Masu Awaaceererya

Masu wa Asitiithi Eekristu:

Ntoko tiithi naari mai, nyuwaano mookhalano nchuno na waakhaviherya anamwane anyu omusivela Yehova ni wiiveleela meekhaaya wa yoowo. Tiheeni munaphwanelaanyu weera wi mwaakhaviherye okhala ooreheryeya ntakhara opatiso? Ti liini awo aneeraaya ekhale ooreheryeya opaka yoolakelela yeela yoochuneya?

Yesu aahaalamulela oohuserya awe: “Mwaapakeke oohuserya aka, munaapatisa.” (Mat. 28:19) Mwawiiwanana ni yeela, yoovekeya yoochuneyaxa ya opatiso ori okhala oohuserya—muchu yoowo ohiya pahiru oniiwexexa mahusiho a Kristu ni weemererya yaawo, nyenya tho onachariha vakhivirukhiviru. Eyo echu ophiyerya anamwane anahaalaaya owerya opaka.

Mvahe yootakiherya yaphaama wa aniinyu nave mwaahusihe sa Yehova. (Malam. 6:6-9) Eyo enavolowela opharihela sooleeliherya sa aliivuru Tiheeni Piipiliya Onanihusiheiye? ni Mutitelele Omusivela Muluku wi mwaahusihe anamwane anyu soohusiha soopacerya sa Piipiliya ni waarehererya wi etholathole ni okhala mwawiiwanana ni malakiheryo a Piipiliya. Mwaakhaviherye okhala ooreheryeya othariha soororomela saya mmasu aya. (1 Ped. 3:15) Masuwelelo ni olipiha anaakhelaaya wa nyuwaano ni moorweela wa yoohuserya ya muchu mukhateiye, malapelo eechoko, mithukumano sa muloko, ni onthamwene waphaama anahaala waakhaviherya oya vahoolo wi epatisiwe. Mutitelele waakhaviherya okhalano soolakelela soomunepani.

Yoorepa ya Masiposipo 20:11 eni: “Nari mwaana, onnasuwanyeya mwa miteko awe, eeraka sawookololowa ni sooreera.” Saweera taani inahaala wooniherya wi mwaana moohipwacha aari ponkwe naari nahano, ookhala oohuserya a Yesu Kristu nave ori ookhwaanela opatisiwa?

Mwaana yoowo onaya vahoolo wi apatisiwe onaphwanela owiiwelelaka asitiithi awe. (Saw. 5:29; Kol. 3:20) Alocaka sa Yesu vaavaa aareiyeno iyaakha 12, Piipiliya oni: “Aanawiiwelela [asitiithi awe].” (Luka 2:51) Chiryene, nyuwo hamunaweherya wi mwaninyu akhale oophaameya. Nto yoowo onachuna opatisiwa onahaala ocharihaka vakhiviru khiviru yootakiherya ya Yesu ni osuwela sooleeliherya sawe wa asitiithi.

Owo tho onahaala wooniherya nchuno mu ohuserya iparipari sa Piipiliya. (Luka 2:46) Apwanne mwaninyu onnachuna oya mmithukumano ni opaka makupa? (Sal. 122:1) Apwanne ookhalano nchuno na omwaalakhanya Piipiliya moohihiyererya ni yoohuserya ya muchu mukhateiye?—Mat. 4:4.

Mwaana onaya vahoolo wi apatisiwe onnakuha va nipuro noopacerya Omwene. (Mat. 6:33) Owo onnasuwela murici awe wa waaleela akina sa yeeyo onaroromeleiye. Owo onnalaleerya mmikhalelo soohiyanahiyana nave hanuuliwa muru waaleela ahusiha awe ni anaxikola akhweiye wi owo mmoha a Anamoona a Yehova. Owo onnathokororya makupa awe ntakhara Muthukumano Okumi ni Muteko Ahu.

Owo onahaala wiilipixerya okhalano meecelo aweela moorweela wa osepa onthamwene woonanara. (Masi. 13:20; 1 Kor. 15:33) Eyo enahaala wooniheryeya mmukhalelo onathanleiye macipo, woona ixilema, aprokrama a televisau, apasakhwe, ni mukhalelo wa ompharihela interneti.

Ancipale aheemererya wiilipixerya wa asitiithi aya, weemererya eparipari ni murima woothene ni ophwanelela wi epatisiwe eri amiravo naari asimwali. Yehova ooreeliheeni vaavaa munaakhaviheryaanyu anamwane anyu waavya mukhalelo yoola woochuneya mu onthamwene aya ni Yehova.

Masu wa Mulaleeryi Oohipatisiwa

Ela ekari orumeela mmulokoni ntoko mulaleeryi oohipatisiwa. Nyuwaano munnaphwanela othamaleliwa oya vahoolo omunepani mwenraanyu. Moomusuwela Muluku moorweela wa ohuserya Masu awe ni waaceererya nroromelo mu soolaiherya sawe.—Yoh. 17:3; Ahe. 11:6.

Muhaakumve omuhuserya Piipiliya ni Anamoona a Yehova, nyuwaano akhweya mwaahipaka onthamwene mmikhalelo soohiyanahiyana a marehereryo a malapelo naari akhweya himwaarino malapelo. Akhweya mwaahivolowela miteko mikina ihiniiwanana ni malakiheryo a Piipiliya. Nto vano mohooniherya nroromelo nanyu moorweela wa ocharuwa, enataphulela okhalano ekeerelani wa saweera sakhalai soohiphwanelela, ni moorweela wa ochekulela, enooniherya ohiya makhalelo oonanara ni olakelela weerano eri yaphaama vamiithoni va Muluku.—Saw. 3:19.

