Nahano Onnakookela Okhala Mukumi!

Xairo onnoona wi muthiyana avuuva nikhami oopenuxiwa moorweela wa Yesu. Mweeparipari, Yesu onanweryatho omukhaviherya mwanawe mwaamuthiyana, naamwi oonaka wi ohanle vakhaani ‘okhwa hihano vava.’ (Mateu 9:18) Apwanne, nlelo aahaala openusiwa?

Nlelo Yesu alocaka ni muthiyana yoowo openunwe, alopwana akina annaphiya erwaaka vaate va Xairo nave annamuleela: “Mwana-à amwamuthiyana òkhwa.” Awo annaaceererya: “Onamùkhulelani muhusiha?”—Marko 5:35.

Michaka soothananiha! Mulopwana ola, oocicimiheya vamucecheni, vano ori ookhulumuwa. Mwanawe mwaamuthiyana mmoharu ookhwa. Nyenya Yesu, ohiiwa michaka iho, nave onnarukunuwela wa Xairo, alocaka masu oomulipiha: “Ohòve etxhu, ororomele pahi.”—Marko 5:36.

Yesu onnamuhoola Xairo okookela owannyawe. Erikimphiyaru, awo annawoona achu eri awuukhuwaxa. Achu athukumanne vaavala anamwinla, yiivoholaka, ni emanaka vachirima nthowa na othanana. Yesu onneemela mpa nave onnaloca masu ootikhiniha: “Mwana ola hakhwile, onamurupa!” (Marko 5:39) Va wiiwa masu yaala, achu annamutheya Yesu. Awo aasuwela wi nahano ookhwa chiryene. Aai, apharihelaka owerya ovahiweiye ni Muluku, Yesu onahaala wooniherya wi ti wooweryeya waakookiherya okumi achu akhwile hiiha ntoko awo ewerye ovinya mu ikhove sawiiseela.

Yesu onnawiikarela vaate achu oothene aahiyaka mwemmo alipa oomuyara nahano, Petro, Tiyako ni Yohani. Yesu onnaakusa yaala athanu oya waateleliwevo muruchu wa nahano. Apharaka ntata nawe, owo onnaloca “‘Talitha kùm,’ ti wi, Nahano vinyà!” (Marko 5:41) Moohilekela, owo onnavinya nave onnapacerya weeca. Nkaanyiheryani ohakalala wa Xairo ni mwaariye va woona yeela! Wi ooniherye wi nahano ookookela okhala mukumi chiryene, Yesu onnaaruma wi emvahe echu yoolya.

Wuupaceryani, Yesu haaweemererya achu yaale aapenuseiye ovuwiha yeeyo aapakenleiye, nave aaheerano emohamoha wa alipa oomuyara nahano. Naamwi hiiha, alipa oomuyara nahano oohakalala ene vamoha ni akina annamwaramwasa michaka “mwelaponi yothene yele.” (Mateu 9:26) Apwanne himwaahaala oloca sa yeeyo waakhanle wi moomoona oosiveliwa anyu aviihiwe mookhwani? Ela yaweereya yanaawiili ya ovinya mookhwani Yesu opankeiye.