Mano Munnoona Okhweleya Waya Oya Vahoolo Omunepani?
“Wivahe walakhanya olaka ni ohusiha.”—1 TIMÓTEO 4:13.
MACIPO: 45, 70
MWAAHAALA WAAKHULA HAI?
Tiheeni munaphwanelaanyu weera wi muye vahoolo omunepani?
Munii nwerye hai oya vahoolo omunepani muhivelavenle?
Matorokelo taani anahaala wookhaviheryaani okhumelela phaama mmuteko woolaleerya?
1, 2. (a) Isaiya 60:22 onaakhwanela hai mmahiku yaala ookuchula? (b) Ochuneya taani orivovo mmakupa a marehereryo a Yehova veelaponi yavathi?
“ETXHEKO yoyevasa eni enakhalano atxhu ntxikhwi, nave etxheko ekhani enamukhala nloko nawatxa.” (Isaiya 60:22) Masu ala annaakhwanela mmahiku ahu yaala ookuchula. Mweeparipari, mu eyaakha ya 2015, akapuro a Yehova awaakhwana 8.220.105 aalaleerya michaka yaphaama ya Omwene orukurerya elapo yoothene! Muluku aaloca sa waaceereryeya wuuwu variyari va achu awe ariki: “Elukuluku yaphiya, miyano, Apwiya [Yehova], kinamwera yeyo vohilekela.” Mwawiihiiha, vaavaa elukuluku enaviraaya onamukhalawo muteko muncipale wi oothene ahu nipake. Apwanne ninneera soothene nnaweryaahu wi nlaleerye ni ohusiha michaka yaphaama? Anna ni arokora ancipale annarumeela ntoko mapiyoneero ookhaviherya naari a elukuluku yoothene. Akina aaya mmapuro makina wi yakhaviherye muteko wa olaleerya, nave akina annalapa mwakuru mmuteko wa oteka Ipa sa Omwene.
2 Eyaakha ti eyaakha, sinnapakiwa miloko mivyaani sawaakhwana 2.000. Mmiloko seiyo annachuneya atokweene ni arummwa oorumeela. Iyaakha soothene, arummwa oorumeela opwaha ncikhwi annachuneya okhala atokweene, nave anna akina opwaha ncikhwi annachuneya okhala arummwa oorumeela. Mweeparipari onnachuneya wi “mutepeke ophara muteko wa Apwiya,” ohiya pahiru anna, nyenya tho arokora.—1 Korinto 15:58.
TIHEENI ENACHUNEYA WI MUYE VAHOOLO OMUNEPANI?
3, 4. Soolakelela taani soomunepani munaphwanelaanyu otikitherya?
3 Mwaalakhanye 1 Timoteo 3:1, (Nlakano Nahihano). Murummwa Paulo aanaathamalela anna yaawo ‘yátchuna’ okhala alipa ooweherya naari atokweene. Wi muchu aphwanye echu ehiri vakhiviru vawe, owo onaphwanela wiilipiherya ni wookola nwono awe wi aphwanye. Vano mmwaanyiherye munna yoowo aahaala osiveliwa ophwanelela okhala murummwa oorumeela. Owo oosuwela wi ti woochuneya wiilipiherya, wunnuwiha mikhalelo Seekristu. Voocharela apacerya orumeela ntoko murummwa oorumeela, onnatitelela olapa mwakuru wi awerye ophwanelela okhala mutokweene.
4 Anna ni arokora akina aapaka matorokelo muukumini mwaya woona wi anachuna opaka sincipale mmuteko wa Yehova. Ntoko yootakiherya, awo annachuna okhala mapiyoneero, olapa Opeteli, naari okhaviherya oteka Ipa sa Omwene. Hankooni noone mukhalelo Piipiliya oneereiye anikhaviherye oothene ahu otitelela oya vahoolo.
MUTITELELE OYA VAHOOLO OMUNEPANI
5. Anna ni arokora anapharihela hai ikuru saya mmuteko wa Omwene?
5 Amiravo ophitaanyerya arokora ananwerya opaka sincipale mmuteko wa Yehova woona wi ta wuupa naari takuru nave aakhalano ekumi yaphaama. (Mwaalakhanye Masiposipo 20:29.) Anna ni arokora analapa o Peteli annakhaviherya waapaka ni waarehererya aliivuru ni Apiipiliya. Anna ni arokora ancipale annateka Ipa sa Omwene naari okhaviherya orehererya iho. Awiiveleela akina annakhaviherya mu mapuro opaken’yewo epahu. Nave amiravo ancipale ari mapiyoneero annahuserya elocelo ekina naari oya nipuro nikina wi yalaleerye michaka yaphaama.
