Mano Munnoona Okhweleya Waya Waavyakiha Akina?

“Etxhu kinohusihakani ti yaphama.”—MASIPOSIPO 4:2.

MACIPO: 93, 96

MWAAHAALA WAAKHULA HAI?

Ntakhara heeni ninnaphwanela waakhaviherya oohuserya a Piipiliya okhalano nchuno na ohuserya Soorempwa mukhataaya?

Nnii niwerye hai waakhaviherya avyaani ovaanela ni anamakhala ni akina?

Ntakhara heeni ninnaphwanela wiilipiserya wi naavyakihe akukhuli oomwaahiyu a muhuwo wa Muluku?

1, 2. Ntakhara heeni nnaphwanelaahu waavyakiha akina wi eyeno vahoolo miteko soomuluku?

YESU aalapa moowetha wi alaleeryi Omwene. Owo tho aamaliha elukuluku wi aavyakihe oohuserya awe. Aahiwooniherya mukhalelo wa ohusiha ni waakhapelela achu a Muluku. Awo yaahuserya okhala ntoko akukhula yaawo anakhapelela ipucepuche saya. (Mateu 10:5-7) Filipi aaweiwa mmuteko wa olaleerya, nyenya tho aahaavyakiha anaawe aasithiyana ophara muteko mmohamoha. (Saweriwa T’arummwa 21:8, 9) Olelo tho ti wookhweleya waavyakiha akina. Ntakhara heeni?

² Mmilokoni orukurerya elapo, aakhalamo achu ancipale nlelo ahipatisiwe. Avyaani yaala annachuna ovyakihiwa. Nnaphwanela waakhaviherya wiiwexexa ntakhara heeni ti yaphaama omwaalakhanya ni omuhuserya Piipiliya mukhataaya. Nave tho ti woochuneya waavyakiha olaleerya ni ohusiha michaka yaphaama. Anna yaawo apatisiwe hiihaanoru anaphwanela ovyakihiwa wi veelukuluku aya erumeele ntoko arummwa oorumeela ni atokweene. Achu oothene mmulokoni ananwerya opaka sincipale wi yaakhaviherye avyaani.—Masiposipo 4:2.

MWAAHUSIHE AVYAANI MUKHALELO WA OMUHUSERYA PIIPILIYA

3, 4. (a) Paulo iiwananinhe hai omuhuserya Piipiliya ni okhumelela phaama mmuteko woolaleerya? (b) Nihaakumve omuceenyerya oohuserya ahu wi amuhuseryeke Piipiliya mukhateiye, tiheeni nnaphwanelaahu opaka?

³ Ti woochuneya akapuro oothene a Yehova omwaalakhanya ni omuhuserya Piipiliya wi ehuserye teevi eri yookhwela ya Muluku. Murummwa Paulo aathariha ela wa anna ni arokora awe o Kolosi ariki: “Nkihin’ye wovekelelani kivekaka wi musareye osuwela wa okhwela wawe.” Ntakhara heeni waaryaaya wookhweleya wa yaawo waalakhanya ni ohuserya Soorempwa? Nthowa nawi eyo yaahaala waavaha miruku ni waakhaviherya wiiwexexa mukhalelo yaaphwanelaaya ‘otxhara metxelo awaphwanelela Apwiya wi yasivelihe mwa sothene.’ Eyo tho yaahaala waakhaviherya opaka “miteko saphaama” seiyo Yehova aachuneiye wi epake, xaxaxa olaleerya michaka yaphaama. (Kolosi 1:9, 10) Mwawiihiiha wakhala wi nnamuhusiha muchu, ti woochuneya omukhaviherya wiiwexexa wi omwaalakhanya ni omuhuserya Piipiliya moohihiyererya onammukhaviherya omurumeela Yehova.

