Mwaakhaviherye Eevaasi Ohuserya Vooloca sa Yehova
1. Yesu oonihenrye hai ikharari wa eevaasi?
1 Yaahanle mahiku mancipale wi Yesu akhwe. Aviraka mu epooma ya Yeriko, Alipa eevaasi apiili yaapacerya okhuwela: “Apwiya, munimorele ikharari!” Naamwi Yesu aasuwenle wi aahaala okumana ni makacamiho, owo aaheemela, awiichana alopwana awo, nave aampenuxa. (Mat. 20:29-34) Nnii ntakiherye hai ikharari sa Yesu wa alipa eevaasi?
2. Nnii niwerye hai waavaha onamoona achu eevaasi nnaaphwanyaahu mu orummwa?
2 Mukhale Ookhaviherya: Wakhala wi momphwanya muchu eevaasi, akhweya waaciwevo, muloce nsina nanyu nave mwiivahe wi mmukhaviherye. Woona wi achu yaawo hanapwachiwa, owo onahaala wookhwani minikwa voopaceryani. Nyenya, wooniherya onthamwene ni opwacha wanyu, onahaala omukhaviherya. Musuwele wi aakhalavo alipa eevaasi oohiyana hiyana, nave eyo enahaala wooniherya mweero taani awo anachunaaya nikhaviheryo. Mmanle omukhaviherya akhweya munanwerya oloca wi muri awiivoliiherya mmuteko wa ohusiha wa Piipiliya. Mwiivahe wi mwaalakhanye yoorepa, ntoko Salmo 146:8 naari Yesaya 35:5, 6. Wakhala wi owo onnawerya waalakhanya mu Prahili, mmukohe wakhala wi owo aahaala osiveliwa waakhela soolaleeryiwa mu Prahili seiho sinahaala omukhaviherya ohuserya sincipale vooloca sa Piipiliya. Nyuwaano tho munanwerya omukhaviherya wi aphwanye sookravaariwa sooruma orweela mu jw.org. Wakhala wi komputatore awe onnawerya waalakhanya mwawiiweya ni moovuwa, owo onahaala ohakalala ni miyaha ikumihiwe mu jw.org vamoha ni soolaleeryiwa inakumihiwa RTF (Rich Text Format).—Moone ekaaxa “Vaavaa Nnamukhaviheryaahu Muchu Eevaasi . . . ”
3. Nnii niwaavye hai eevaasi mu ekulucu ahu?
3 Muwaavye Alipa Eevaasi: Wiiliwiili hinnaaphwanya achu eevaasi mu orummwa wa empa ni empa ntakhara wi ancipale a yaawo hanakhala ootaphuwa oloca ni achu vyakala anarwa owannyaya. Mwawiihiiha, onnachuneya wiilipixerya vancipale ‘wakoha’ yaawo wi mwaavahe onamoona. (Mat. 10:11) Apwanne mookhalano nthamwene oomutekoni naari ooxikola ari eevaasi? Mukhale oopacerya omulociha. Wakhala wi o muceche anyu yookhalavo exikola ya alipa eevaasi, mvahe soolaleeryiwa sahu sa Prahili o mapuro aaliivuru a oxikola. Apwanne moomusuwela muchu orino mmusi ori mulipa eevaasi? Okulucuni wanyu aakhalawo marehereryo anaakhaviherya alipa eevaasi naari aakhalawo mapuro ookhaviherya wa alipa eevaasi? Muloce wa mmusi, alipa ookhaviherya, naari mutokweene a nipuro na alipa evaasi wi Anamoona a Yehova anachuna waakhaviherya alipa eevaasi, nave mwiivahe wi muruuheke soolaleeryiwa mu Prahili naari sookravaariwa. Muwoonihe yoolaiherya ya Piipiliya wi Muluku onahaala omaliha moomalela evaasi. Nyuwaano munanwerya wiivaha tho wi mmoonihe exilema orweela mu jw.org erino muru “Sem Ela, eu me Sentiria Perdido,” enaloca yaweereya ya mulipa eevaasi yoowo aahakalanle nthowa na okhalano Piipiliya mu Prahili. Moorweela wa oloca yoolakelela ya oxekurya wanyu, enahaala wookhweiheryaani wi muloce ni mulipa eevaasi ori oothene.
