MWAHA 16
Isaaki Onnamphwanya Mwaariye Aphaama
MANO munnasuwela wii mwali ola taani verukuni va? Nsina nawe ti Repeka. Nave mulopwana owo onamuthikirerya ti Isaaki. Owo onahaala okhala mwaariye. Mano yeeyo yeerenyee mwawiihai?
Yeerenyee wii Aaparahamu tiithi a Isaaki, aamuchuna muthiyana aphaama ntakhara a mwanawe. Haachuna wii Isaaki amuthele muthiyana o Kaanani, nthowa nawii achweene yaawo yaalapela miluku yoowoka. Va nthowa nenla, Aaparahamu aamwiichana murummwaawe nave aahi: ‘Kinachuna wii okookele weiwo onakhalawo annaaka, o Haraani, nave wamwaavye muthiyana ntakhara a mwanaka Isaaki.’
Murummwa a Aaparahamu mwawakuveya aahaakuxa akamila khumi nave aaheecha mukwaha woorekama. Aphiyaka vakhiviru ni weiwo waakhalawo anneeni a Aaparahamu, owo aahemela vakhiviru ni ehime. Waari oxekuwa, elukuluku yeeyo athiyana a mmucecheni mmo yaarwaaya orika maahi. Murummwa a Aaparahamu aahivekela wa Yehova: ‘Eerihani wii muthiyana yoowo onii arike maahi ntakhara a miyo ni akamila aka akhale yoowo mmuthanlilaanyu okhala mwaariye a Isaaki.’
Mu elukuluku vakhaani, aahirwa Repeka orika maahi. Vaavaa murummwa owo amvenkiiye wii amvahe maahi awurye, owo ahimvaha. Vachuli vaya, aahiya orika maahi mancipale ntakhara a akamila oothene yaawo yaari oovoliwa nchanana. Waari muteko mutokotoko, nthowa nawii akamila annatepa owurya maahi mancipale.
Vaavaa Repeka aamalinhiiye, murummwa a Aaparahamu aahimukoha wii atiithinya yaari taani. Aahimukohatho wii waweryeya ohaya owannyaya. Owo aahaakhula: ‘Atiithi aka ti a Petuwele, nave nipuro noohayavo nookhalavo.’ Murummwa a Aaparahamu a anasuwela wii Petuwele aari mwaana a munnawe a Aaparahamu, Naahore. Va nthowa nenla aahikokhora amuthamala Muluku nthowa noomuhoolela ophiyerya wa anneeni a Aaparahamu.
Mu ohiyu yoole, murummwa a Aaparahamu aahimuthoriherya Petuwele ni Lapani munneeni a Repeka, nthowa nene aarwenliiye. Oothene yaahiiwanana wii Repeka aroweno vamoha ni wii atheliwe ti Isaaki. Mano Repeka aakhunle eheni vaavaa aakohiwiiye? Owo aariye: ‘Aayi, kinnachuna orowa.’ Vawihiihaa, oxaakaya, yaahaawela akamila ecimula mukwaha woorekama wookookela o Kaanani.
Yaaphiyale oxekunweene. Repeka aahimoona mulopwana eecheechaka mmacani. Aari Isaaki. Owo aahihakalala omoona Repeka. Waari ovinrevo iyaakha raru pahi amannya Saara ekhwiiyeene, nave nlelo owo aari oothananeene. Nyenya vano, Isaaki aahimusivela vancipale Repeka, nave aahikookela okhala oohakalala.
Mapacereryo 24:1-67.