⁴ Onahaala okhala woovila omukhaviherya oohuserya a Piipiliya wiiwexexa esisapo ya omuhuserya Piipiliya mukhateiye wakhala wi hiyaano hannamuhuserya Piipiliya mukhatiihu. Chiryene, wakhala wi ninnamwaalakhanya Piipiliya moohihiyererya ni wuupuwelela yeeyo naalakhannyaahu, enahaala onikhaviherya mu okumi ahu ni mmuteko woolaleerya. Ntoko yootakiherya, vaavaa nnayaahu mmuteko woolaleerya nave muchu anipakela nikoho noovila, nnahaala owerya ompharihela Piipiliya wi nimvahe naakhulo. Naari vaavaa nnaalakhanyaahu vooloca sa mukhalelo Yesu, Paulo, ni akina yaahaakookenlaaya muculi mmuteko aya woolaleerya, nnahaala olipiheya ni otitelela olaleerya naamwi okhalaka woovila. Nave vaavaa nnaaleelaahu akina yeeyo nihusenryaahu ni mukhalelo enikhavihenryaaya, nnahaala waaceenyerya omuhuserya Piipiliya mwawiiseela. Mwawiihiiha awo tho anahaala okhalano mphurelo woolikana.

5. Muloce mukhalelo wa waakhaviherya avyaani okhalano yookhovelela ya omuhuserya Piipiliya mukhataaya.

⁵ Akhweya munniikoha: ‘Kinii kimuvyakihe hai oohuserya aka omuhuserya Piipiliya moohihiyererya?’ Akhweya munaphwanela omooniha mukhalelo wa orehererya yoolaleeryiwa munamuhusihaanyu. Nave mmuleele wi aalakhanyeke sooleeliherya mu masu awaaceererya a liivuru Piipiliya Onahusiha Eheeni Chiryene? ni waalakhanya soorepa seiyo siromoliwe. Voocharela, munaphwanela omooniherya mukhalelo wa orehererya mithukumano wi awerye ovaha maakhulo. Mmuceenyerye wi amwaalakhanyeke Mulipeleli ni Despertai! Nave munaphwanela omooniherya mukhalelo wa ophwanya makoho a Piipiliya aakhuliwe. Ntoko yootakiherya, moorweela wa ompharihela Watchtower Library naari Watchtower ONLINE LIBRARY. Wakhala wi onneererya makhalelo yaala oohiyanahiyana mu yoohuserya ya muchu mukhateiye, owo onahaala osiveliwa ni yeeyo ni ochuna ohuserya sincipale.

6. (a) Munii mmukhaviherye hai oohuserya anyu wunnuwiha omusivela wawe Piipiliya mmurimani mwawe? (b) Tiheeni oohuserya a Piipiliya aahaaleiye osiveliwa weera waakhala wi ohunnuwiha osivela wawe ntakhara Soorempwa?

⁶ Vaavaa nnamuhusihaahu muchu, nnachuna wi aasuwele wi Piipiliya tasisapo, nthowa nawi onnamukhaviherya omusuwela phaama Yehova. Ohiya omukhinyererya ohuserya, nnaphwanela omooniherya mukhalelo onahaaleiye opuha yoohuserya. Vaavaa onamuhuseryeiye Piipiliya, onahaala woona ntoko namarepa a salmo yoowo iipale: “Yaphama aka ti okhala vakhiviru va Muluku, mwa Apwiya kòkuhamo ntxhawelo naka.” (Salumu 73:28) Chiri munepa wa Yehova onahaala omukhaviherya muchu yoowo onachuna omwaacamela yene.

MWAAVYAKIHE AVYAANI OLALEERYA NI OHUSIHA

7. Yesu aavyakinhe hai alaleeryi a michaka yaphaama? (Moone eruku yoopacerya.)

⁷ Nnanwerya ohuserya vancipale orweela wa mukhalelo Yesu aavyakinheiye arummwa awe. Yesu aanaakusa vaavaa aayeiye olaleerya, nave awo yaanamoona mukhalelo aahusiheiye achu. Owo tho aahaavaha malakiheryo vooloca sa mukhalelo yaaphwanelaaya olaleerya. (Mateu, ecima 10)^[1] (Moone masu avathi omakuchuwelo.) Mu elukuluku vakhaani, arummwa yaahuserya ni Yesu mukhalelo wa waahusiha achu eparipari. (Mateu 11:1) Haya vano nihuserye ichu piili nnaphwanelaahu waavyakiha avyaani weera, vaavaa anayaaya mmuteko woolaleerya.

8, 9. (a) Yesu aaloca hai ni mmoha ti mmoha mmuteko awe wa olaleerya? (b) Nnii naakhaviherye hai alaleeryi avyaani ovaanela ni achu hiiha ntoko Yesu eenreiye?

