Afarisi Annamukohakoha Mulopwana Aayariwe Ahoonaka

Afarisi haneemererya wi Yesu ompenusa mulopwana aayariwe ahoonaka, mwawiihiiha annawiichana alipa oomuyara. Awo aasuwela wi anahaala ‘wikariwamo musinagoga.’ (Yohani 9:22) Wiikariwa weiwo onamaliha waataana ni Ayuta akina onnakhalano sookhumelela itokweene wa emusi oomwiilini ni mmuupuweloni.

Afarisi annapaka makoho meeli: “Ola ti mwaninyu, mweranyu oyariwe ahonaka? Vano òpatxerya wona ori hai?” Alipa oomuyara annaakhula: “Hiyano nsuwenle wi ola ti mwanihu ni wi oyariwe ahonaka. Vano opatxerya wawe wona, nave omuhunle mitho hiyo hinimusuwenle.” Naamwi mwanaya aalenle yeeyo yeeren’ye, awo annakhalano ephoole mmukhalelo wa waakhula nave annaloca: “Mukoheni nyuwano. Owo òhunnuwa. Mwanene yowo onamolelani.”—Yohani 9:19-21.

Mwa yeeyo, Afarisi annamwiichana mulopwana wanawiili nave annamoopopiha elocaka wi aakhalano nthowa ni Yesu. Awo annamulamulela “Onvuwihe Muluku! Hiyo nòsuwela wi mutxhu owo mulipa òtxheka.” Asepaka murici aya, mulopwana ahaawerya woona onnaloca: “Arì mulipa òtxheka, miyo nkisuwenle. Etxhu kisuwenlaka ti wi miyo kari mulipa èvasi, nave vano kinnona.”—Yohani 9:24, 25.

Ehichunaka ohiya mwaha, Afarisi annatitelela: “Owerenle etxhu tani? Orino hai wohula mitho?” Mulopwana onnooniherya olipa murima mu oloca: “Kìholèlani vale, ni mùhiwa. Ntakhara seni munakhwelanyu wulùla wiwa? Wakhweya munakhwelatho okhala amuhuseryawe?” Enyeenyen’ye, Afarisi annaloca: “Weyano pahi t’ori muhuseryawe. Hiyo nri amuhuserya a Mose. Nsuwenle wi Muluku olontxe ni Mose, nto wa ola hinsuwenle onarweiyewo.”—Yohani 9:26-29.

Ooniheryaka otikhina, mulipa ahoona onnaloca: “Yotikhiniha ti yela yawi himusuwenle onarweiyewo, nto okihula miyano mitho.” Voocharela mulopwana onnaloca masu oophwanelela vooloca sa yoowo Muluku onanwiriyaneiye ni onamweemereryeiye. “Hiyo nòsuwela wi Muluku hanawiwa alipa òtxheka, nto onamwiwa mutxhu onamutxitximiha Muluku yowo, ni onera okhwela wawe. Hetonko wiwiwa wi mutxhu omuhula mitho mulipa òyariwe ni evasi.” Ela ennakuchula mwaha: “Mutxhu ola aharì a Muluku, hakawenrye wera etxhu.”—Yohani 9:30-33.

Ehiweryaka ovaanya moonelo wa mulipa ahoona, Afarisi annamurukunuwela, elocaka: “Weyano oyariwe motxhekani mwene, ni onanihusiha hiyo?” Awo annamwiikarela vaate.—Yohani 9:34.

Vaavaa Yesu oniiweiye yeeyo yeeren’ye, onnamphwanya mulopwana nave onnamukoha: “Weyano onnamwemererya Mwana a mutxhu?” Mulopwana openusiwe onnaakhula: “Tani, Pwiya, vawi mi kimwemererye?” Ahihin’ye minikwa, Yesu onnaloca: “We wòmona; ti yowo onalotxa ni weyo.”—Yohani 9:35-37.

Mulopwana onnaakhula: “Pwiya kinnemererya.” Ooniheryaka nroromelo ni ncicimiho, mulopwana onnakokhora vamiithoni va Yesu, yoowo onaloca masu oophwanelela: “Karwele mwelaponi othoriha, wi ale ahinona, yoneke; ni yale anona, yarwele evasi.”—Yohani 9:38, 39.

Afarisi ari vaavale, aasuwela wi hanoona. Nyenya hanka vooloca sa muteko aya ntoko ahooleli oomunepani? Awo annaakhula mwawiisaakiha: “Hiyotho nri alipa èvasi?” Yesu onnaloca: “Mwarì alipa èvasi himukarino nthowa na otxheka; nto okhala muni: hiyo ninnona, munamukhala motxhekani.” (Yohani 9:40, 41) Yahaakhanle alipa oohusiha o Isarayeli, emukhoocaka Yesu ntoko Mesiya akhweya yaahaala wiiwexexiwa. Nyenya ni nsuweliho naya na Nlamulo, omukhooca waya ori mwaha mutokweene.