Othokororya Woomaliherya ni Alipa Awiiveleela Ntakhara Opatiso

Opatiso oneeriwa elukuluku ya mithukumano sa ekulucu ni sa muceche sa Anamoona a Yehova. Omakuchuwelo wa mwaha wa opatiso, namaloca onahaala waaveka alipa awiiveleela ntakhara opatiso wi yeemele nave yaakhule ni masu oovuwa makoho ala meeli anacharela:

1. Apwanne moocharuwa soocheka sanyu, mwiiveleela mukhatiinyu wa Yehova, nave mweemererya ephiro awe yawoopola moorweela wa Yesu Kristu?

2. Nyuwaano munniiwexexa wi opatisiwa wanyu onnawooneihaani wi mwa mmoha a Anamoona a Yehova mwawiiwanana ni marehereryo a Yehova?

Waakhula waweemererya makoho ala onaphitaanyerya ‘oloca vanlakani’ wa nroromelo na alipa awiiveleela ntakhara opatiso ni wi mweeparipari awo ahiiveleela mukhataaya wa Yehova. (Aro. 10:9, 10, TNM) Alipa awiiveleela ntakhara opatiso anaphwanela wuupuwelela ni ovekela vooloca sa makoho ala elukuluku ehaakumve wi ewerye waakhula mwawiiwanana ni olekecheya waya.

Apwanne mohiiveleela mukhatiinyu mu nivekelo wa Yehova, muroromelihaka wi munahaala omulapelaka yoowo pahiru ni weerano yookhwela awe okhala echu yoochuneya mookumini mwanyu?

Apwanne munoona wi mookhwaanela chiryene wi mpatisiwa va ekari enahaala okhumelela?

Yoowara taani eri yoophwanelela ntakhara opatiso? (1 Tim. 2:9, 10; Yoh. 15:19; Fil. 1:10)

Nnaphwanela owara “moophwanelela” wi nooniherye “omulapa wahu Muluku.” Mwawiihiiha, yaale onaya opatisiwa hanaphwanela owara soowara sa weekhano naari soowara soorempwa. Awo anaphwanela owara mmukhalelo waphaama, woocicimiheya, ni woophwanelela ntakhara yaweereya.

Muchu aapatisiwaka onaphwanela wiikhaliha hai? (Luka 3:21, 22)

Opatiso wa Yesu woovaha yootakiherya ntakhara opatiso Weekristu olelo. Owo aahiiwexexa wi opatiso echu etokotoko, nave eyo yaahooneya mmukhalelo awe ni saweera sawe. Mwawiihiiha nipuro na opatiso tahi nipuro na wooniherya ohakalala woohiphwanelela, othata, weekha, naari mukhalelo mukina waahaala waakanyerya ochuneya wa elukuluku eyo; naari Mukristu muvyaani hanaphwanela onyakula woohiphwanelela ntoko ovootha otokotoko. Naamwi opatiso ekhanle elukuluku ya ohakalala, ohakalala iwo onaphwanela wooniheryiwa mmukhalelo wa ncicimiho.

Oyaaka mmithukumano moohihiyererya ni okhala vamoha ni muloko enahaala wookhaviheryaani hai okhala mwawiiwanana ni wiiveleela wanyu wa Yehova?

Mmanle opatisiwa, ntakhara heeni ti woochuneya opwahiherya okhalano marehereryo aphaama a yoohuserya ya muchu mukhateiye ni olaleerya moohihiyererya?

SOOLEELIHERYA WA ATOKWEENE A MULOKO

Vaavaa mulaleeryi oohipatisiwa onachuneiye opatisiwa, owo onaphwanela olipihiwa wi uuluulele mwawiichaalela “Makoho wa Achu Anachuna Opatisiwa,” anaphwanyeya mu ipaaxina 185-207 a liivuru yoola. Owo onaphwanela tho othokororya moopwacha makupa ani “Masu wa Mulaleeryi Oohipatisiwa,” anapacerya va epaaxina 182, anathariha mukhalelo onaphwaneleiye wiirehererya wi athokororye ni atokweene. Hiihaa ntoko elociwaaya, mulipa awiiveleela ntakhara opatiso onanwerya opharihela muteko soorepa sawe orempeiye vakaaratani nave tho onneemereryiwa omuhula liivuru ola va elukuluku ya othokororyiwa. Honachuneya muchu wuuluulela makoho ni muchu owo ahaakumve othukumana ni atokweene.

