Esisapo ya Miruku Soophara Muteko

Niphwanaphwaniho na mwaana oorimeela, nenlo Yesu omanleiye oloca, nohaatikhiniha alipa amusokho, alipa oorepa ni Afarisi wi Muluku ori oreheryeya waakhurumuwela alipa oocheka anarukunusa murima. (Luka 15:1-7, 11) Vano Yesu onaloca ni amuhuserya awe. Owo onapharihela niphwanaphwaniho nikina, mu ekwaha ela vooloca sa mulopwana ooreela yoowo onasuwela wi mulipa oohoolela empa awe naari mulapeli haneerano ichu moophwanelela.

Yesu onaloca wi mulapeli ootheriwe wi onnananariha ichu sa mwaneene a muhakhu. Mwawiihiiha mwaneene a muhakhu onaloca wi mulapeli onahaala wiikariwa. Mulapeli onnuupuwela, “vano kereni, kinikariwaka muteko? Olima nkinawerya; oveka, onnakuliha muru.” Wi awerye ohoolela sookhumelela sa muhoolo, owo onnaphiyerya makuchuwelo ala: “Kòsuwela kineraka kere wi nihiku na ohiya muteko kakheliwe t’atxhu mmavate mwaya.” Mwawaakuveya onnawiichana yaale yaamusiyanre, nave onnaakoha: “Wasiyanre hai atokwene aka?”—Luka 16:3-5.

Oopacerya onnaakhula: “Mikoro nsana sa makhurwa.” Iho inaphitaanyerya iliitru 2.200 sa makhurwa. Akhweya Mulipa oosiyaari aahikhalano emaca etokweene ya sawiima inapakiwano makhurwa naari aahikhalano muchu aamutumiherya makhurwa. Mulapeli onnamuleela: “Okuse epàso-à, okirathi ni vohilekela orepe: mikoro makhumi mathanu [iliitru 1.100].”—Luka 16:6.

Mulapeli onnamukoha mukina: “Osiyanre itxhu hai?” Naakhulo ti: “Miphimo nsana sa trigo.” Iho iliitru 22.000 sa triku. Mulapeli onnaloca ni mulipa oosiyaari: “Okuse epàso-à, okirathi ni orepe: makhumi mathanu na mararu.” Owo onnamvukulela mulipa oosiyaari aporsentu 20.—Luka 16:7.

Mulapeli nlelo ookhalano murici mu anakoso a mwaneene a muhakhu, mwawiihiiha owo ookhalano owerya wa ovukula yeeyo akina yaamusiyanraaya mwaneene a muhakhu. Moorweela wa ovukula yeeyo yaasiyaariwe, mulapeli onaapaka asinthamwene yaawo anahaala omwaakhela amanle oyeleela muteko awe.

Mu elukuluku mwaneene a muhakhu onnasuwela yeeyo yeeren’ye. Naamwi yeeyo yeeren’ye etaphulelaka oyeleela, owo onnatikhiniheya ni mulapeli nave onnamuthamalela woona wi ori “òwoka,” nave “merelo awe yàri a miruku.” Yesu onnaaceererya: “Anamwane a elapo yavathi ni akhwaya t’arino miruku sawapwaha anamwane a ekamam.”—Luka 16:8.

Tahi wi Yesu onamweemererya meerelo a mulapeli, naari oceenyerya meerelo oonanara a ompaka nakoso. Vano, tiheeni onachuneiye? Owo onnaaceenyerya amuhuserya awe: “N’wasyeke asinthamwene ni muhakhu wonanara, wi nihiku muhakhu owo oneraya owukunuweni, yale yawakheleni mwa ipa sohimala.” (Luka 16:9) Chiryene, nookhalavo nihusiheryo vooloca sa okhala awiisuwela ni opharihela miruku. Akapuro a Muluku, “anamwane a ekamama,” annachuna opharihela muhakhu aya mwa miruku, ni ewehereryo ya ekumi yoohimala mmuupuweloni.

Pahiru Yehova Muluku ni Mwanawe ananwerya omwaakhela muchu mu Omwene wa wirimu naari Mparataiso veelaponi mu olamulelo wa Omwene yoowo. Nnaphwanela wiilipiserya wunnuwiha onthamwene ni yaawo moorweela wa opharihela muhakhu woomwiilini nryaahuno wi nikhaviherye soothowa sa Omwene. Ewehereryo ahu yoomwaahiyu enahaala okhala yoophareleya vaavaa ewooro, eparata ni ichu ikina soomwiilini sineeraaya iyeleele esisapo ni orimeela.

Yesu oolocatho wi yaale ari oororomeleya mu okhapelela ni opharihela muhakhu vyakala naari ichu soomwiilini aryaayano anahaala okhala oororomeleya mu okhapelela miyaha sookhweleyaxa. “Vano” Yesu onnaloca, “mwahiroromelen’ye mwa muhakhu wonanara, tani oni ororomeleni ni muhakhu weparipari [hiiha ntoko soothowa sa Omwene]?”—Luka 16:11.

Yesu onawooniherya amuhuserya awe wi anahaala oweheryiwa sincipale wakhala wi anamwaakheliwa mu “ipa sohimala.” Muchu hani akhale kapuro eeparipari a Muluku nave mu elukuluku emohamoha akhale kapuro a muhakhu wonanara naari ichu soomwiilini. Yesu onnakuchula: “Hàvo namalapa onawerya walapa asipwiya eli, wona wi onammuthanyaka mmoha ni amukhweleke mukina, nari onammuroromelaka mmoha ni amunyemuleke mukina. Himunawerya omulapa Muluku ni muhakhu.”—Luka 16:9, 13.