MWAHA 17
Anamwane A Maphapo Yaawo Yaari Oohiyana
ANAAMIRAVO eeli ala va, tohiyana vancipale, kahiyo? Moosuwela masinaaya? Mulipa ooxayoowo ti Esawu, nave m’miravo owo onakukhula ipucepuche ti Yaakopo.
Esawu ni Yaakopo yaari anamwane amaphapo a Isaaki ni Repeka. Tiithi owo Isaaki, aamusivela vancipale Esawu, nthowa nawii aari mulipa ooxaya aphaama nave aanaruha ichu sawii echoko elyeeke. Nyenya Repeka aamusivela vancipale Yaakopo, nthowa nawii aari mmiravo oomaaleleya ni awiichachala.
Atatawe Aaparahamu nlelo yaari mukumi, nave ninnawerya wuupuwelela mummo Yaakopo aasiveleliwiiye waawiriyana elocaka sa Yehova. Vachuli vaya Aaparahamu aahikhwa arino iyaakha 175 sa oyariwa wawe, vaavaa maphapo awo yaaryaayano iyaakha 15.
Vaavaa Esawu aariiyeno iyaakha 40, aahaathela asimwali eeli a elapo ya Kaanani. Ela yaahimuthananiha Isaaki ni Repeka, nthowa nawii athiyaneene yaawo hiyaamulapela Yehova.
Ovinyerya vaavaa, nihiku nikina, yaaheereya echu yeeyo yaamweerinhe Esawu onanariwa vancipale ni munneeni Yaakopo. Yaahiphiya elukuluku yeeyo Isaaki aaphwaneliiye omureeliha mwanawe mutokotoko. Okhala wii Esawu aari mwaana mutokotoko ompwaha Yaakopo, owo aanawehererya waakhela mareelihweene yaala. Nyenya, Esawu aari atuminheene wa Yaakopo oophwanelela wa waakhela mareeliho. Navetho vaavaa eeli ala yaayariwaaya, Muluku aariye wii Yaakopo aahala waakhela mareeliho. Nave ti mummo seerelenyaaya. Isaaki aaveleenle mareeliho wa mwanawe Yaakopo.
Vachuli vaya, vaavaa Esawu aasuwenliiye sa eyo, aahinanariwa ni Yaakopo. Aahinanariwa vancipale, ii onahaala omwiipha Yaakopo. Vaavaa Repeka aasuwenliiye sa eyo, aahuukhuwa vancipale. Owo aahi wa aiyawe Isaaki: ‘Onahaala okhala wawoopiha Yaakopo’tho amuthela mwali o Kaanani.’
Hiihaanto, Isaaki aamwiichana Yaakopo ii wa yoowo: ‘Ohimuthele mwali o Kaanani. Nyenya oye owannyaya wa ataataa Petuwele, o Haraani. Omuthele mmoha a anamwane a aasithiyana a mwanawe Lapani.’
Yaakopo aahiwiiwelela atiithinya nave mwawaakuveya aahipaka mukwaha mutokotoko oya o Haraani weiwo waakhalawo anneeni.
Mapacereryo 25:5-11, 20-34; 26:34, 35; 27:1-46; 28:1-5; aHebri 12:16, 17.