Muchu onachuna opatisiwa onaphwanela omuleela muhooleli a nikhuuru na atokweene. Yoowo onachuna opatisiwa amanle waalakhanya “Makoho wa Achu Anachuna Opatisiwa” muhooleli a nikhuuru na atokweene onahaala omukoha waakhanle wi ohiiveleela mukhateiye wa Yehova mu nivekelo wi apake yookhwela Awe. Wakhala wi ohiiveleela, muhooleli a nikhuuru na atokweene onahaala opaka marehereryo wi atokweene eeli ethokororye ni muchu owo “Makoho wa Achu Anachuna Opatisiwa.” Atokweene oohiyana anaphwanela othanliwa wi ethokororye nikupa nri noothene na makupa meeli. Tahi yoochuneya oweherya olokohiwa muthukumano wa ekulucu naari wa muceche wi opakiwe othokororya.

Nikupa ti nikupa nnaphwanela othokororyiwa mu ewora emoha, naamwi ehiwateelihiwaka omaliha elukuluku yincipale wakhala wookhweleya. Nikupa nri noothene nnaphwanela opaceryiwa ni okuchuliwa nnivekelo. Naari muchu owo naari atokweene hanaphwanela othokororya makoho mwawaakuva. Atokweene athanliwe anahaala ochuna okuha mu nipuro noopacerya othokororya yoola mu marehereryo aya.

Ti waphaama othokororya makoho ni muchu ti muchu onachuna opatisiwa, ohiya ntoko nikhuuru na awiiveleela. Moorweela wa owiriyana maakhulo a muchu mu nikoho nri noothene, atokweene anahaala osuwela phaama wiiwexexa wawe, ehikhwaka minikwa wakhala wi onnaphwanelela opatiso. Mwawaaceererya, muchu onaveka opatiso onahaala ochuneya oloca mmasu awe miyaha seiya. Mutheli onaphwanela okohiwa vamoha.

Wakhala wi muchu owo onachuna opatisiwa murokora, othokororya onaphwanela weeriwano va nipuro nawooneya wa akina, nyenya achu awo ehiiwe yeeyo enalociwa. Wachuneya omukuxa muchu mukina, onaphwanela okhala mutokweene naari murummwa oorumeela, mwawiiwanana ni nikupa nnathokororyiwa, ntoko etharihiwaaya mu eparakrafo enacharela.

Mmiloko orimo atokweene vakhaani, arummwa oorumeela oophwanelela anooniherya miruku ni wunnuwa woomunepani ananwerya wuuluulela makoho wa yaale anachuna opatisiwa. Makoho awo anaphwanyeya va “Nikupa 1: Soororomela Seekristu.” Nikupa nnaphwanela othokororyiwa pahiru ni atokweene “Nikupa 2: Okumi Weekristu.” Wakhala wi muloko hiwaanono anna oophwanelela, ooweherya aweececa onaphwanela oleeliwa wi apake marehereryo wi anna a muloko wawaacamela ekhaviherye.

Wakhala wi awiiveleela mwaana, asitiithi awe ari Anamoona a Yehova anaphwanela okhalavo variyari va othokororya. Wakhala wi asitiithi haavo, atokweene eeli (naari mutokweene ni murummwa oorumeela mwawiiwanana ni nikupa nnathokororyiwa) anaphwanela opaka makupa.

Atokweene anaphwanela okhala oolekecheya wi muchu yoowo onachuna opatisiwa onniiwexexa mwawaakhwanela mathipelo a mahusiheryo a Piipiliya. Mwawaaceererya, awo anahaala ochuna osuwela waakhanle owo onachuna opatiso onnathamalela vancipale eparipari nave onnooniherya ncicimiho noophwanelela wa marehereryo a Yehova. Wakhala wi muchu owo haniiwexexa mathipelo a mahusiheryo a Piipiliya, atokweene anahaala opaka marehereryo wi aakhele nikhaviheryo nnakhweleya wi aphwanelele opatiso mu elukuluku ya muhoolo. Akina onamuchuneya ovahiwa elukuluku yincipale wi yooniherye othamalela waya muteko woolaleerya naari ocicimiha meerelo a marehereryo. Atokweene anaphwanela opharihela miruku wi ekawe phaama ewora anahaalaaya omaliha va nikupa nri noothene wi esuwele phaama waakhanle wi owo onachuna opatiso onnaphwanelela. Naamwi oweryeyaka omaliha elukuluku yincipale mu makoho makina ni elukuluku vakhaani mu makina, makoho oothene anaphwanela othokororyiwa.

