Michaka ya Omwene N.° 37

Michaka Ya Elapo Yoothene Yavathi

Makuchuwelo A Malapelo Atheru Annaacamela!

▪ Mano malapelo atheru tiheeni?

▪ Awo enii ekuchuwe mwawiihayi?

▪ Mano nyuwo munaya ophwanyiwa mwawiihayi?

Malapelo atheru tiheeni?

Mano nyuwo munnathanana nthowa na ichu soonanara inapakiwa mu nsina na malapelo? Nyuwano munuupuwela wi ikhoco, onamahita, ni onanara oneeriwa ni achu analoca wi annamurumeela Muluku, ti ekhaikhai? Mano ntakhara heeni malapelo atheru ekhanlaaya mutathari wa makachamiho mancipale? Tahi malapelo oothene arino nthowa, nyenya nthowa nri ni malapelo atheru. Yesu Kiristu oothonyerya wi malapelo atheru anneeriha wi achu epakeke saweera soonanara, hiihaa ntoko “mwiri wawucha onima sawima sonanara.” (Mateyu 7:15-17) Mano tisivi siri sawiima sa malapelo atheru?

Sawiima sa Malapelo Atheru

◼ MALAPELO ATHERU ANNAVOLOWELA IKHOCO NI IPOLIITIKA: Ejornali Asiaweek yooloca wi: “O Ásia hiihaa ntoko mapuro makina, ahooleli a malapelo atheru annapharihela muteko ikuru sawuupa, mwawiihihaa annalamulela mawuupuwelo a achu wi epakeke soochuna saya mukhataaya.” Ejornali eyo yoolopola: “Achu mweelaponi ananvira eriki mutepa okhala oonanara.” Mutokweene a malapelo o Estados Unidos ooloca: “Nnaphwanela owiipha anamahita wi nimalihe wiiphana.” Onaya weera eheeni? “Niwiiphe anamahita oothene mu nsina na Muluku.” Moohiyana ni yeeyo, Piipiliya onii: “Mutchu alocha wi, Kinnamusivela Muluku, aníchanano munneni, ori awotha.” (1 Yohane 4:20) Yesu tho oriye: “Musivelaneno amwichani anyu.” (Mateyu 5:44) Mano malapelo taani nyuwo munuupuwelaanyu, yaawo arino achu aya anakhaviherya ikhoco?

◼ MALAPELO ATHERU ANNAHUSIHA MAHUSIHO OOWOKA: Malapelo mancipale anahusiha wi muchu ookhalano echu yohooneya yeeyo enapwahiherya okhala ekumi vaculi va okhwa wa mwiili. Mwa opharihela muteko ehusiho ela, malapelo mancipale annaahooxa achu aya, yaavekaka ikhorowa wi evekelele minepa seiyo. Nyenyanto Piipiliya onahusiha echu yoohiyana. “Muchu onacheka . . . yoowo toni akhwe.” (Ezekieli 18:4, Tradução do Novo Mundo) “Achu akumi annasuwela wi enarwa ekhwa, nyenya achu ookhwa, hanasuwela echu eri yoothene.” (Eklesiasti 9:5, NM) Yesu oohusiha wi achu ookhwa enarwa eviihiwa m’mahiyeni—ovinya muukhwani hokaakhanle woochuneya waakhanle wi achu yaakhalano echu ehinakhwa chiryene. (Yohane 11:11-25) Mano malapelo anyu anahusiha wi muchu ookhalano echu ehinakhwa?

◼ MALAPELO ATHERU ANNEEMERERYA MAKHALELO A OKONIHANA WOOHIPHWANELELA: Mu ilapo sincipale, malapelo atheru anneemererya wi achu anakonihana ni oophwanaphwana mwikho ekhale alipa a ephepa, nave annaveka ipooma wi seemererye othelana wa achu oophwanaphwana mwikho. Nari tho ikerexa inawateela mararuwo sinneemererya wi ahooleli a malapelo yaawo yaakoninhe anamwane epwahiherye okhala ahooli. Mano Piipiliya onahusiha eheeni vooloca sa makhalelo a okonihana woohiphwanelela? Mwawiiweyaxa Piipiliya onii: “Muhihuwelihiwe; achapaheya, nari óthamala sophwaniherwa, nari ónvemula, nari óchétcheya ni sonanara, nari awípahula ni alopwana . . . herwa-evolowa omwene wa Muluku.” (1 aKorinto 6:9, 10) Mano nyuwo moosuwela malapelo aneemererya makhalelo a okonihana woohiphwanelela?