6-8. (a) Ti mwawiihai mmiravo mmoha aatoronkeiye moonelo awe mmuteko wa Muluku, nave ni yookhumelela taani? (b) Nnii niwerye hai ‘owererya ni owona Apwiya orèra waya murima’?
6 Ninnamusivela Yehova nave nnachuna omvaha owetha wahu. Naamwi hiiha nnanwerya wiisoona moolikana ni munna Aroni ooneiye. Owo aanachuna omurumeela Muluku, nyenya haakhala oohakalala. Naamwi Aroni ovinyerya ari mwaana aanaphiya mmithukumano ni oya mmuteko wa olaleerya, owo aaloca: “Kaanahapaleya oya mmithukumano ni mmuteko woolaleerya.” Vano tiheeni aapankeiye?
7 Aroni aahiilipiserya omwaalakhanya Piipiliya mahiku oothene, orehererya mithukumano, ni ovaha maakhulo. Owo tho aapacerya opaka mavekelo. Soothene seiya saamukhaviherya oya vahoolo omunepani. Owo aamusuwela phaama Yehova nave aapacerya omusivela vancipale. Ntoko yookhumelela, Aroni aanahakalala. Owo aarumeela ntoko piyoneero, aahaakhaviherya akina vaavaa yaakhumelenlaaya epahu, nave aaya olaleerya mu elapo ekina. Vano mutokweene a muloko nave onarumeela Opeteli. Munna ola oniisoona hai? Aroni onnaloca: “Kinnakhala ‘kiwereryaka ni owona Apwiya [Yehova] orèra waya murima.’ Wa nthowa na mareeliho awe, kinniisoona okhalano mankawu ni yene nave kinnaceenyeryeya opaka sincipale mmuteko awe, nave yookhumelela aya enakhala mareeliho mancipale.”
8 Namarepa a Salumu ooloca: “Ereryani ni onani Apwiya orèra waya murima.” Nave aahaaceererya: “Nto anawasya Apwiya hanathoiw’etxhu.” (Mwaalakhanye Salumu 34:9-11.) Chiri vaavaa nnamvahaahu Yehova owetha wahu, ninnakhalano ohakalala weeparipari woona wi noosuwela wi ninnamucicimiha. Nave owo onamwaakhwaniherya yoolaiherya awe wi anikhaviherye.
MUHIVELAVELE
9, 10. Ntakhara heeni ti wookhweleya wa nyuwaano okhala ‘owehererya’?
9 Hiyaano nnanwerya ochuna opaka sincipale mmuteko wa Yehova. Nyenya hanka wakhala wi noowehererya vancipale wi nikhaleno ekari yammoori mmulokoni naari mikhalelo sahu sootorokeya? Nnaphwanela okhala oowehererya. (Mikeya 7:7) Nave naamwi hiiha, Yehova onamweemererya echu otitelela weereya, nyenya nnaphwanela ororomela wi onahaala onikhaviherya. Nnanwerya ohuserya orweela wa yootakiherya ya Aparahamu. Yehova aamulaiherya wi aahaala okhalano mwaana, nyenya aaphwanela owehererya mu iyaakha sincipale ahaakumve oyariwa Isaki. Variyari va elukuluku yeele, Aparahamu aanawehererya nave hantonko oyeleela nroromelo nawe wa Yehova.—Mapacereryo 15:3, 4, Sociedade Bíblica em Moçambique; 21:5; Ahebri 6:12-15.
10 Chiryene, tahi wookhweya owehererya. (Masiposipo 13:12) Nyenya wakhala wi ninnatitelela wuupuwela mukhalelo ahu ni oceecheya wahu, nnahaala otepa ovelavela. Moohiyana, nnaphwanela opharihela elukuluku wi nrehererye mikhalelo nnahaalaahu ochuna wi inikhaviherye okhapelela mirici sa mmulokoni.
