Arummwa Oorumeela Annapaka Muteko Wookhweleya

MURUMMWA Paulo aahirepela muloko wo Filipi: “Paulo ni Timoteo, akapuro a Yesu Kristu, wa awéla murima othene mwa Kristu Yesu, yawo enakhala o Filipi, vamoha ni alipa-oweherya ni arummwa [oorumeela].” (Fil. 1:1, NN) Moone wi owo aahaathamalela arummwa oorumeela. Mwawooneya, alopwana yaala yaanalapa muteko woochuneya yaakhaviheryaka asitokweene mmulokoni mweelukuluku yeele. Olelo tho enneereya emohamoha. Arummwa oorumeela annalapa miteko seiyo sinaakhaviherya ahooleli nave eyo ennaaceererya wiiwanana mmulokoni.

² Apwanne mohaasuwela arummwa oorumeela a mmulokoni mwanyu? Apwanne munnasuwela muteko analapaaya wi yookhaviheryeeni vamoha ni muloko woothene? Mweeparipari, Yehova onnavaha esisapo wiilipixerya wa alopwana yaala. Paulo oorepa: “Yaalapaka phaama, ekaamucicimihiwa, ekhalano nthiti, elocaka mu nroromelo na mwa Kristu Yeesu.”—1 Tim. 3:13.

MIKHALELO SOOCHUNEYA SA MPIIPILIYA WA ARUMMWA OORUMEELA

³ Enaweheryiwa wi arummwa oorumeela ekhale yootakiherya yaphaama, ekhale alopwana oocicimiherya ni okhapelela phaama murici aya. Eyo tiyawooneya vaavaa nnathokororyaahu yeeyo Paulo aalonceiye sa mikhalelo siri soochuneya mu ekaarata awe wa Timoteo: “Emohamoha tho alipa ookhaviherya [naari arummwa oorumeela, TNM] ekhaleke oophwanelela, oohireeriha mwaha, oohiwuryasha eviinyu, ni ohaavyaavya muhakhu. Ekhapelele yawiiphini yuupululiwe mu nroromelo erino eleela murima yooreera. Yaala tho epacerye ovareriwa, yahikhalano nthowa enalapa. Alipa ookhaviherya ekhaleke mulopwana a muthiyana mmoha, oweeciha phaama anamwane awe ni echoko awe ene.” (1 Tim. 3:8-10, 12) Vaavaa muloko onacharihaaya malakiheryo avasulu wa arummwa oorumeela, muloko onnakhapeleleya vooloca sa wootheriwa wa alopwana anaakhela mirici savameekhaaya.

⁴ Moohipwacha iyaakha saya, arummwa oorumeela ta mvai mmuteko woolaleerya mweeri ti mweeri. Emutakiheryaka Yesu, awo annooniherya mvai mmuteko woolaleerya. Mvai owo ennooniherya nchuno na Yehova na waavuluxa achu.—Isa. 9:7.

⁵ Arummwa oorumeela yootakiherya yaphaama tho mmukhalelo wa wiirehererya, mmawarelo, mmalocelo, mmeerelo ni mu saweera. Awo tamiruku, nave eyo ennaweeriha akina enaacicimiha. Ohiya yeeyo, awo annavaha esisapo onthamwene aya ni Yehova ni ikari saya sa orumeela mmulokoni.—Tito 2:2, 6-8.

⁶ Alopwana yaala apacenrye “ovareriwa.” Ehaakumve othanliwa, awo yaahooniherya wi chiryene alopwana awiiveleela. Awo yaanooniherya wi annahela va nipuro noopacerya Omwene wa Muluku mu ekumi aya nave anniilipixerya wi ephwanye murici vyakala onaweheryiwa wa yaawo. Chiryene, awo yootakiherya yaphaama wa akina a mmulokoni.—1 Tim. 3:10.

MITEKO ANAPAKAAYA

⁷ Arummwa oorumeela annalapa miteko soohiyanahiyana ntakhara anna ni arokora, eyo enneeriha wi asitokweene ekhalekeno elukuluku ya okhapelela mirici sa ohusiha ni okukhula. Yaawaavahaka makupa, nikhuuru na asitokweene nnavarerya mavyakelo ni soothowa sa vamulokoni.

⁸ Muthokororye miteko mikina sa seiyo: Murummwa oorumeela onanwerya othanliwa wi akhapeleleke soolaleeryiwa sa opharihela muchu mukhateiye ni opharihela mmuteko woolaleerya. Akina annathanliwa wi ekhapeleleke soorepela sa ikhorowa naari soorepela sa ikulucu. Akina annathanliwa okhaviherya ni mikrofoni, orumiha ikhankoonya, orumeela ntoko athoonyeryi ni waakhaviherya asitokweene mmiteko mikina. Orehererya Empa ya Omwene onakhalavo muteko mutokweene, ti nthowa nene ikwaha sincipale anavekiwaaya arummwa oorumeela wi ekhaviherye ni okhapelela mirici seiya.