Mano taavi enii ekhale makuchuwelo a malapelo aniima sawiima soonanara? Yesu oolopola: “Miri yothene yohima yawima yosiva, enathikiliwa evonyiwa o moroni.” (Mateyu 7:19) Aahee, malapelo atheru, enarwa ethikiliwa nave etoloxiwa khuluwi! Nyenya ti mwawiihayi nave ti liini ela enayaaya weereya? Yawooneya yooloherya erempwe mu Yawupulula, liivuru a Piipiliya, ikapitulu 17 ni 18, ennaakhula.

Mano malapelo atheru anaya okuchuwa mwawiihayi?

Uupuwelani ela. Muthiyana a mararuwo mmoha arikimkilathi va’namani yorumaala. Enama eyo erino miru mithanu na miili ni manyaka khumi. (Yawupulula 17:​1-⁠4) Mano muthiyana a mararuwo owo oneemelela eheeni? Owo onnavolowela “mamwene a elapo” yavathi. Muthiyana owo onwanre koveka, onnapharihela muteko sawunkhela, nave okhalano muhakhu muncipale. Nave moorweela wa saweera sawe sa olosiwa, ‘maloko oothene aahuwelihiwa.’ (Yawupulula 17:​18; 18:​12, 13, 23) Piipiliya onnanikhaviherya hiyo osuwela wi muthiyana a mararuwo ola ti marehereryo oothene a malapelo atheru veelaponi. Muthiyana owo haneemelela ekerexa emoha pahiru hooye, nyenya oneemelela malapelo oothene yaawo aniima sawiima soonanara.

Enama yeeyo muthiyana a mararuwo owo owenleiye enasiphela ikuru sa epoliitika sa elapo.a (Yawupulula 17:​10-⁠13) Malapelo atheru anawela oculi wa enama ya epoliitika ela, va weererya ovolowela olamulela waya ni ohoolela meecelo aya.

Moohilekela enahaala weereya, echu yootikiniha. “Nave manyaka khumi wonná va’namani, iha sinarwa-síchana ni muthiana a mararuwo’wo, nave sinarwa-simwíkarela va mekhiye’vo, ni épwitikiri, sikhúra ethai awe, simweyela ni moro.” (Yawupulula 17:​16) Mootutuxa ikuru sa epoliitika sa elapo inahaala ohiphela malapelo atheru ni waatoloxa awo mwawaakhwanela! Mano tiheeni enii etannye yaweereya ela? Yawupulula, liivuru a Piipiliya onnaakhula: “Muluku távahiliye m’murima mwaya werano okhwela wawe.” (Yawupulula 17:​17) Aahee, Muluku onarwa alokoherya mulacu malapelo atheru ntakhara ichu soothene soonanara seiyo onapakeiye mu nsina nawe. Ni ekhaikhai yoophaameya, Muluku onahaala opharihela muteko epoliitika, anthamwene a malapelo atheru, ntoko ekopo awe ya otoloxa.

Mano tiheeni nyuwo munaphwanelaanyu weera wakhala wi hamunachuna otoloxiwa vamoha ni malapelo atheru? “Khuma’mmoni mummo, atchu aka,” onnalopola murummwa a Muluku. ( Yawupulula 18:⁠4) Chiryene, hiihaano ti elukuluku ya ochawa mu malapelo atheru! Nyenya nyuwo munaya ochawela woowi? Muhichawele wa achu anii Muluku havovo, nthowa nawii awo tho hanono ewehereryo. (1 aTesalonika 1:​6-⁠9) Nikhuku nimoharu pahi nri mpuwa mwa malapelo eeparipari. Mano nyuwo munii muwerye hayi osuwela malapelo eeparipari?

