Oreelihiwa wa Yakopo

Isaki aarino iyaakha 40 amuthelaka Repeka. Owo aanamusivela vancipale. Ohoolo waya, awo yaakhalano anamwane apiili maphapo.

Oopacerya iichaniwa Esawu, anaawiili iichaniwa Yakopo. Esawu aari mulipa oosaya, nave waanatepa omusivela waasaya asinama. Nyenya Yakopo waamusivela okhala owaani.

Mmahiku a khalai, mwaana oopacerya aanahalano imaca sincipale ni ikhorowa atiithi awe ekhwaaka. Eyo yaari echu yoohiyeryiwa. Wa emusi ya Isaki, yoohiyeryiwa eyo yaavolowela soolaiherya sa Yehova wa Aparahamu. Esawu haapwanche wi mareeliho awo toochuneya, nyenya Yakopo aanasuwela wi yaari oochuneya.

Nihiku nikina, Esawu aaya owaani avoliwe vancipale nthowa na omala nihiku nanteero asayaka. Owo aahoona wunkhela wa yoolya yeeyo Yakopo aapen’yeiye nave ahi: ‘Koovelavela! Okivahe yoolya, echu eyo yoophilivila.’ Yakopo ahi: ‘Kaariki koovahe yoolya, okitumiherye toko otokweene aa.’ Esawu ahi: ‘Ti yaphaama! Miyaano kinnakhwa etala! Otokweene aka onaya okiphurela eheeni?’ Onuupuwela wi yeeyo Esawu eenreiye yaari echu yoophwanelela? Hooye. Esawu aayeleela echu yoochuneya nthowa na nruru na ikhuce.

Vaavaa Isaki uuluvanleiye, yaaphiya elukuluku wi amureelihe mwaana ole oopacerya. Nyenya Repeka aamukhavihenrye Yakopo yoowo aari mwaana mukhaani, wi aakhele mareeliho. Vaavaa Esawu aasuwenleiye, aakhala oonyeenyeya nave aanachuna omwiipha munnawe. Isaki ni Repeka yaamukhapelela Yakopo ni emuleela: ‘Ochawe oye wa munnaka Lapani okhale weiwo ophiyerya elukuluku munna aa oneereiye akhurumuwe.’ Yakopo awiiwelela asitiithi awe wi oopole ekumi awe.