11. Mikhalelo taani soomunepani nnaphwanelaahu wunnuwiha, nave ntakhara heeni ti sookhweleya?
11 Munnuwihe mikhalelo ni mavyakelo munachunaanyu. Moorweela wa omwaalakhanya Piipiliya mahiku oothene ni wuupuwelela yeeyo munaalakhanyaanyu, munahaala ohuserya okhala a miruku, wuupuwela mwaphaama, ni opaka soolakelela saphaama. Chiryene, anna annaphwanela mikhalelo ni mavyakelo ntoko yaala wi ewerye okhapelela muloko. (Masiposipo 1:1-4; Tito 1:7-9) Vaavaa nnamuhuseryaahu Piipiliya, nnahaala osuwela mukhalelo Yehova onooneiye vooloca sa miyaha mincipale. Voocharela mahiku oothene, nnanwerya opharihela yeeyo nihusenryaahu wi nipake soolakelela seiyo sinamuhakalaliha Yehova. Ntoko yootakiherya, nnahaala ohuserya mukhalelo wa waakhaliha akina, mukhalelo wa opharihela ikhorowa, ni othanla mathatelo ni soowara.
12. Achu a mmulokoni eni yooniherye hai wi toophwanelela okhalano mirici?
12 Mulapeke mwakuru mmuteko yoowo mvahiwaanyu. Vaavaa Aisarayeli yaakelaaya oteka wanaawiili empa ya Muluku, Nehemiya aanaachuna alopwana wi ekhapeleleke mirici sawaaca. Owo aahaathanla yaawo yaarino meecelo aphaama. Owo aasuwela wi alopwana yaale yaamusivela Muluku yaahaala olapa mwakuru mmuteko vyakala yeeraaya evahiwe wi epake. (Nehemiya 7:2; 13:12, 13) Mmukhalelo mmohamoha olelo, yaale ari oororomeleya nave analapa mwakuru, anahaala okhalano meecelo aphaama, anamvahiwa mirici mincipale. (1 Korinto 4:2) Mwawiihiiha moohipwacha waakhanle wi na anna naari arokora, nnaphwanela mahiku oothene opaka owetha wahu mmuteko vyakala nnavahiwaahu.—Mwaalakhanye 1 Timóteo 5:25.
13. Munii mucharihe hai yootakiherya ya Yosefe wakhala wi akina annookhalihani moonanara?
13 Mmuroromele Yehova. Tiheeni munaphwanelaanyu weera wakhala wi akina annookhalihaani moonanara? Nyuwaano munnawerya waatharihela mukhalelo munoonaanyu. Nyenya wakhala wi munniisaakiha ni otitelela oloca wi mookhalano mathowa aphaama, munahaala otepiha mwaheene. Nnanwerya ohuserya sincipale orweela wa yootakiherya ya Yosefe. Anna awe yaamukhaliha moonanara. Achu yaanamootherya, nave aawaleliwa mukalaposo ahirino nthowa. Nyenya Yosefe aamuroromela Yehova. Owo aanuupuwelela soolaiherya sa Yehova, nave aatitelela okhala oororomeleya. (Salumu 105:19) Mu ilukuluku seiye soovila, yene aahunnuwiha mikhalelo saphaama seiyo ohoolo waya saamukhavihenrye vaavaa aavahiweiye muteko wookhweleya wi apake. (Maphatxuwelo 41:37-44; 45:4-8) Wakhala wi akina annookhalihani moonanara, mvekele wa Yehova wi oovaheeni miruku. Owo onahaala wookhaviheryaani okhala oomaaleleya ni waakhaliha mwaphaama mwaalocaka ni yaawo.—Mwaalakhanye 1 Pedro 5:10.
MUYE VAHOOLO MMUTEKO WOOLALEERYA
14, 15. (a) Ntakhara heeni ninnaphwanela ‘wikhapelela’ mmukhalelo nnalaleeryaahu? (b) Munii mpake hai matorokelo? (Moone eruku yoopacerya ni ekaaxa “Munniilipiserya Weererya Mukhalelo Woohiyana?”)
14 Paulo aamuleela Timoteo wi atitelele orehererya mukhalelo wa othariha Soorempwa. Owo aaloca: “Wikhapelele weyo mukhatà ni mahusiho.” (1 Timóteo 4:13, 16) Timoteo aanalaleerya mu iyaakha sincipale. Vanonto ntakhara heeni waachuneyaaya orehererya? Timoteo aasuwela wi achu ni mikhalelo saanatorokeya. Owo aachuna wi achu enwiriyaneke, mwawiihiiha aaphwanela otitelela orehererya ni otoroka mukhalelo aahusiheiye achu. Vaavaa nnalaleeryaahu olelo, nnaphwanela weerano emohamoha.
