuthorihela wa okhwa. (Genesis 3:17-19) Owo hakhanletho mmalamulo a Muluku, mwawihiha hakhanle aphma. Mwavakhanivakhani ahuluvala nave akhwa. Adamu ahavaha yotcheka anamwanawe othene. Tinthowanayatho nnuluvalahu, nnicheliwahu ni okhwa. Timwawihai waryaya woweryeya wavulusha atchu?—Aroma 3:23; 5:12.
4. Yesu ari mutchu aphama, olikana ni Adamu. Mohiyana ni Adamu, mwawihiha, Yesu ari awiwelela phama wa Muluku, nari vathi va saweha sitokwene. Tinthowanaya owo awenryiye ovaha ephepa okumiawe womutchu waphama nthowa na yotcheka ya Adamu. Elanto tiyeyo Biblia onitchaniye “wopola”. Anamwene a Adamu yahala wopoliwa mu omakiwa mu okhwa. Othene yawo anaroromela mwa Yesu sotcheka saya sinahala okhurumuweliwa wii yakhele okumi wohimala.—1 Timoteo 2:5, 6; Yohane 3:16; Aroma 5:18, 19.
5. Vava Yesu ariye velaponi yavathi, owo ahapenusha awicheliwa, ahalyiha alipa ovoliwa etala ni ahimaliha etcheku. Navetho ahaviha alipa okhwa. Nthowa heni apankeiye sotikiniha? (1) Ari ni ikharari ni atchu yawo yahawa nave anatchuna wakhaviherya. (2) Sotikiniha sawe saherela onamona wii owo aritchiri Mwana a Muluku. (3) Sohoniherya yeyo owo onahaliye opaka ni atchu awiwelela vava onahaliye olamulelaka ntoko Mwene a elapo.—Mateyu 14:14; Marko 2:10-12; Yohane 5:28, 29.
6. Yesu ahikhwa nave avihiwa ni Muluku ntoko yopatushiwa yomunepani, nave akokela wirimu. (1 Petro 3:18) Ovinyeryanto vava, Muluku onpaka okhala Mwene. Vohilekelasha, Yesu onahala omaliha velaponi onanara wothene ni ohawa wothene.—Masalmo 37:9-11; Proverpio 2:21, 22.
[Iruku va epaaxina 7]
Orummwa wa Yesu wahipwesheryeryamo ohusiha, wira sotikiniha navetho ovaha okumiawe mu ophamahu