Yohuserya 15

Wakhaviherya Akina Wii Yerekeno Yokhwela Ya Muluku

Nthakhara sheni oryaya wokhweleya wa nyuwano walela akina munahuseryanyu? (1)

Tani nyuwano munaphwanelanyu omulela mitchaka yela yaphama? (2)

Mukhalelo anyu oni wavolowele mwawihai akina? (2)

Muni mpacherye lini olalerya ni muloko? (3)

1. Vano nyuwo mohuserya Mbibliani itchu sinchipale saphama. Osuwelasha wene yola wovaheni mukhalelo wokristu. (Aefeso 4:22-24) Osuwelasha wawi hiha tiwokhweleya nariki niphwanye okumi wohimala. (Yohane 17:3) Vawi hiha, akinatho annatchuna osuwela mitchaka yaphama wii nawenetho evuluwe. Akristu othene eparipari enatchuneya ewerele akina namona. Nla nlamulo na Muluku.—Aroma 10:10; 1 Akorinto 9:16; 1 Timoteo 4:16.

2. Nyuwano munaphwanelela opacherya walela mitchaka yaphama munahuseryanyu yawo munakhalanyuno. Mwaleleke ahima, asinthamwene, akhwinyu oskolani ni omutekoni. Mwerekeno mophameya ni oleva. (2 Timoteo 2:24, 25) Muhichuwale wii atchu vatokovenesha anaweha mukhalelo wa mutchu opwaha onalocheiye. Vawi hiha, makhalelo anyu aphama anamwavaha akina ikuru sa owiriyana mitchaka munalaleryanyu.—Mateyu 5:16; 1 Petro 3:1, 2, 16.

3. Movira wa elukuluku, nyuwano munahala okhwanela wii mpacherye olalerya vamoha ni muloko wavakhiviru vanyu wa Anamona a Yehova. Ela etchu yokhweleya munayanyu vaholo. (Mateyu 24:14) Ohakalala wawihai muniryanyu mukhaleno mu omukhaviherya mukina wii akhale kapuro a Yehova akhele okumi wohimala!—1 Atesalonika 2:19, 20.