YOOHUSERYA 10
Nyuwano Munii Musuwele Hai Malapelo Eeparipari?
1. Arivo malapelo eeparipari mamoha pahiru?
“Weheryani musepe alipa-miririmo ówoka.”—MATEYU 7:15.
Yesu aahaahusiha oomuchara awe malapelo mamoha pahiru, malapelo eeparipari. Ari sintoko ephiro enahoolela wukumini woohimala. Yesu aaloca: “Óphwanya yeyo ari awalakhanyeya.” (Mateyu 7:14) Muluku onakhwela pahiru malapelo anathipeliwa mu Masu awe, Piipiliya. Alipa oothamala eeparipari oothene ari awiiwanana mu nroromelo nimoha.—Mwaalakhanye Yohane 4:23, 24; 14:6; aEfeso 4:4, 5.
Moone exilema Apwanne Muluku Onneemererya Malapelo Oothene?
2. Tiheeni Yesu aalonceiye sa aKiristu oowoka?
“Ennemyeryerya wi ennamusuwela Muluku, nyenya ni miteko aya ennamukhócha yowo.”—TITO 1:16.
Yesu aahilopola wi alipa-miririmo oowoka yaahaala onanariha eKiristu. Vaate, awo anakhala ntoko alipa oothamala eeparipari. Analoca wi ikerexa saya ti seeKiristu. Nyenya nyuwo munahaala waasuwela achu yaawo moorweela wa makhalelo aya chiryene. Mwawiihai? Malapelo eeparipari pahiru tanaapaka aKiristu eeparipari anooneya mmikhalelo ni mmeerelo.—Mwaalakhanye Mateyu 7:13-23.
3. Nyuwano munii mwaasuwele hai alipa oothamala eeparipari?
Thokororyani ineneeryo iha thanu sinooniherya:
Alipa oothamala eeparipari annamucicimiha Piipiliya sintoko Masu a Muluku. Awo anniilipixerya okhala mwawiiwanana ni malakiheryo a Piipiliya. Malapelo eeparipari ti oohiyana ni ikerexa sinarweela mmuupuwelo wa achu. (Mateyu 15:7-9) Alipa oothamala eeparipari anakhala moovarihana ni yeeyo anaahusihaaya akina.—Mwaalakhanye Yohane 17:17; 2 Timoteo 3:16, 17.
Oomuchara eeparipari a Yesu annacicimiha nsina na Muluku, Yehova. Yesu aacicimiha nsina na Muluku moorweela wa weeriha wi nsuweliwe. Owo aahaakhaviherya achu omusuwela Muluku nave aahaahusiha awo ovekela wi nsina na Muluku neelihiwe. (Mateyu 6:9) Onipuro munakhalaanyu, malapelo taani aneeriha wi nsina na Muluku nsuweliwe?—Mwaalakhanye Yohane 17:26; aRoma 10:13, 14.
AKiristu eeparipari annalaleerya sa Omwene wa Muluku. Muluku aamurumiha Yesu wi alaleerye michaka yaphaama ya Omwene wa Muluku. Omwene wa Muluku ti ewehereryo emoharu pahi wa achu. Yesu atitelela oloca sa Omwene owo ophiyerya nihiku na okhwa wawe. (Luka 4:43; 8:1; 23:42, 43) Owo aahiloca wi oomuchara awe yaahaala olaleerya vooloca sa Omwene wa Muluku. Wakhala wi muchu oowaacamelani wi aloce sa Omwene wa Muluku, owo ti a malapelo taani?—Mwaalakhanye Mateyu 24:14.
Oomuchara a Yesu hanapaka makupa a elapo yeela yoonanara. Nyuwano munanwerya waasuwela nthowa nawi awo hanavolowela mukhalelo wa elapo nari waakhulana wa achu. (Yohane 17:16; 18:36) Navetho, awo hanatakiherya saweera soonanara nari muupuwelo wa elapo.—Mwaalakhanye Yakobo 4:4.
AKiristu eeparipari annasivelana mukina ni mukhwaawe. Moorweela wa Masu a Muluku, awo annahuserya waacicimiha achu a mukhalelo woothene. Naamwi ikerexa soowoka wiiliwiili sikhaviheryaka ikhoco sa maloko, alipa oothamala eeparipari annakhooca weerano hiihaa. (Mikeya 4:1-3) Moohiyana, aKiristu eeparipari mwawiiveleela annavaha elukuluku ni ichu saya wi yaakhaviherye ni waalipiha akina.—Mwaalakhanye Yohane 13:34, 35; 1 Yohane 4:20.
4. Nyuwano Munanwerya osuwela malapelo eeparipari?
Malapelo taani anathipela mahusiheryo aya mu Masu a Muluku, anacicimiha nsina na Muluku, nave analaleerya wi Omwene wa Muluku ti yoowehererya emoharu pahi ya achu? Nikhuuru taani nnasivelana mukina ni mukhwaawe nave nniica ekhoco? Tiheeni munuupuwelaanyu?—Mwaalakhanye 1 Yohane 3:10-12.