4. Tiheeni yaweereya ya Xaneti enanihusihaaya?
4 Murokora mmoha eevaasi oniichaniwa Xaneti aaxekurya nipuro enakhalawo alipa eevaasi. Owo aapacerya ovaanela ni nahano mmoha. Xaneti aamuleela, “Yesu aahaapenuxa alipa eevaasi wi ooniherye yeeyo aahaaleiye weera wa oothene ari eevaasi.” Awo yaathokororya vamoha Yawupulula 21:3, 4, nave Xaneti aathariha ti mwawiihai yoolaiherya yeela enahaalaaya waakhwanele moorweela wa Omwene wa Muluku. Nahano owo aamaala, nave voocharela aaloca: “Nkintonko wiiwa moonelo yoola vooloca sa alipa eevaasi. Ancipale ahiri eevaasi anneemererya wi achu teevaasi ntakhara wa echu awo naari makholo aya apankaaya.” Xaneti aamurumihela nahano owo liivuru Piipiliya Onahusiha, vano awo anamuhuserya vamoha Piipiliya ikwaha piili va esumana.
5. Naamwi nihiweryaka waapenuxa alipa eevaasi ntoko Yesu, mareeliho taani anahaala orweela nthowa na wooniherya opwacha wahu?
5 Mweeparipari, hinnawerya waapenuxa achu eevaasi ntoko Yesu enreiye, nyenya nnanwerya waakhaviherya oothene aruuheliwe evaasi ni muluku a mukhalelo yoola wa ichu, ophitaanyerya alipa eevaasi oomwiilini, wi yiiwexexe eparipari ya Masu a Muluku. (2 Akor. 4:4) Yesu aahaapenuxa alopwana apiili o Yeriko ntakhara “vomoriwa ikharari “ aahaapenuxa awo. (Mat. 20:34, BNM) Wakhala wi nohooniherya nchuno nimoha moha wa alipa eevaasi, nnahaala opuha ekari ya omukhaviherya muchu ohuserya vooloca sa Yehova, yoowo onahaala omaliha evaasi okhala wookhala.
[Ekaaxa va epaaxina 3]
Vaavaa Nnamukhaviheryaahu Muchu Eevaasi . . .
• Muloce ni yoowo, nyenya muhikhuweleke. Achu eevaasi hanoona, nyenya awo ananwerya wiiwa mukhalelo wa nsu.
• Mumvahe moono anyu, nave mweemererye wi owo apharele moono anyu waacamela ekookhwino wakhala wi munachuna omuhoola owo. Owo onahaala owerya woochawani wakhala wi nyuwaano muneeca vakhaani vakhaani wi mmuhoole. Vaavaa munoonaanyu exiri, mwiri, ewelelo, naari yookwaculiha ekina, ti yaphaama omuleela.
• Mukhale ootaphuwa opharihela masu anooniherya woona, ntoko “moone” ni “mvarerye.” Mulipa oohoona tho onnapharihela yaawo. Owo “onnoona” mmukhalelo mukina, ophiyerya opharihela muupuwelo aya vooloca sa yeeyo enalociwa.
• Mukhaleno othokororya wanyu mu nipuro noomaaleleya. Achu eevaasi ikwaha sincipale hanakhala ootaphuwa va nipuro noonyakuliwa, nenlo nneeriha okhala woovila osuwela ti heeni eneereya voorukurerya vaya.
• Vaavaa munamuhiyaanyu mmuleele. Eyo enahaala omukhaviherya wi ahikhale awuuliheya muru mu weererya oloca ni muchu ophwanhevo.
• Murepele yoorepela Queira visitar (S-43), nave mveleele wa mutokweene wakhala wi mulipa eevaasi ohooniherya nchuno nyenya hanakhala mu ekulucu anyu.