Mmukhalelo mukina, akhweya moosuwela soorempwa saweela ‘ovinyerya muyenve.’ Nyuwo moowerya wiikhapelela moorweela wa ovolowela ohiri woophwanelela ni saweera soonanara. (2 Tim. 3:15) Nyuwaano moohuserya okhooca okhinyererya ni makhalelo makina a weera echu eri yoonanara vamiithoni va Yehova. Mohooniherya nroromelo moorweela wa okhaviherya malapelo eeparipari ni waaleela akina soororomela sanyu. Mohiivyakiha mmuteko Weekristu. Vano moopaka yoolakelela mukhatiinyu wi mmurumeele Yehova ntoko mulaleeryi oohipatisiwa.

Mmikhalelo soothene, moohipwacha waakhanle wi muhusenrye iphiro sa Yehova ovinyerya muri mwaana naari munnunwe, vano munaphwanela okhwaaniherya makupa meeli oocharela mu winnuwa wanyu omunepani—wiiveleela ni opatiso. Moopaka wiiveleela wanyu wa Yehova moorweela omwaacamela mu nivekelo nave omulela yoolakelelaanyu ya omulapela yooworu okhala wookhala. (Mat. 16:24) Opatisiwa mmaahini, yawooniherya ya wiiveleela. (Mat. 28:19, 20) Moorweela wa wiiveleela ni opatisiwa, mookhala murummwa awiiveleela a Yehova Muluku. Chiryene ekari etokweene!

Hiihaa ntoko yoonihenryaaya yoohuserya anyu ya Piipiliya, akhweya, nyuwaano munnahoolela makacamiho mancipale. Muupuwele wi elukuluku vakhaani amanle opatisiwa, “Yeesu aakerihiwa otakhwani ti munepa wi eereriwe ti musaserya.” (Mat. 4:1) Opatiso anyu ntoko oohuserya a Kristu, munaphwanela oweheryaka saweeha sincipale. (Yoh. 15:20) Iho inahaala orwaaka mmakhalelo oohiyanahiyana. Akhweya munahaala ohoolelaka wiiciwa ni amusi. (Mat. 10:36) Akhweya ophuciwa moorweela wa asinthamwene ooxikola, oomutekoni, vamoha ni achu akina munakhalaanyuno. Elukuluku yoothene muupuweleke masu a Yesu anaphwanyeya mu Marko 10:29, 30: “Chiri kinnooleelaani wi haavo muchu ohin’ye empa awe, nari asinnawe, nari arokorawe, nari amannya, nari atiithinya, nari anaawe, nari imaca sawe, wa nthowa na miyo ni michaka yaphaama, ahiwerye waakhela elukuluku yeela ikwaha nsana, mwa seiyo soothene ohiyaleiye: ipa, asinnawe, asirokorawe, asimannya, anaawe ni imaca, vamoha ni waavyaavyiwa. Muhoolo tho onamwaakhela okumi woohimala.” Mwawiihiiha mutitelele olapa moowetha wi mmwaacamele Yehova ni wiikhalela mwawiiwanana ni ikano sawe sawookololowa.

Wakhala wi munnachuna opatisiwa, mmuleele muhooleli a nikhuuru na atokweene. Makoho yaawo anacharela wa masu yaala mathipelo a othokororya onahaala opakiwa ni atokweene vamoha ni nyuwo wi ewerye olakelela waakhanle wi munnaphwanelela wi mpatisiwe. Akhweya munaphwanela opacerya othokororya yaawo mukhatiinyu ntoko makupa a yoohuserya anyu ya muchu mukhateiye.

i mwiirehererye ntakhara makupa yaawo, mwaavye elukuluku ya waalakhanya ni wuupuwelela Soorepela sooniheryiwe ni sithoonyiwe. Akhweya munamuchuna opaka soorepela sanyu mu liivuru yoola naari nipuro nikina. Munanwerya opharihela soorepela seiho ni omuhiya liivuru anyu oohuleyeene elukuluku munathokororyaanyu ni atokweene. Wakhala wi hamwiiwexenxe phaama makoho makina a yaala, mukhale ootaphuwa omukoha yoowo munahuseryaanyuno Piipiliya naari atokweene.

Vaavaa munathokororyaanyu ni atokweene, muhuupuwele wi munaphwanela ovaha maakhulo oorakamaxa naari ookacamiha a makoho apakiwe. Naakhulo nookhweya, nooluluwanya wa nikoho nave mmasu anyu nnahaala okhala naphaama. Wa makoho mancipale, onamukhala wamphurelo oromola yoorepa emoha naari piili wi yooniherye mathipelo a naakhulo nanyu a mu Soorempwa.

Wakhala wi nlelo himwaano masuwelelo a waakhwanela a mathipelo a Soorempwa, atokweene anahaala waavya nikhaviheryo wi muwerye oloca mmasu anyu wiiwexexa waphaama wa Soorepa wi mphwanelele opatisiwa mu ekwaha ekina.

[Masu wa atokweene a muloko: Sooleeliherya sa othokororya ni awiiveleela ntakhara opatiso inaphwanyeya mu ipaaxina 208-212.]