⁸ Ovaanela ni achu. Tahi wi Yesu mahiku oothene aanaloca ni muloko wa achu. Ikwaha ikina aaloca ni mmoha ti mmoha, nave eerano eyo monthamwene. Ntoko yootakiherya, owo aavaanela ni muthiyana yoowo aarwiile orika maahi veehimeni waacamela epooma ya Sikar. (Yohani 4:5-30) Yesu tho aaloca ni Mulevi iichaniwa Mateyu, namusokho, nave aanwopa okhala oohuserya awe. Mateyu aaheemererya nave ohoolo waya aanwopa Yesu ni akina wi yalye owannyawe. Weiwo Yesu aaloca ni achu ancipale.—Mateu 9:9; Luka 5:27-39.

⁹ Yesu tho aaloca mwaphaama ni Natanayeli, naamwi Natanayeli aalonce ichu sooheseya vooloca sa achu o Nasareti. Wa nthowa na Yesu oloca mwaphaama ni yene, Natanayeli aatoroka mukhalelo ooneiye vooloca sa Yesu, yoowo aarweenle o Nasareti. Nave Natanayeli aanachuna ohuserya sincipale sa Yesu. (Yohani 1:46-51) Orweela wa yootakiherya ya Yesu, ninnahuserya wi vaavaa nnalocaahu ni achu monthamwene nave mmukhalelo waphaama, awo anahaala osiveliwa owiriyana yeeyo nnalocaahu.^[2] (Moone masu avathi omakuchuwelo.) Vaavaa nnavyakihaahu avyaani oloca mmukhalelo yoola, anahaala osiveliwa vancipale ni muteko woolaleerya.

10-12. (a) Yesu aathokoronrye hai yaale yoonihenrye nchuno na michaka yaphaama. (b) Nnii naakhaviherye hai alaleeryi avyaani orehererya mavyakelo aya ntoko ahusiha a eparipari ya Mpiipiliyani?

¹⁰ Mwaahusihe yaale anachuna owiriyana. Yesu aamalinhe pahi iyaakha raru ni emeya mmuteko woolaleerya. Nyenya vaavaa achu yaarwaaya onwiriyana, owo aanamaliha elukuluku ni yaawo ni waahusiha ichu sincipale. Ntoko yootakiherya, nihiku nimoha muloko wa achu waathukumana osereserye wa eniya wi enwiriyane Yesu. Va nthowa nenla Yesu aawela mmwaaceyani ni Petro nave apacerya waahusiha achu. Ohoolo waya, owo aamuhusiha Petro echu yoochuneya. Yesu aapaka yootikhiniha mu weeriha wi Petro aphare ihopa sincipale. Voocharela aahi wa Petro: “Opacherya hihano onarwa-okhala mulipa-ototha atchu.” Mwawaakuveya Petro ni akina yaari ni yoowo “yápurulenlaya amwacheya’ya va mokoni, yáhiya sothe sene” nave emuchara Yesu.—Luka 5:1-11.

¹¹ Nikotemo aanachuna tho ohuserya sincipale sa Yesu. Nyenya woona wi Nikotemo aari mutokweene o Sinetrio, owo aanoova yeeyo akina yaahaalaaya oloca wakhala wi aamoona alocaka ni Yesu. Mwawiihiiha aamusekurya Yesu ohiyu. Yesu haamwiikanre, opwaha yeeyo aamaliha elukuluku ni yoowo nave aamutharihela iparipari sookhweleya. (Yohani 3:1, 2) Yesu wiiliwiili aanapharihela elukuluku awe wi aahusihe achu eparipari ni olipiha nroromelo naya. Moolikana, nnaphwanela wiiveleela waaxekurya achu mu elukuluku yoophwanelela wa yaawo, nave nnaphwanela omaliha elukuluku ni yaawo naakhaviheryaka omwiiwexexa Piipiliya.