Atokweene athanliwe wi emukhaviherye mulipa awiiveleela ntakhara opatiso anahaala othukumana namala othokororyiwa nikupa nanaawiili nave elakelele wakhala wi muchu owo onnaphwanelela opatiso naari hooye. Atokweene anahaala othokororya makhalelo oothene, owerya, ni mikhalelo mikina sa muchu ti muchu. Yoochunaahu eri mwa yaawo aveleenle murima aya wa Yehova nave aniiwexexa mathipelo a iparipari sa Piipiliya. Nnikhaviheryo nanyu noosivela, ale anaya opatisiwa anahaala okhaviheryeya wi ekhwaaniherye muteko aya wookhweleya ntoko arummwa a michaka yaphaama.

Voocharela, mutokweene mmoha naari oopiili apanke makupa anaphwanela othukumana ni muchu owo wi emuleele wakhala wi onnaphwanelela opatiso naari hooye. Wakhala wi muchu owo onnaphwanelela, atokweene anaphwanela wuuluulela ni yoowo “Othokororya Woomaliherya ni Alipa Awiiveleela Ntakhara Opatiso,” nnaphwanyeya va ipaaxina 206-207. Wakhala wi awiiveleela ntakhara opatiso nlelo hamalinhe yoohuserya awe mu aliivuru Piipiliya Onanihusiheiye naari Mutitelele Omusivela Muluku, atokweene anaphwanela omuceenyerya wi eereno amala opatisiwa. Mmuleele yoowo onaya opatisiwa wi nihiku na opatiso awe nnahaala orempwa va Yoorepela ya Mulaleeryi a Vamulokoni mu nsina nawe. Mmuleele wi atokweene annarepela sooleeliherya seiya sa muchu orweela wa yoowo wi marehereryo ewerye otitelela okhapelela miteko sa malapelo sa Anamoona a Yehova orukurerya elapo nave wi muchu owo awerye opaka makupa mmiteko soomunepani ni waakhela nikhaviheryo. Mwawaaceererya, atokweene ananwerya omuleela mulaleeryi muvyaani wi sooleeliherya vyakala sa muchu inapakiwa mwawiiwanana ni Política global das Testemunhas de Jeová sobre proteção de informações, enaphwanyeya mu jw.org. Othokororya iwo onaphwanela omaliha minutu khumi naari vakhaani

Yavira eyaakha emoha mulaleeryi amanle opatisiwa, atokweene eeli anaphwanela othukumana ni yoowo wi emvahe nceenyeryo nnikhaviheryo. Mutokweene mmoha onaphwanela okhala ooweherya a nikhuuru na mulaleeryi. Wakhala wi mulaleeryi owo mwaana, asitiithi awe ari Akristu anaphwanela okhalavo. Muthukumano owo onaphwanela opakiwa mmukhalelo woohakalaliha ni woolipiha. Atokweene anahaala othokororya oya wawe vahoolo omunepani ni ovaha sooleeliherya soophara muteko mukhalelo onahaala omukhaviherya okhalano yookhovelela yaphaama ya yoohuserya ya muchu mukhateiye ni omwaalakhanya Piipiliya mahiku oothene, malapelo eechoko esumana eri yoothene, ohicompela mithukumano ni opaka makupa, ni muteko woolaleerya esumana eri yoothene. (Éfe. 5:15, 16) Wakhala wi hamalinhe yoohuserya awe mu liivuru Piipiliya Onanihusiheiye ni Mutitelele Omusivela Muluku, atokweene anaphwanela opaka marehereryo wi muchu mukina amukhaviherye weerano yeeyo. Atokweene anaphwanela okhala a mahala mu omuthamalela. Wiiliwiili, ekano ni sooleeliherya mu mwaha mmoha naari miili inamwaakhwanela.