Yohuserya 12

Mano Tiheni Yeyo Enereya Mu Okhwa?

Okhwa ti ohiyana ni okumi. Okhwa ori ntoko ikhove itokwene. (Yohane 11:11-14) Alipa okhwa hanawerya wiiwa, woona, olocha nari wupuwela. (Eklesiasti 9:5, 10) Ekeresha yowoka enahusiha wii alipa okhwa anaya wilaponi ya minepa wi yakhaleke ni makholwaaya akhwiye. Ela haiyene ti yeyo Biblia onahusihiiye.

Yawo akhwiiye hanawerya onikhaviherya, nari onerela yoonanara. Ti wokhoveleleya wa atchu omuhela makeya yowo awo anaroromelaya wii anahaala wahakalaliha alipa okhwa. Eyo henamuhakalaliha Muluku, nthowa nawii yiithipenle mu wotha wa Satana. Honaweryeyaru wahakalaliha alipa okhwawo, nthowa nawii awo hanono okumi. Hinnaphwanela owoova nari waathamalela alipa okhwa. Nnaphwanela omuthamalela Mulukuru pahi.—Mateyu 4:10.

Alipa okhwa enarwa ekhalatho akumi. Yehova onahaala waviiha alipa okhwa wii ekhale mu elapo ya paradaiso. Elukuluku ya yawereya ela nlelo eri muholo. (Yohane 5:28, 29; Saweriwa Tarummwa 24:15) Muluku onnawerya waviiha alipa okhwa ntoko mummo nyuwo munanviiheryanyu mutchu akonaka.—Marko 5:22, 23, 41, 42.

Mawupuwelo awii hiyo hinnakhwa ta wotha weiwo wulanihiwe ni Satana, Musaserya. Satana ni masololo awe annaweriha atchu wupuwelaka wii minepa sa alipa okhwa sokhala ni okumi nave sinnaruha irecha ni sokachamiha sikina. Satana onnaawoka atchu, vakina vaya orwela mu oloha ni wona sa malavi. Yehova onnavanyihanano yawo anavyavya olochaka ni alipa okhwa.—Detronomiu 18:10-12.