Nnii nsuwele mwawiihayi malapelo eeparipari

Mano malapelo eeparipari anaphwanela wiima sawiima taani saphaama?—Mateyu 7:17.

Sawiima sa Malapelo Eeparipari

◼ ENASUWANYEIHA MALAPELO EEPARIPARI TI OSIVELA: Alipa oothamalela eeparipari “hari a elapo ya vathi,” hari omwalanya mwa maloko nari makhalelo, nave ‘annasivelana variyari va yaawo mukhataaya.’ (Yohane 13:35; 17:16; Saweriwa Tarummwa 10:34, 35) Ohiya wiiphanaka mukina nimukhwawe, awo anniiveleela okhwa ntakhara akina wakhala wookhweleya.—1 Yohane 3:16.

◼ AKIRISTU EEPARIPARI ANNAROROMELA MASU A MULUKU: Ohiya ohusiha “ikano” ni “mahusiho, malamulo a atchu” malapelo eeparipari anathipela mahusiheryo aya mu Masu a Muluku, Piipiliya. (Mateyu 15:6-9) Ntakhara heeni? Nthowa nawii “Sorempwa sothene sávereliwe ti Muluku, nave sinnaphwanyerya etchu vohusiha, oványa, maryeheryo, mathoriheryo a wikhaikhai.”—2 Timoteo 3:16.

◼ MALAPELO EEPARIPARI ANNALIPIHA ICHOKO NAVE ANNAKHAVIHERYA MAKHALELO APHAAMA AVASULU: Malapelo eeparipari annaahusiha alopwana wi ‘yasiveke áraya a yawo mekhaya wi ntoko míli ya yawo mekhaya,’ annaakhaviherya athiyana wi ‘yuupuweleke wi ewooveke nari yaacicimiheke alopwana aya,’ nave enaahusiha anamwane wi ‘ewiiweleleke asitiithi aya yawo yayanre.’ (aEfeso 5:28, 33; 6:1) Moophitaanyerya, oothene yaale arino mirici sa olamulelo anaphwanela ovaha yootakiherya yaphaama ya makhalelo aphaama.—1 Timoteo 3:1-10.

Mano aakhalavo malapelo mamoha anakhwaaniherya makhalelo yaala? Liivuru Holocaust Politics (Epoliitika ya AYuuta ya Owiipha Achu a Nloko Nikina), olaleeryiwe mu 2001 oriye: “Waakhanle wi achu ancipale anakhala moovarihana ni mahusiheryo ni makhalelo a Anamoona a Yehova, wiiphana wa maloko mancipale onatannya makachamiho ni masoso veelaponi waammala.”

Chiryene, Anamoona a Yehova mu ilapo 235 hanoona olaleerya pahiru makhalelo aphaama a Piipiliya, nyenya annapharihela muteko makhalelo awo mu ikumi saya. Hiyaano ninnovekaani nyuwo wi mwaakohe Anamoona a Yehova wi yookhaviheryeni ohuserya yeeyo Muluku onachuneiye wa nyuwano, mwawiihihaa munahaala omulapela Muluku mu makhalelo aweemereryiwa ti yoowo. Hiihaano, nyuwo munaphwanela weera echu mwawaakuveya. Muhilekele. Makuchuwelo a malapelo atheru annaacamela!—Zofoniya 2:2, 3.

Wakhala wi nyuwano munnachuna miseelo sawaacereryeya, vooloca sa michaka irino mathipelo a Piipiliya, seiyo inalaleeryiwa ti Anamoona a Yehova, ninnovekaani wi muloce ni yaawo moorweela wa ephiro enacharela.

□ Miyo kaanachuna kaakhele ebrochura emoha enii Muluku Ontchuna Eheni Wahiyano?

□ Khwoo locani ni miyo ntakhara mahusiheryo a Piipiliya a echoko, oohiliveliwa.

[Nsu na vathi]

[Yooleeliherya va epaaxina 3]

“Khuma’mmoni mummo, atchu aka”

[Yooleeliherya va epaaxina 3]

Malapelo atheru annavolowela “mamwene a elapo” yavathi