15 Mmapuro makina, ninnoona wi achu ancipale hanakhala mmawannyaya vaavaa nnalaleeryaahu empa ni empa. Mmapuro makina, achu akhweya annakhala owaani, nyenya hannawerya oya owannyaya, akhweya nthowa nawi ti woovila ovolowa anakhalaayamo. Wakhala wi enneereya mu ekulucu anyu, apwanne mwanwerya weererya mikhalelo mikina sa waaphwanya achu?
16. Onamoona wa vanlakani oni okumihere hai mphurelo?
16 Anna ni arokora ancipale annahakalala ni onamoona wa vanlakani. Ntoko yootakiherya, awo annaya oneemelawo kumpoiyu, ikaaro, omusika, ni mmaparkhini wi yaaphwanye achu wi ewerye olocano. Onamoona owo akhweya onanwerya opaceryihiwa mu ovaanela ni muchu vooloca sa michaka sa raatiyu. Naari akhweya oloca echu yaphaama vooloca sa anamwane a muchu owo naari ompakela nikoho vooloca sa muteko awe. Wakhala wi muchu owo onnasiveliwa ni ovaanela iwo, mulaleeryi onaphwanela oromola yoorepa ya Piipiliya ni waavyaavya osuwela moonelo awe vooloca sa mwaha owo. Wiiliwiili achu annachuna osuwela sincipale vooloca sa Piipiliya.
17, 18. (a) Munii mukhaleno hai nroromele mu onamoona wa vanlakani? (b) Ntakhara heeni munoonaanyu okhala ya mphurelo mukhalelo Tavite aamuciciminheiye Yehova vaavaa munalaleeryaanyu?
17 Akhweya nyuwaano munnakhalano makacamiho a opacerya ovaanela ni muchu yoowo mukumannaanyuno mphironi muhimusuwenlaanyu. Ti yeeyo piyoneero oniichaniwa Etiye o Nova York onneiye. Nyenya aaphwanya echu yeeyo yaamukhavihenrye okhala oolipa murima. Owo onnaloca: “Variyari va malapelo ahu a echoko, miyaano ni mwaaraka naatholathola wi niphwanye maakhulo a waakaaha ni moonelo wa achu. Naahaaveka tho anna wi enikhaviherye.” Vano Etiye onnasiveliwa ni onamoona wa vanlakani.
18 Vaavaa nnahakalalaahu mmuteko woolaleerya ni orehererya mukhalelo nnalocaahu ni achu sa michaka yaphaama, oya wahu vahoolo omunepani onnooniwa ni akina. (Mwaalakhanye 1 Timóteo 4:15.) Ophiyerya wi nnanwerya omukhaviherya muchu okhala murummwa a Yehova. Tavite aaloca: “Kinamwatxitximiha Apwiya elukuluku yothene; ntxitximiho naya nnamukhala mwano mwaka mahiku othene. Murima aka wivuwihe mw’Apwiya. Awiyeviha yiwe ni ehakalale.”—Salumu 34:2, 3.
MUTITELELE OMUCICIMIHA YEHOVA MOORWEELA WA OYA VAHOOLO OMUNEPANI
19. Ntakhara heeni kapuro oororomeleya a Yehova onnahakalala, naamwi akhalaka mmikhalelo sookacamiha?
19 Tavite tho aaloca: “Sotxitximiheni, Pwiya, miteko sanyu sothene. Atxhu anyu othene [oororomeleya] yotxhapeleni. Awo esuwelihe ovuwa wa omwene anyu, nave elaleye sotikhiniha sanyu, yahusihe atxhu miteko sanyu ni wàrya wovuwa anyu.” (Salumu 145:10-12) Oothene yaale anamusivela Yehova nave ari oororomeleya wa yoowo aakhalano nchuno ntokweene na waaleela akina vooloca sa yoowo. Vano, hanka wakhala wi wa nthowa na wiiceliwa naari wuuluvala hamunawerya omaliha elukuluku yincipale mmuteko wa olaleerya wa empa ni empa? Muupuweleke wi nyuwaano munnamucicimiha Yehova elukuluku yoothene munalocaanyu sa yene wa yaale ari vakhiviru vanyu, ntoko alipa murece ni matotore. Wakhala wi muri mukalaposo nthowa na nroromelo nanyu, nlelo munanwerya waaleela akina vooloca sa Yehova, nave eyo enamweeliha murima awe. (Masiposipo 27:11) Owo tho onnatepa ohakalala wakhala wi munnamurumeela naamwi akina a emusi anyu ehimurumeelaka. (1 Pedro 3:1-4) Naamwi mmikhalelo sookacamiha, munanwerya omuhakalaliha Yehova, otitelela omwaacamela, ni oya vahoolo omunepani.
