YOOHUSERYA 16

Tuuvi ori Muteko wa Arummwa Oorumeela?

Murummwa oorumeela akhaviheryaka okawa soolaleeryiwa — Miyanmar

Murummwa oorumeela alocaka mwaha — Mwaha mmuthukumanoni

Murummwa oorumeela eecihaka muthukumano wa muteko woolaleerya — Nikhuuru na orummwa

Murummwa oorumeela akhaviheryaka orehererya Empa ya Omwene — Orehererya Empa ya Omwene

Piipiliya onnaloca makhuuru meeli a alopwana Eekiristu arino murici wa okhapelela muloko—“alipa oweherya ni arummwa.” (Afilipi 1:1) Muloko ori woothene onnakhalano anna ancipale anarumeela. Muteko taani arummwa oorumeela aneeraaya wi enikhaviherye?

Awo anakhaviherya nikhuuru na atokweene. Arummwa oorumeela alopwana awunnuwa mmunepani, oororomeleya, akina amiravo, akina ahuuluvala. Awo anakhaviherya miteko sookhweleya sa mmulokoni. Eyo ennaweeriha atokweene okhala ooweiwa ni murici wa ohusiha ni okukhula.

Awo anneerano muteko wookhweleya. Arummwa oorumeela akina annathanliwa ntoko athoonyeryi wi ewaakheleke achu oothene anaphiya mmithukumanoni. Akina anakhaviherya makupa a sooruma, waakawa aliivuru, okhapelela ikhorowa sa muloko, ni orehererya mapuro a olaleerya wa anna a mmulokoni. Awo tho annakhaviherya orehererya Empa ya Omwene. Atokweene annaveka arummwa oorumeela wi yaakhaviherye awuuluvala. Muteko ori woothene arummwa oorumeela anaakhelaaya, anneerano, nave muloko onnaacicimiha yaawo nthowa na wiiveleela waya.—1 Timoteo 3:13.

Awo annavaha ntakiheryo naphaama ntoko alopwana Eekiristu. Arummwa oorumeela anathanliwa nthowa na mikhalelo saya saphaama soomunepani. Vaavaa awo analocaaya miyaha mmithukumanoni, awo annalipiha nroromelo nahu. Moorweela wa ovaha yootakiherya yaphaama mu olaleerya, awo annanceenyerya okhala a mvai. Nthowa na wiiveleela ni okhaviherya waya, awo annatetheeryela ohakalala ni wiiwanana. (Aefeso 4:16) Voovira wa elukuluku, awo tho ananwerya ophwanelela wi erumeele ntoko atokweene.

Arummwa oorumeela alopwana a mukhalelo taani?
Arummwa oorumeela anakhaviherya hai wi muloko weece phaama?