Yesu Onnamviiha Lasaro

Yesu aakhalano asinthamwene awe o Petaniya. Asinthamwene awe yaawo aari Lasaro ni arokora awe apiili Mariya ni Marta. Nihiku nimoha, Yesu ari makupa makina a o Yortano, Mariya ni Marta yaamurumihela Yesu michaka: ‘Pwiya, Lasaro onamwiiceliwa. Murwe mwawaakuveya.’ Nyenya Yesu haakelewo mwawaakuveya. Aamalinheiye mahiku meeli, aaloca ni arummwa awe: ‘N’ye o Petaniya. Lasaro onamurupa, kinaya omviiha.’ Arummwa yaanaloca: ‘Lasaro aarikimurupa, onahaala ovinya.’ Yesu aaloca wa yaawo: ‘Lasaro ookhwa.’

Vaavaa Yesu aaphiyaleiye o Petaniya, iiso Lasaro amalinhe mahiku maxexe ookhweene. Achu yaaya omuhakararya Mariya ni Marta. Vaavaa Marta iiwaleiye wi Yesu oophiya, owo aaya wa yoowo ii: ‘Pwiya mwaari wenno munnaka hakaakhwile.’ Yesu aamuleela: ‘Munna aa onamvinya muukhwani. Onnaroromela yeela?’ Marta aahaakhula: ‘Aai kinnaroromela wi onahaala ovinya.’ Yesu aaloca: ‘Miyo ka ovinya muukhwani ni ekumi.’

Marta aya wa Mariya amuleela ariki: ‘Apwiya ari vaava.’ Mariya aachimakela wa Yesu ni achu ancipale. Owo aathananaxa ahinawerya omaala winla. Aaloca ni Yesu: ‘Pwiya mwaari vaava munnaka hakaakhwile.’ Yesu amoonaka mukhalelo aathananneiye, apacerya winla. Achu yaamonnaya Yesu inlaka, yaapacerya oloca: ‘Mmoone omukhwela wawe Lasaro.’ Nyenya akina yaanaloca: ‘Ntakhara heeni ohimvulunxeiye nthamwene awe?’ Tiheeni Yesu enreiye voocharela?

Yesu aaya o nihiye, naaciyeliwe ni nluku ntokotoko. Owo aalamulela: ‘Vihamvo nluku.’ Vano Marta ahi: ‘Pwiya onnankha ntakhara aavira mahiku maxexe, nimvithalaahu.’ Nluku naaviihiwaayavo, Yesu aavekela: ‘Tiithi kinnathamalela woona wi mookiiwa. Kinnasuwela phaama wi munnakiiwa, nto kilonce ela wa nthowa na achu ala ari vaava wi yeemererye wi mukirumme.’ Voocharela aaloca ni masu oovuwa: ‘Lasaro khumela vaate!’ Echu yootikhiniha yaaheereya: Lasaro aakhuma ahuruweliwe ni soowara. Yesu aaloca: ‘Mmutaphule ni mmuhiye aroweke.’

Ancipale yoonne yeele yaapacerya omuroromela Yesu. Nyenya akina yaaya waaleela Afarisi. Ohoolo waya, Afarisi yaanachuna omwiipha Lasaro ni Yesu. Mmoha a arummwa awe 12, Yutasi Iskariyoti, aaya waakoha Afarisi weephiini: ‘Muni mukivahe eheeni konnyaani Kristu?’ Yaamuroromeliha omuliva ikhorowa 30 sa eparata. Vano Yutasi anaavyaavya mukhalelo wa omveleela Yesu mmatani mwa Afarisi.