Yohuserya 13

Nyuwano Muni Muwerye Hai Ophwanya Mamulapelo Eparipari?

Apwanne mamulapelo othene annamuhakalaliha Muluku akhweya mamoha tanamuhakaliha? (1)

Ntakhara sheni aryayavo mamulapelo manchipale anichochopela wii aKristu? (2)

Nni nasuwele hai aKristu eparipari? (3-7)

1. Yesu atikithenrye mamulapelo mamoharu aKristu eparipari. Vanthowa na yela olelo onatchuneya okhalavo mwili mmoha, nari wi nikhuru nimoha, nayawo anamulapa Yehova Muluku mwiparipari. (Yohane 4:23, 24; Aefeso 4:4, 5) Biblia onahusiha wi avakhani pahi tanatchara ephiro yonimuwa enaya wukumini wohimala.—Mateyu 7:13, 14.

2. Biblia alochela khuluwi wi, yakhwa arummwa, vakhani ni vakhani yahala ovolowa mmulokoni mwasinakristu mahusiheryo atheru ni miteko ihiri sasinakristu. Atchu yahala wahuweliha ororomela wi yatchare, emuhiye Kristu. (Mateyu 7:15, 21-23; Saweriwa Tarummwa 20:29, 30) Nthowa nayela nnonahu mamulapelo manchipale ohiyana, aniwa aKristu. Nni nasuwele hayi aKristu eparipari?

3. Enasuwanyeiha aKristu eparipari osivelanasha mukina ni mukhwawe. (Yohane 13:34, 35) Hanahusihiwa wisona okhala ophwanelela wapwaha atchu ailapo sikina ni maloko makina. Hanahusihiwa nari tontoru owicha atchu a ilapo sikina. (Saweriwa Tarummwa 10:34, 35) Vayela, hanavolowela ikhocho. Akristu eparipari mukina ni mukhwawe anechihana ntoko anna ni arokora.—1 Yohane 4:20, 21.

4. Yawiphini ekina ya mamulapelo eparipari mmoha ni mmoha a mummo annamuchichimiha Biblia. Annemeryerya wi Masu a Muluku nave annaroromela onalocheiye. (Yohane 17:17; 2 Timoteo 3:16, 17) Anona Masu a Muluku okhala okhweleya opwaha mupuwelo nimihapo saatchu. (Mateyu 15:1-3, 7-9) Annasyasya wi okumiaya oholeliweke ti Biblia. Mwawi, hiha, hanalalerya etchu ekina yerakatho ekina.—Tito 1:15, 16.

5. Mamulapelotho eparipari enatchuneya evaheke samahala nsina na Muluku. (Mateyu 6:9) Yesu ahasuweliha akina nsina na Muluku, Yehova. Akristu eparipari anatchuneya yereno emohamoha. (Yohane 17:6, 26; Aroma 10:13, 14) Tani, mmapuro owannyu, onalocha ni akina nsina nenna na Muluku?

6. Akristu eparipari anatchuneya elaleryeke Omwene wa Muluku. Yesu tiyeyo ereiyeno. Owo elukuluku yothene alocha sa Omwene. (Luka 8:1) Alamulenle wi ohuserya awe elaleryeke mitchaka imohamoha velaponi yothene. (Mateyu 24:14; 28:19, 20) Akristu eparipari anaroromela pahi wii Omwene wa Muluku tonahala oruha murechele weparipari ni ohukhuwa velaponi ya vathi.—Masalmo 146:3-5.

7. Ohuserya a Yesu hanaphwanela okhala mmakupa elapo yela yonanara. (Yohane 17:16) Hanavolowa mwitchu sapolitika, nari wakhulana wa atchu elapo. Annasepa makhalelo, sawera ni merelo opahula awacheliwa velaponi. (Yakobo 1:27; 4:4) Nyuwo munnawerya wasuwela mmapuro owannyu nikhuru na mamulapelo nrinono ineneryo hiha sawasuwanyeiha, inupulula phama okristuenesha?

[Iruku va epaaxina 26, 27]

Akristu eparipari anamusivelana mukina ni mukwawe, annamuchichimiha Biblia nave analalerya Omwene wa Muluku