Nyuwaano Mwaanasuwela?

Murici taani mulapeli a veechokoni aareiyeno mu ilukuluku sakhalai?

MU ilukuluku sakhalai, mulapeli a veechokoni aanavareryela echoko naari ichu sa muchu mukina. Nsu na Ehepiri ni Ekiriki ntaphuleliwe “mulapeli a veechokoni” ilukuluku ikina onaahiwa ooweherya naari oovareryela a echoko.

Vaava Yosefe, mwaana a Yakopo aareiye kapuro o Yikuputu, Yosefe aahikhala mulapeli a veechokoni ya pwiya awe. Mweeparipari, Pwiya awe yoowo aari Muyikuputu, “aahiya soothene mmatatani [mwa] Yoosefe.” (Map. 39:2-6) Ohoolo waya, vaavaa Yosefe aareiye mulamuleli oowerya o Yikuputu, owo aahaathanla alapeli a veechokoni vawe.—Map. 44:4.

Mmahiku a Yesu, aneene a imaca yaakhala opooma nave yaanarakamela imaca saya. Mwa yeeyo, awo yaanaahiyerya murici alapeli a veechokoni wi ehoolele muteko yoowo waapakiwa mu imaca saya.

Taani aahaala okhala mulapeli? Namarepa mmoha o Roma awiichaniwa Columella aakhanle mu nsana noopacerya, aahiloca wi kapuro aavahiwa mirici, naari okhala mulapeli a veechokoni, aaphwanela okhala “muchu ohusenrye opaka muteko mwaphaama.” Nave owo aaphwanela okhala muchu “onawerya ohoolela ahikhanleno nthalu ni onanara murima.” Columella onnaacererya: “Mwa soothene aaweheryiwa wi ahikhale muchu awiisoona osuwela aniiha ahisuwenle echu nave ahirino nchuno noohuserya.”

Masu a Muluku annapharihela nsu nawi mulapeli a veechokoni wi yooniherye miteko mikina ineereya mu nikhuuru na Akristu. Ntoko yootakiherya, murummwa Paulo aahaaceenyerya Akristu oothene wi epharihele mavyakelo yaawo aakhenlaaya wa Muluku wi ‘ekawane ntoko anamuteko aphaama ni a mahala ohiyana-hiyana a Muluku.’—1 Ped. 4:10.

Yesu aapaka niphwanaphwaniho na mulapeli nenlo nnaphwanyeya mu Luka 16:1-8. Ohiya yeeyoru yooloherya emoha enaloca eneneeryo ya orwa wawe ntoko Mwene, Yesu onnavaha yoororomeliha wa oomuchara awe wi aahaala omuthanla “mulapeli òroromeleya ni awiisuwela” yoowo omvanheiye murici woochuneya wi akhale mulapeli aahaala ovahaka yoolya yoomunepani wa oomuchara a Kristu mu elukuluku yookuchula. (Mat. 24:45-47; Luka 12:42) Ninnathamalela nthowa na okhala ni yaale arino ekari ya waakhela soolaleeryiwa seiho mulapeli oororomeleya onareheryeiye wi ikhale sawaakhwanela mu elapo yoothene.