“Ovinya Mokhwani ni Ekumi”

Arwaaka o Pereya, Yesu onnaphiya makupa o Petaniya, muceche wa mastatiya 3 makupa onakhuma nsuwa o Yerusalemu. Mariya ni Marta arokora a Lasaro anamwinla nthowa na okhwa wawe. Achu ancipale annarwa wi yaahakararye.

Muchu mmoha onnamuleela Marta wi Yesu ori vakhiviru, nave mwawaakuva owo onnamuthikirerya. Marta onnamuleela Yesu echu owo ni murokora awe yuupuwelaaya mu mahiku maxexe ariki: “Pwiya, warì vava munnaka hakakhwile.” Nyenya eyo henataphulela wi haanono ewehereryo. Marta onnaloca: “Kòsuwela wi yeyo onerawe onveke Muluku, yowo onamovaha.” (Yohani 11:21, 22) Owo onnasuwela wi Yesu onanwerya okhaviherya.

Yesu onnaakhula: “Munna à onanvinya mokhwani!” Marta onuupuwela wi Yesu onaloca sa ovinya mookhwani woomwaahiyu veelaponi yavathi, ewehereryo yeeyo Aparahamu ni akina yaaryaayano. Nave Marta onnooniherya yoororomela awe, wi eyo enahaala weereya chiryene mu oloca: “Kòsuwela wi onanvinya mokhwani nihiku nomaliha elapo.”—Yohani 11:23, 24.

Vanonto, Apwanne eyo enooniherya wi Yesu onanwerya okhaviherya mmukhalelo yoola? Owo onnamuupuserya Marta wi owo oovahiwa ni Muluku owerya ntakhara okhwa, mu oloca: “Miyo ka ovinya mokhwani ni ekumi. Yowo onakemererya, nari akhwile, onamukhalano ekumi. Nave mutxhu orino ekumi ni onakemererya, harwa akhwa.”—Yohani 11:25, 26.

Yesu hanaloca wi amuhuserya awe akhanle herwa ekhwa. Ophiyeryatho yoowo ene onahaala okhwa, hiiha ntoko aaleenleiye arummwa awe. (Mateu 16:21; 17:22, 23) Yesu onaceenyerya wi omweemererya yene onnahoolela ekumi yoohimala. Wa ancipale, ekumi yeeyo anahaala okhalano moorweela wa oviihiwa mookhwani. Nyenya, achu oororomeleya yaawo eni ekhale ophiyerya omakuchuwelo wa elapo yeela, herwa ekhwa. Moohipwacha mukhalelo ene, muchu ti muchu onamweemererya yoowo onanwerya ororomela wi onahaala oviihiwa mookhwani.

Nyenya Yesu, yoowo olonce, “miyo ka ovinya mokhwani ni ekumi,” apwanne onanwerya omviiha Lasaro, avinrevo mahiku akhwileene? Yesu onnamukoha Marta: “We onnemererya yela?” Owo onnaakhula: “À, Pwiya, kinnemererya wi weyano ori Kristu Mwana a Muluku, yowo ì arwe mwelaponi.” Ni nroromelo wi Yesu onamweeravo echu nihiku nene nenle, Marta mwawaakuveya onnaya owaani nave onnamuleela murokora awe weephiini ariki: “Apwiya ari vava ni annawitxhana.” (Yohani 11:25-28) Mu elukuluku yeeyo, Mariya onnavinyawo owaani, mwawaakuveya achariwaka ni akina, yaawo anuupuwela wi owo onaya o nihiye na Lasaro.

Mariya onnaya orivo Yesu, onnakokhora vakhiviru vawe inlaka, nave ooniheryaka othanana omohamoha murokora awe oonihenryeiye: “Pwiya, warì vava, munnaka hakakhwile.” Amoonaka Mariya ni muloko winlaka, Yesu onnathanana, onnahaha iphumu, nave onninla. Achu oovarerya yanwerya woona wi chiryene owo aanamusivela Lasaro. Nyenya akina annakoha: ‘Wakhala wi Yesu ohula mitho a mulipa èvasi, hakawenrye wera wi owo ahikhwe?”—Yohani 11:32, 37.