Makoho Aakhuliwe

◼ Mulaleeryi oohipatisiwa ahaakumve weemereryiwa wi apatisiwe onaphwanela omaliha elukuluku yawiihai aphiyaka mithukumano sa muloko ni wuuka mu orummwa?

Opatisiwa ti yoothanla yookhweleyaxa muchu onahaaleiye opaka. Vanonto, muchu ahaakumve weemereryiwa ntakhara opatiso, owo onaphwanela okhalano wiiwexexa waphaama wa yeeyo Muluku onachuneiye wa yoowo. Mwawaacererya, owo ahaakumve onaphwanela wooniherya olakelela wawe wa okhala mwawiiwanana ni malamulo a Muluku.

AKiristu annalamuleliwa wi ehihiye othukumana waya vamoha, mwawiihiiha mulaleeryi oohipatisiwa ahaakumve onaphwanela wooniherya mvai ophiya mithukumano sa muloko. (Ahe. 10:24, 25) Owo aahaala opaka makupa moorweela wa ovaha maakhulo. Moolikana, owo aahaala ovolowa mu Exikola ya Orummwa WooMuluku, naamwi nla nihiri nlamulo.

Mu waaceererya, woona wi aKiristu aavahiwa muteko wa olaleerya michaka yaphaama ni waapaka oohuserya, mulaleeryi oohipatisiwa onaphwanela wuuka moohihiyererya mu orummwa ahaakumve opatisiwa. (Mat. 24:14; 28:19, 20) Owo onaphwanela olaleerya miyeeri mihai ahaakumve opatisiwa? Mwawooneya, owo onaphwanela ovahiwa elukuluku yawaakhwanela wi ooniherye wi owo oolakelela wuuka moohihiyererya ni mwa mvai mu orummwa mweeri ori woothene. (Sal. 78:37) Nyenya, hori wookhweleya ovira elukuluku yincipale opacerya elukuluku opacenryeiye olaleerya ophiyerya ophwanelela wawe opatiso, akhweya miyeeri vakhaani pahiru. Iwora hai sa muteko wa mmacani onaphwaneleiye oveleelaka? Hiwaavo malamulo ootikitheryiwa. Mansiau anaphwanela othokororya makhalelo oohiyanahiyana a khata mulaleeryi nave ekhaleno epewe ni ophimelela.​—Luka 21:1-4.

Mansiau (nari arummwa oorumeela mu miloko irino mansiau vakhaani) yaawo anathukumana ni yaale anachuna opatisiwa anaphwanela wuupuwela wi muchu ti muchu ti oohiyana, nave awo anaphwanela opharihela moonelo waphaama wi elakelele wakhala wi muchu owo onnaphwanelela opatiso. Awo yaahaala oweherya woona wi owo onnachuna chiryene okhala namoona a Yehova nave wi onnooniherya othamalela othukumana ni marehereryo a Yehova ni wuuka mu orummwa. Mansiau anniiwexexa wi owo haakumve wunnuwa ophiyerya wiichwa mmukhalelo woomunepani nari okhalano osuwela wa alaleeryi oopatisiwa awiichwa. Wakhala wi mansiau anoona wi muchu owo hanaphwanelela opatiso, awo anaphwanela omuleela moosivela mathowa a Soorempwa wa yoolakelela aya ni omukhaviherya wi aakhele nikhaviheryo noomunepani.