MWAHA 92
Yesu Onnaaviiha Alipa Okhwa
MWALI ola munamoonaanyu va orino iyaakha 12. Yesu onnampharela ntata, nave amannya ni atiithinya a mwali owo ari vakhiviru. Mano munnasuwela nthowa nene anakhalaaya ntoko oohakalalaxa? Hinkoni noone.
Atiithinya a mwali owo yaari muchu oochuneya, awiichaniwa Yairo. Nihiku mikina, mwanawe owo aahiicheliwa nave aahaateleliwa vakamani. Nyenya owo haapenunwe. Aanvira atepakaru wiicheliwa. Yairo ni mwaariye yaahuukhuwa vancipale, nthowa nawii wooneya ntoko wii mwanaya mwaamukhaani owo aahala okhwa. Aari mwanaya mmoharu pahi. Hiihaa Yairo aahirowa omwavyavya Yesu. Aahisuwela sa sotikiniha seiyo Yesu aapankiiye.
Vavaa Yairo aamphwannyiye Yesu, aari arukureryiweene ni muloko wa achu. Nyenya Yairo aahiwerya ovira nave aahuuwela va manaani a Yesu. ‘Mwanaka ootepa wiicheliwa,’ aahi yoowo. ‘Khwoo, rwaani mumpenuxe,’ aahiveka owo. Yesu aahi onaya weiwo.
Vavaa yeechaaya, muloko wa achu waawomanyanano. Mootutuxa Yesu aaheemela: ‘Taani okiphanre miyo?’ aahikoha. Yesu aahoona ikuru sikhumaka mwa yoowo, va nthowa nla aanasuwela wii okhala anphanre owo. Nyenya mano taani? Aari muthiyana mmoha, awiicheliwa mu iyaakha 12. Owo aahimwachamela ni ophara yoowara ya Yesu, nave aahipenuwa!
Eyo yaahimweeriha Yairo woona phaama, nthowa nawii aahoona wii wari wookweyaxa wa Yesu ompenuxa muchu. Nyenyanto, aahirwa mulipa a michaka. ‘Ohimukhuletho Yesu owo,’ aahi wa Yairo. ‘Mwaana ohokwa.’ Yesu aahiiwa sa ela nave aahi wa Yairo: ‘Ohoove, owo anahaala okhala phaama.’
Vavaa yaaphiyalaaya ompa wa Yairo, achu yaamunla ni wisukucha vanakhopeni. Nyenya Yesu aahi: ‘Muhinle. Vawi hakhwile. Nyenya anamurupa.’ Nyenya akina yaamutheya ni omunyemula Yesu, ntakhara wii yaanasuwela wii owo aahikhwa.
Vaavanto Yesu aahaakuxa atiithinya ni amannya a mwali owo, ni arummwaawe araru, o eruku yeeyo mwamwali owo aateleliwiiyewo. Aaphara ntata nawe nave aahi: ‘Nkavinya!’ Nave yoowo aahikhala mukumi ntoko munamoonelanyu va. Aahivinya aneeca! Ti nthowa nene amannya ni atiithinya aryaaya oohakalalaxa.
Ola tahi muchu oopacerya yoowo Yesu aamviihaliiye wa alipa okhwa. Oopacerya yoowo Piipiliya onamulociiye aari mwaana a namukhwele a o epoomani ya o Nayini. Vachuli vaya, Yesu aahimviihatho Lazaro, murokorawe a Mariya ni Malita. Voolamulela ntoko mwene a Muluku, Yesu onahaala waakookiherya wukumini alipa okhwa ancipale. Mano hinnaphwanela okhala oohakalala ni yeeyo?
Luka 8:40-56; 7:11-17; Yohane 11:17-44.