20, 21. Wakhala wi munnavahiwa miteko sawaaca mmarehereryo a Yehova, munii mukhale hai mareeliho wa akina?
20 Chiri Yehova onahaala wooreelihaani wakhala wi mootitelela omwaacamela ni opaka owetha wanyu wi mmurumeele yoowo. Akhweya moorweela wa opaka matorokelo mu yoochariha anyu naari mmukhalelo anyu wa okumi, munahaala okhalano ikari sincipale sa waakhaviherya achu ohuserya vooloca sa soolaiherya sooreera sa Muluku. Nyuwaano tho munanwerya waakhaviherya vancipale anninyu ni arokora. Nave muupuwele wi anna ni arokora anyu anahaala woosivelaani vaavaa anawoonaayani mwiilipixeryaka olapa mwakuru mmulokoni!
21 Moohipwacha elukuluku nimalinhaahu nimurumeelaka Yehova, oothene ahu nnaphwanela otitelela omwaacamela ni oya vahoolo omunepani. Mu yoohuserya enacharela, nnahaala othokororya mukhalelo wa waakhaviherya akina oya vahoolo.
[Yooleeliherya va epaaxina 17]
Moorweela wa wuupuwelela yeeyo nnaalakhanyaahu Mpiipiliyani, ninnahuserya okhala a miruku ni opaka soolakelela saphaama
[Ekaaxa va epaaxina 18]
Munniilipiserya Weererya Mukhalelo Woohiyana?
VENESIYA murokora onakhala o Venesuwela, aanoova olaleerya michaka yaphaama ni telefoni, nyenya owo aanachuna weererya. Owo aamwiichana ni telefoni muthiyana aamusuwenleiye nave alocano mwawaakuveya sa Piipiliya. Muthiyana owo aanachuna osuwela sincipale, mwawiihiiha Venesiya aapaceryiha yoohuserya. Ohoolo waya muthiyana owo aapatisiwa. Olelo Venesiya onnaloca: “Olaleerya ni telefoni onnakumiherya mphurelo!”
Petro, ponkwe onakhala o Liperiya, wiiliwiili aanakusa itrataatu ni soolaleeryiwa ikina ayaaka osikola. Nihiku nimoha, asinthamwene awe oosikola yaahoona etrataatu Jovens—Como usarão sua vida? nave yaanachuna. Petro aavaanela ni yaawo sa etrataaru nave aahaakoha: “Tiheeni munahaalaanyu weera ni okumi anyu?” Mmoha a yaawo aakhula: “Kinachuna opharihela okumi aka wi kimurumeeleno Muluku.” Mwawiihiiha Petro aapacerya omuhusiha Piipiliya.
Mulopwana ni mwaariye o Polanta yaakhalano makacamiho a ereca, nave waanakhala woovila oya olaleerya. Mwawiihiiha awo yaanaarepala achu ikaarata. Mulopwana mmoha awaakhula: “Kinnathamalela masu anyu oohakararya. Soovira iyaakha raru mwaaraka okhwileiye, nave mu eyaakha evirale mwanaka ookhwa mu epahu.” Muthiyana mukina aahaarepela: “Ikaarata sanyu sookikhaviherya ohuserya eparipari. Imanle miyakha miili, vano kinoorepelaani ntoko murokoranyu Eekristu.”
[Ekaaxa va epaaxina 20]
MASU ATHARIHIWE
Oya vahoolo omunepani: Otitelela opaka matorokelo mu omuchu ahu wi nimutakiherye Yehova ni opaka yeeyo enamucicimiha. Otitelela olipiha onthamwene ahu ni Yehova, ni waaceererya nchuno na waarumeela akina ni opaka soothene nnaweryaahu wi naakhaviherye
Onamoona wa vanlakani: Ninnaavya elukuluku ya oya mmapuro ntoko mmaparkhini naari oneemelawo ikaaro, weiwo nnahaalaahu waaphwanyawo achu wi niwerye olocano. Voocharela, vaavaa nnavaanelaahu ni muchu, nnamukhalano ekari ya omuleela echu vooloca sa Yehova ni Piipiliya. Mukhalelo mukina wa onamoona wa vanlakani ori opharihela meesa naari ekarinya ya soolaleeryiwa