⁹ Mmiloko mikina akhweya murummwa oorumeela onnavahiwa murici mmoha wa seiya. Miloko mikina, murummwa oorumeela akhweya onnakhapelela mirici mincipale. Mmikhalelo mikina, arummwa eeli naari awaaca annathanliwa okhapelela murici mmohamoha. Yakhala wi haavo arummwa oorumeela awaakhwanela wi ekhapeleleke mirici seiya, nikhuuru na asitokweene nnanwerya waathanla anna oopatisiwa arino yootakiherya yaphaama wi yeerekeno yeeyo enachuneya. Hiiha, awo anamukhalano mavyakelo yaawo anahaala waakhaviherya yathanliwa okhala arummwa orumeela. Wakhala wi haavo anna awaakhwanela, onanwerya ovekiwa murokora orino yootakiherya yaphaama wi akhaviherye mu ichu ikina, naamwi owo ahithanliwaka okhala murummwa oorumeela. Muchu a ntakiheryo naphaama ti yoowo meecelo awe ni omulapela wawe Muluku onooniwa okhala woochuneya otakiherya. Onakhala yootakiherya yaphaama wa akina vooloca sa ophwanyeya mmithukumano, oya mmuteko woolaleerya, okumi wa veechokoni, othanlela wawe mathatelo ni mukhalelo wa mawarelo ni ophwaneliwa wawe ni mmikhalelo mikina.

¹⁰ Mmilokoni arimo asitokweene vakhaani, arummwa oorumeela amavyakelo ananwerya othanliwa wi ethokororye vamoha ni alipa awiiveleela ntakhara opatiso makoho aniiwanana ni miyaha sa mahusiheryo. Makoho yaawo ari mu Masu Awaaceererya, “Nikupa  1: Soororomela Seekristu.” Woona wi “Nikupa 2: Okumi Weekristu”, nnaloca miyaha soovila iniiwanana ni makhalelo a muchu, nikupa nenla nnaphwanela othokororyiwa ni mutokweene.

¹¹ Yakhalavo mathowa aphaama, nikhuuru na atokweene akhweya nnamoona wi ti yaphaama otoroka murici wa murummwa oorumeela wi emunnye mukina. Nto sinnakhalavo miphurelo wakhala wi munna onakhapelela murici mmohamoha mu ilukuluku sincipale wi akhaleno mavyakelo.

¹² Mwawiiwanana ni mikhalelo sa vanipuro, akhweya inamukhalavo mirici mikina sinaphwanela okaweliwa arummwa oorumeela oya waya vahoolo onooniwa ni “oothene.” (1 Tim. 4:15) Wakhala wi haavo asitokweene awaaca, murummwa oorumeela onanwerya othanliwa wi arumeeleke ntoko mukhaviheryi a ooweherya a nikhuuru na olaleerya naari, vakina vaya ntoko murummwa a nikhuuru na olaleerya, ahooleliwaka ni asitokweene. Arummwa oorumeela ananwerya othanliwa wi epakeke makupa a Okumi ni Muteko Ahu Weekristu, weeciha Yoohuserya ya Piipiliya ya Muloko wakhala woochuneya, ni oloca miyaha sa vanlakani. Arummwa oorumeela ananwerya waakhela mirici mikina wakhala wi wookhalavo othowa nave wakhala wi annaakhwaniherya mikhalelo siri soochuneya sa murici yoowo. (1 Ped. 4:10) Vaavaa anaakhaviheryaaya asitokweene, arummwa oorumeela anaphwanela wiiveleela.

¹³ Naamwi miteko saya iri soohiyana ni sa asitokweene, miteko iho nlelo ti saweela wa Muluku nave ti sookhweleya mmulokoni. Mweelukuluku aya, wakhala wi murummwa oorumeela onnaakhwaniherya phaama mirici sawe nave oophwanelela ntoko mukukhula ni muhusiha, owo onanwerya weemereryiwa orumeela ntoko mutokweene.

¹⁴ Mwaari mmiravo naari mwaapatisiwe hiihaanoru, apwanne munniilipixerya wi mphwanelele okhala murummwa oorumeela? (1 Tim. 3:1) Iyaakha soothene, achu ancipale anneemererya eparipari, mwawiihiiha annachuneya alopwana awiichwelavo omunepani wi ekhapeleleke mirici sa mmulokoni. Nyuwaano munanwerya wiilipixerya ophwanya ekari yeela munnuwihaka nchuno na waakhaviherya akina. Echu emoha ya weerano ori wuupuwelela yootakiherya yaphaama ya Yesu. (Mat. 20:28; Yoh. 4:6, 7; 13:4, 5) Nchuno nanyu nnahaala waaceereryeya vaavaa munoonaanyu ohakalala onakhalavo mu ovaha. (Saw. 20:35) Mwawiihiiha, mwiivahe waakhaviherya akina, okhaviherya orehererya Empa ya Omwene naari oraceela mmakupa a Okumi ni Muteko Ahu Weekristu. Wiilipixerya okhala murummwa oorumeela onaphitaanyerya tho okhalano mikhalelo soomunepani moorweela wa okhalano yoohuserya ya muchu mukhateiye. (Sal. 1:1, 2; Gal. 5:22, 23) Ohiya yeeyo, yoowo oniilipixerya mmukhalelo yoola onnooniherya wi toororomeleya vaavaa onaakheleiye makupa mmulokoni.—1 Kor. 4:2.

¹⁵ Arummwa orumeela anathanliwa ni munepa waweela wi ekhaviherye muloko. Oothene mmulokoni ananwerya wooniherya wi annathamalela muteko wakuru wa arummwa oorumeela elapaka vamoha ni yaawo vaavaa awo anakhapelelaaya mirici athanleliwaaya. Hiiha, muloko onnooniherya wi onnathamalela yoovaha ya Yehova wi emusi awe ekhale yooreheryeya.—Gal. 6:10.