¹² Vaavaa nnalapaahu ni alaleeryi avyaani mmuteko wa olaleerya, nnaphwanela waahusiha mukhalelo wa okookela omuxekurya muchu yoowo orino nchuno na ovaanela wanaawiili. Ti wookhweleya tho waawopa avyaani wi enihoole mu oxekurya ni weeciha soohuserya sa Piipiliya. Weerano hiiha, awo anahaala ohuserya mukhalelo wa waahusiha akina nave anahaala woona oreera waya waakhaviherya achu ohuserya eparipari vooloca sa Yehova. Voocharela, avyaani awo anahaala osiveliwaka waaxekurya achu ni waahusiha Piipiliya. Awo tho anahaala ohuserya okhala oopisa murima ni ohivelavela mwawaakuveya, vaavaa ahinaweryaaya waphwanya achu mmawannyaya.—Galasya 5:22; moone ekaaxa “Owo Haavelavenle.”

MWAAVYAKIHE AVYAANI WAARUMEELA ASINNAYA

13, 14. (a) Tiheeni munuupuwelaanyu sa sootakiherya sa Mpiipiliyani sa yaale yiiveleenle waakhaviherya akina. (b) Mmikhalelo taani muneeraanyu mwaavyakihe alaleeryi avyaani ni amiravo waasivela anna ni arokora aya?

¹³ Yehova onachuna wi akapuro awe esivelaneke mukina ni mukhwaawe ntoko anna ni arokora nave erumeelaneke mukina ni mukhwaawe. (Mwaalakhanye Luka 22:24-27; 1 Pedro 1:22.) Piipiliya onnaloca wi Yesu oovaha soothene, ophitaanyerya okumi awe, wi aakhaviherye akina. (Mateu 20:28) Tapitha “àsareya saphama sintxipale ni samahala avaheiye.” (Saweriwa Tʼa-rum-mwa 9:36, 39) Mariya ‘aanalapa’ moowetha ntakhara anna ni arokora awe o Roma. (Aroma 16:6) Nnii naakhaviherye hai avyaani wiiwexexa wi ti wookhweleya opaka ichu saphaama ntakhara asinna ni arokora?

¹⁴ Nnaphwanela waawopa avyaani okhala ni hiyaano vaavaa nnayaahu omuxekurya muchu awuuluvala naari yaale aniiceliwa. Atokweene anaphwanela waawopa amiravo naari avyaani olapa vamoha wakhala wi annachuna waavaha yoolya awuuluvala naari opaka miteko mikina owannyaya. Vaavaa amiravo ni avyaani anoonaaya mukhalelo anna ni arokora anakhaviheryanaaya mukina ni mukhwaawe, awo anahaala ohuserya weerano emohamoha. Ntoko yootakiherya, vaavaa yaalaleeryaaya mu ekulucu, mutokweene wiiliwiili aanaaxekurya anna yaawo yaakhala weiwo wi asuwele sa ekumi aya. Mmiravo mmoha yoowo aakhala ni yene aahuserya orweela wa yootakiherya yaphaama ya mutokweene ola, wuupuwelela yeeyo aaphwaneleiye weera wi aakhaviherye anna ni arokora awe.—Aroma 12:10.

15. Ntakhara heeni ti wookhweleya atokweene osuwela phaama oya vahoolo wa alopwana mmulokoni?

¹⁵ Yehova ohaavaha alopwana murici wa ohusiha Masu a Muluku mmulokoni. Mwawiihiiha ti wookhweleya wa anna ohuserya mukhalelo wa ohusiha phaama vaavaa analocaaya miyaha sa vanlakani. Wakhala wi mwa mutokweene, akhweya munaphwanela onwiriyana murummwa oorumeela vaavaa onaperekheiye mwaha wa vanlakani ni omukhaviherya orehererya. (Nehemiya 8:8)^[3]—Moone masu avathi omakuchuwelo.

16, 17. (a) Paulo oonihenrye hai wi aanapwacha oya vahoolo wa Timoteo? (b) Atokweene eni ewerye hai waavyakiha akukhula oomwaahiyu a mmulokoni?

¹⁶ Ti woochuneya waavyakiha anna wi ekhale akukhula mmulokoni. Paulo aamuvyakiha Timoteo nave aamuceenyerya waavyakiha akina. Paulo aaloca: “Wilipihe mmahalani mwa Yesu Kristu. Nave yele ohusenryawe ni miyo vamithoni va anamona antxipale, walèle atxhu òroromeleya anawerya wahusiha akhwaya.” (2 Timóteo 2:1, 2) Timoteo aahuserya ichu sincipale orweela wa Paulo, yoowo aari mutokweene ni murummwa, hiiha ntoko mukhalelo wa orehererya olaleerya wawe ni waakhaviherya akina mmulokoni.—2 Timóteo 3:10-12.

¹⁷ Paulo aamaliha elukuluku yincipale ni Timoteo nthowa nawi aachuna osuwela phaama waakhanle wi Timoteo aavyakiheya phaama. (Saweriwa T’arummwa 16:1-5) Atokweene ananwerya omutakiherya Paulo moorweela wa waawopa arummwa oorumeela okhala ni yaawo vaavaa anayaaya okukhula. Mmukhalelo yoola, arummwa oorumeela anahaala ohuserya orweela wa atokweene mukhalelo wa waahusiha akina, okhala oopisa murima ni oosivela, ni mukhalelo wa omuroromela Yehova vaavaa aneecihaaya muhuwo.—1 Pedro 5:2.

OVYAKIHA TI WOOCHUNEYA

18. Ntakhara heeni waavyakiha akina mmuteko wa Yehova ti yookhweleya wa hiyo?

¹⁸ Mmahiku yaala ookuchula, ti woochuneya waavyakiha avyaani orehererya mavyakelo aya mmuteko wa olaleerya. Onnachuneya tho anna ohuserya mukhalelo wa okhapelela muloko. Yehova onachuna akapuro awe oothene okhala oovyakihiwa phaama, nave onnanivaha ekari ya waakhaviherya avyaani. Mwawiihiiha ti woochuneya olapa moowetha wi naavyakihe akina, hiiha ntoko Yesu ni Paulo yeenraaya. Ti woochuneya waavyakiha ancipale nthowa nawi wookhalavo nlelo muteko muncipale wa olaleerya, makuchuwelo ehaakumve ophiya.

19. Ntakhara heeni munaphwanelaanyu ororomela wi wiilipiserya wanyu wa waavyakiha akina mmuteko wa Yehova onahaala okhumelela phaama?

¹⁹ Onachuneya wiilipiserya ni elukuluku ya waavyakiha avyaani. Nyenya nnaphwanela ororomela wi Yehova ni Yesu anahaala onikhaviherya osuwela mukhalelo wa waavyakiha akina mwaphaama. Nnahaala ohakalala owoona yaale naavyakinhaahu ‘ewanaka ni miteko’ sa mmulokoni naari mmuteko wa olaleerya. (1 Timóteo 4:10) Mu elukuluku emohamoha, nnaphwanela otitelela opaka owetha wahu oya vahoolo omunepani, orehererya makhalelo ahu Eekristu, ni omwaacamela Yehova.

[Masu a vathi]

[Yooleeliherya va epaaxina 23]

Vaavaa nnalocaahu ni achu monthamwene nave mmukhalelo waphaama, awo anahaala osiveliwa owiriyana yeeyo nnalocaahu

[Ekaaxa va epaaxina 22]

Owo Haavelavenle

Avyaani anaphwanela ohuserya okhala oopisa murima vaavaa analaleeryaaya. Munna mmoha o Kaana aaheererya ikwaha sincipale omphwanya mmiravo yoowo aamvanheiye soolaleeryiwa sa Piipiliya. Nyenya elukuluku yoothene, aammuchawa munna. Isumana sincipale ohoolo waya, munna owo aamphwanya wanaawiili, nyenya mmiravo ole haachuna oloca ni yene. Nlelo munna havelavenle nave aahiivaha omooniherya mukhalelo wa omuhuserya Piipiliya. Mmiravo owo aaheemererya, nave apatisiwa mmuthukumano wa ekulucu mu miyeeri vakhaani.

[Ekaaxa va epaaxina 26]

MASU ATHARIHIWE

Atokweene annaakukhula achu a Muluku: Atokweene annaakhapelela anna ni arokora a mmulokoni. Awo analikana ni akukhula yaawo anakhapelela ipucepuche. Atokweene annampharihela Piipiliya wi yaaceenyerye akina ni olipiha nroromelo naya. Awo tho aakhalano murici wa waahoolela, waakhapelela, ni waahusiha achu a Muluku. Ti woochuneya atokweene waavyakiha anna wi awo tho ewerye waakhaviherya okhapelela muloko